Merkezê Îrtîbatî û Çapemenîye yê HPGyî nasnameyê 6 şehîdanê Kurojahroyî eşkera kerdî.

Eşkerayîye wina ya:

''Warê Xoverdayîşî yê Kurojahroyî warêko winasêno ke tede vera artêşa tirke ya îşxalkere xoverdayîşêko tarîxî yeno kerdene. 23ê gulane de tîya de mabênê xoverdayoxanê Kurojahroyî û îşxalkeran de pêkewtişê giranî qewimîyayî. Nê pêkewtişan de îşxalkerî bi giranî bin kewtî û embaze Rojbîna ke bi fedayîtî şîya serê dişmenî şehîd bîye. 23-25ê gulane de artêşa îşxalkere reyna bi namerdî pê çeka kîmyewîye hêrişê tunel û mewzîyanê Kurojahroyî kerd. Nê rojan de embazê ma Binevşe, Çîya, Bêrîtane, Ronî û Devran hêrişanê kîmyewîyan de şehîd bîyî.

Nê embazê ma yê ke fermandarê serkêş û ewladê delalî yê şarê ma bîyî, seba pawitiş, azadîye û rûmetê Kurdîstanî binê şertanê giranan de têkoşîn kerd û şehîd bîyî. Înan mojna ke se beno wa bibo tradîsyonê xoverdayîşî yê Apogîran ra tawîz nêro dayene û nê embazî bîyî rûmetê şarê xo. Ma soz danê ke nê mîraso ke embazanê ma pê tewirê xo yê esîlî afernayo, qetî bi serkewtişî tacîdar bikerê.

Sere de keyeyanê înan ê ercîyayeyan rê, ma pêro şarê welatperwerî yê Kurdîstanî rê serweşîye wazenê.

Nasnameyê embazanê ma yê şehîdan wina yê:

Nameyê Qodî: Binevşe Agal Name û Peyname: Gulperîne Ata Cayê Bîyayîşî: Riha Maye-Pî: Gulşahe– Reşit Tarîx û Cayê Şehadetî: 23-25ê Gulana 2022yî / Zap

Nameyê Qodî: Rojbîne Agirî Serhed Name û Peyname: Sara Saglam Cayê Bîyayîşî: Agirî Maye-Pî: Mihricane – Şakir Tarîx û Cayê Şehadetî: 23-25ê Gulana 2022yî / Zap

Nameyê Qodî: Çiya Amed Name û Peyname: Rojda Guler Cayê Bîyayîşî: Êlih Maye-Pî: Fadime – Abdulrahim Tarîx û Cayê Şehadetî: 23-25ê Gulana 2022yî / Zap

Nameyê Qodî: Beritane Sine Name û Peyname: Nilufere Xalidyan Cayê Bîyayîşî: Sine Maye-Pî: Şehla – Muhyettin Tarîx û Cayê Şehadetî: 23-25ê Gulana 2022yî / Zap

Nameyê Qodî: Ronî Bakî Name û Peyname: Mazlum Ozguç Cayê Bîyayîşî: Hatay Maye-Pî: Turkane – Fehmî Tarîx û Cayê Şehadetî: 23-25ê Gulana 2022yî / Zap

Nameyê Qodî: Devran Riha Name û Peyname: Suleyman Aydogdu Cayê Bîyayîşî: Riha Maye-Pî: Anzilha – Davut Tarîx û Cayê Şehadetî: 23-25ê Gulana 2022yî / Zap

Embaze Binevşe Riha de mîyanê keyeyêkê mêrdînijî de dadîya xo ra bena.  Pîrikê aye Abdulrahman Ata serranê 90an de cînayetê faîl-î meçhûlî de, xalê ci Welat Ata û Mehmet Şîrîn Ata refanê PKKyî de şehîd bîyî. Babîyê aye zî bi serran zîndan de mendo. Embaze Binveşe verî xebatanê ciwanan de ca gêna û yena destbendkerdene, tepişîyena. Embaze Binveşe vera nê kerdişan 2014 de Botanî ra tewra gerîlayan bena. Embaze Binveşe Besta de perwerdeyî ra dima bîya suîkastwana profesyonele.  A Besta de 2016 de birîndar bena û 5 embazê ci zî kişte de şehîd benê. A bi hîsê qesasî 2017 de Akademîya Mahsum Korkmazî de perwerde vînena û bena fermandar. Embaze Binveşe derbazê Kurojahroyî bena û tîya de têkoşînêkê pîlî kena. A tim pê tewir, çêrî, fermandarî û eşqê xo do vernîya ma roşnî bikera.

Embaze Rojbîne Agirî de dadîya xo ra bena. Embaze Rojbîne verî tewra xebatanê ciwanan bena û 2013 de zî tewra gerîlayan bena. A wextê hêrişanê DAÎŞî de Kobanê de têkoşîn kena û birîndar bena. Azadîya Kobanê ra dima a reyna verê xo dana koyan û perwerdeyan ra dima xeta PKK û PAJKî de xo aver bena.  Wextê hêrişanê vera Herêmanê Pawitişî yê Medya de a derbazê Zapî bena, tewra xeylêk çalakîyan bena û derbanê giranan dana dişmenî ro. Embaze Rojbîne Kurojahro de zî vera dişmenî çaalakîyanê serkewteyan kena û çalakîyanê 23-25ê gulane de xeylêk îşxalkeran ceza kena. Ma soz danê ke vîrameyîşê ci bidê ciwîyayene.

Embaze Çîya Êlih de dadîya xo ra bena. Embaze Çîya Amed de zanîngehî wanena û o çax kewena peyê cigêrayîşan. Embaze Çîya Qirkerdişê Garî yê dewleta tirke ra dima pê hîsê qesasî 2015 de tewra gerîlayan bena. A panc serran Heftanîn de têkoşîn kena, perwerde vînena û perwerde ra dima sey sabotajwane derbazê Zapî bena. Warê wezîfeyî yê peyênî Zap de zî a serkêşîya Fermandare Mizgîne Ronahî de derbanê giranan dana dişmenî ro û bi hawayêkê aktîfî tewra prosesî bena. Embaze Çîyaya ke rûmetê Kurdîstanî û cinîyan ê kurdan pawitêne, sey cinîyêka azade ya Kurdîstanî tewra karwanê şehîdan bena.

Embaze Bêrîtane şaristanê Sine yê Rojhelatê Kurdîstanî de dadîya xo ra bena.  Embaze Bêrîtana ke 3 zaravayanê kurdkî zî musavî, pê tesîrê paradîgmaya Rayberîye Newroza 2017î de tewra gerîlayan bena. A sey fermandare Bêrîtane cade musena cuya gerîlayan û tewra pratîkan bena. Perwerde ra dima seba pratîkan 2018 de derbazê Zapî bena û tîya de tecrubeyanê pîlan visnena destî. A mîyanê tîmanê hereketînan ê YJA-Starî de ca gêna û pê çêrîya xo bale ancena. Embaze Bêrîtane zî Kurojahro de pa 4 embazanê xo hêrişanê kîmyewîyan de şehîd bena.

Embaz Ronî mîyanê keyeyêkê kurdîstanijî de Hatay de dadîya xo ra beno. Embaz Ronî 2015 de tewrê gerîlayan beno û dima derbazê warê Cîloyî yê Zapî beno. Embaz Ronî vera cerganê DAÎŞî Şingal de têkoşîn keno û dima sey fermandarêkî derbazê Zapî beno. Embaz Ronî Zap de vera hêrişanê îşxalî yê dişmenî tewrê xeylêk çalakîyan beno û çarçewa Hemleya Şorişgêre ya Bazanê Zagrosî de zî xoverdayîşî rê serkêşîye keno. Embaz Ronî Kurojahro de keno ke dişmen derbanê giranan bigêro. Embaz Ronî hêrişanê kîmyewîyan de şehîd beno.

Embaz Devran Riha de dadîya xo ra beno. O peyê cigêrayîşanê xo de 2019 de tewrê gerîlayan beno û perwerdeyan ra dima derbazê Zapî beno. Embaz Devran vera hêrişanê îşxalî embazanê xo rê beno çimeyê hêz û moralî, wezîfeyanê xo yew bi yew ano ca û Kurjahro de zî tewirê xo yê Apogîrî ra tawîz nêdano. Embaz Devran Warê Xoverdayîşî yê Kurojahroyî de pê pêro xîretê xo şer keno la hêrişanê kîmyewîyan ê artêşa îşxalkere de şehîd beno. Ma soz danê do xeyalanê înan bîyarê ca.''