Merkezê Îrtîbatî û Çapemenîye yê HPGyî eşkera kerd ke gerîla Sarya Erez Dêrsim şehîd bîya û nê pare kerdî:

''Hemraya ma Sarya Erez Dêrsîm 23ê adara 2019î de Herêmanê Pawitişî yê Medya de şehîd bîye. Ma serrgêra şehadetê ci de hemraya xo Sarya bi rêzdarî û mînetî yad kenê. Ma sere de keyeyê erjîyayeyî yê hemraya xo Sarya rê heme şarê welatperwerî yê Kurdîstanî rê serweşîye wazenê û soz danê ke ma do xîyalê Rayberîya Azade, Kurdîstanê Azadî yê hemraya xo bîyarê ca.

Nasnameyê hemraya ma Sarya Erez Dêrsim wina yo:

Hemraya ma Sarya keyeyêkê welatperwerî yê Amedî yena dinya û hema domanîya xo de têkoşînê azadîye yo ke serkêşîya partîya ma PKKyî de yeno rayra berdene, nas kena. Xalê ci hemrayê ma Eyup Aslan 1992 de şehîd beno û xalê ci yo bîn Reşît Aslan bado ke tewrê têkoşînê azadîye beno esîr kewno destê dişmenî. Nê semedî ra hemraya ma Sarya raştîya dişmenî rewî ra nas kena û vînena ke tê bi têkoşînê PKKyî çew eşkeno şar û herra xo bipawo. Hemraya ma Sarya gama ke Unîversîteya Mersinî de wanena cigêrayîşanê xo dahîna xorî kena û  2013 de tewrê refanê gerîlayan bena.

Hemraya ma Sarya perwedeyê xo yê verênî Garê de vînena û tîya pratîk de ca gena. Tîya xeylêk tecrube kena pêser û bena gerîlayêka serkewtîye ya YJA Starî. 2014 de Akademîya Şehîd Mahîrî de perwerdeyê pîsporîye gena, şuxulnayîşê çeka girane musena û 2015 verê xo danê waranê şerê gîranî. Zap, Xinêrê, Şingal û Cilo de gerîlatîye kena. Zagrosan ra heta Şingalî ça de hewce bibo ûca wezîfe gena xo ser û bi serkewtişî ana ca. Bitaybetî Şigal de vera çeteyanê DAÎŞî têkoşîn kena û dima reyna verê xo dana koyanê Kurdîstanî. 2017 de tewrê perwerdeyê Akademîya Şehîde Bêrîtane bena û badê perwerdeyî herêma Garê de xebatanê cîya cîyayan rayra bena. Dima  ravîyarena warê Qendîlî xeylêk xebatanê muhîman ê rêxistina ma de ca gena û bi fahmê xo yê cinîya azade û tewirê xo bena mîlîtanêka nimûne ya PAJKî.

Hemraya ma Sarya 23ê adara 2019î  de tewrê kerwanê şehîdan bena. Ma serrgêra şehadetê ci de şexsê aye de heme şehîdanê xo bi rêzdarî yad kenê û reyna soze xo newe kenê ke ma do waştişê şehîdanê xo bîyarê ca.''