Merkezê Îrtîbatî û Çapemenîye yê HPGyî bîlançoya şerê mengêke yo ke çarçewa Hemleya Şorişgêre ya Bazanê Zagrosî de qewimîyeno, eşkera kerde. Eşkerayîye de nê agahîyî ameyî dayene:

''Hêrişê hîrayî yê artêşa tirke ya îşxalkere mengêke xo pey de verdaye ke 14ê nîsane de vera waranê Zap û Avaşînî yê Herêmanê Pawitişî yê Medya dîyabî destpêkerdene. Gerîlayanê Kurdîstanî hela verêne ra nata her parçeyê erdê Kurdîstanî bi ruhê milîtanîya fedayî ya Apogîran kerd warê xoverdayîşî, cewabo raşt da îşxalkeran û derbê giranî dayî îşxalkeran ro.

Xeta serkewtiş û ruhê fedayî yê Şoreş Beytuşebabî û embazanê ey ke 2021 de cewab dabi hêrişê dewleta tirke ya îşxalkere yê vera Garê û bi xoverdayîşê xo Destanê Çêrîye yê Garê afernabi, Xoverdayîşê Mamreşo û Zendûra awan kerd. Embazanê ma Girê Sor û Werxekê de tarîxê xoverdayîşî yê şarê ma de rîpelêko newe akerd. Milîtanîya Apogîre gooreyê şertanê dewrê neweyî hesabê îşxalkeran çin kerdî. Tîmanê ma yê hareketînan înîsîyatîfê warê warî girewt xo destî û bi metodanê sereştiş, sabotaj, suîkast û taktîkanê cîyayan çalakîyê afernayoxî kerdî. Hêzanê ma yê Pawitişê Hewayî yê Şehîde Delale nê prosesê mengêke de rolê xo ardî ca. Hêzanê ma YJA-Starî hela verêne ya hêrişanê îşxalî ra nata çalakîyê bitesîrî kerdî. Cinîyan ê kurdan nê şerê azadîye de nasnameyê ma yo xurt bi rengê tewr bihêzî temsîl kerd. Temsîlîya xurte, şerwanîye, çêrîye û serkêşîya cinîyan ê kurdan ê azadan reyde şexsê Şaristane, Mizgîne û Vîyanan de  fermandarê YJA-Starî bîyî sembol û mîsalê dewrê neweyî.

Dewleta tirke ya îşxalkere wazena armancanê xo yê îşxalî bîyara ca. Seba ney zî îmkanê xo yê tekînî vistî dewre û hêrişanê tewr hîrayan ê tarîxê xo ra yew kena. Goreyê tesbîtanê ma, têna na menge de bi hezaran obus û topî waranê xoverdayîşî de ameyî varnayene û 813 reyî herême dîyayî bombayan ver la artêşa îşxalkere nêeşkaye netîceyêke bivisna destî. Artêşa tirke naye ser o reyna dest eşt metodanê gemarinan. Artêşa îşxalkera ke netîceya çalakîyanê hêzanê ma de derbê pîlî werdî û nêeşkaye aver şora, 164 reyî vera Waranê Xoverdayîşî çekê kîmyewîyî şuxilnayî û sucê şerî kerdî. Dewleta îşxalkere waranê binê kontrolê PDKyî de xeylêk reyî hêrişî kerdî û baregehê xo yê leşkerî yê Başûrê Kurdîstanî şuxilnayî, nê baregehan ra hêzî şawitî Waranê Xoverdayîşî. PDKyî destpêkî ra nata xîret kerd ke artêşa tirke bin nêkewa. Artêşa îşxalkere rixmê pêro paştdayîşanê ke dîyayê ci, nêeşkaye biresa armancanê xo û asta cidîye de şikîyaye.

Gerîlayanê ma yê azadîye yê Kurdîstanî mîyanê na menga peyêne de bi hawayêkê tarîxîyî xo ver da û hunerê xo yo berzî yê şerî mojna. Bêguman bii ked û xîretanê şehîdanê ma na netîceya serkewte ameye destvistene. Nê hêrişanê mengêke de 25 embazê ma şehîd bîyî û bîyî sebebê caardişê Kurdîstanê Azadî. Gerîlayanê azadîye bi performans, tewirê fedayî û metodê şerî yê milîtanîye reyna mojna ke ê wayîrê ê hêzî yê ke cewab bidê her tewirê hêrişanê vera Kurdîstanê fîrazî û şarê ma.

Bîlançoya şerî ya mengêke

Bîlançoya şerê mabênê 14ê nîsane û 14ê gulane wina ya:

Çalakîyê ke hezanê ma kerdî;

- 4 çalakîyê sereştişî

- 4 çalakîyê mîyandekewtişî

- 20 çalakîyê bikoordîneyî û hemwextî

- 37 çalakîyê sabotajî

- 62 çalakîyê sekbanîye

- 68 çalakîyê bi çekanê giranan

- 147 şer û çalakîyê derbdayîşî

- Gerîlayan bi temamî 343 çalakîyî kerdî

Netîceya nê çalakîyanê hêzanê ma de;

- 427 îşxalkerî ameyî cezakerdene

- 88 îşxalkerî birîndar bîyî

Hêrişê ke artêşa tirke ya îşxalkere kerdî;

-Goreyê tesbîtanê hêzanê ma sere de Warê Xoverdayîşî, Herêmê Pawitişî yê Medya 817 reyî pê teyarayanê şerî dîyayî bombayan ver.

- 719 reyî bi helîkopteranê hêrişî û 1274 reyî bi obusan bombardûmanî ameyî kerdene.

- 164 reyî vera çeperanê şerî yê hêzanê ma gazê kîmyewîyî şuxilîyayî.

Hacet û malzemeyê leşkerî yê ke hêzanê ma îmha kerdî;

- Helîkopterêkê bi tîpê Skorskyî

- Tankêk

- 14 çeperî

- 7 Droneyî

- 5 Sîstemê Kamera yê Mobesse

- 2 Cîhazê Goşdarîkerdişî

- Çekêka BKCyî

- Çekêka bombaeştoxî

- Çekêka A4î

- 2 Xeymê Leşkerî

- 2 kamerayê fotografan û sensorê têgêrayîşî

Wesayîtê leşkerî yê ke hêzanê ma derbe kerdî;

- 22 helîkopterî

- 3 Droneyî

- Wesayîtêkê leşkerî."