Endamê Komîteya Rayberdişî ya PKK’yî serrgêra 3’ine ya Têgêrayîşê Şorişgêrî yê Yewbîyayeyî yê Şaran (HBDH), serra 4’ine ya mucadeleyî û hemleya ‘Ma do tecrîdî biqedînê, faşîzmî birijnê’ ercnayî.

PEYMEYÊ RONAYÎŞÎ YÊ HBDH’YÎ SERKEWTIŞÎ FERZ KENÊ

Kalkanî vist vîrî ke HBDH 12’ê Adar a 2016’î de ronîyayo û vat, “Eşkerayî hetê embazanê ma Ûlaş û Delale ra amîbî dayene. Her diyî zî şehîd kewtî. Bi wesîleya serrgêra ronayîşî ez embaz Ûlaş û Delale bi hurmet bi vîr ana. Têgêrayîş wextêko kilm de bi têgêrayîşê şehîdan. Naye ra peymeyê ronayîşî yê HBDH’yî serkewtişî ferz kenê. Mîyanê hîrê serranê peyênan de HBDH’yî hemverê faşîzmê AKP-MHP’yî yo ke bîyo rejimê leşkerî yo eşkera mucadeleyêko dînamîk û radîkal da. Kurdistan û Tirkîya de hemverê faşîzmî de xover da, şer kerd û faşîzmê AKP-MHP’yî ard leweyê binkewtişî. Xusûsen mucadeleyê hemverê faşîzmê DAÎŞ’î yê Rojawanî de rolêko muhîm kay kerd. Wareyê şerî de paştîya tewr xurte daye QSD’yî. Cinî û camêrd 40 ra vêşêrî şehîdê ci nê şerî de virazîyayî.”

HBDH DO FAŞÎZMÊ AKP-MHP’YÎ BIN FÎNO

Kalkanî ard ziwan, bi nê mucadeleyî derbe nîyayo faşîzmî ro û vat, “Dîktatorîya Erdogan-Bahçelî’yî leweyê binkewtişî de ya. Ê bi xo zî nê anê ziwan. Mîyanê pratîkê hîrê serran de ma dî  ke bê pîl bîyayîş, averşîyayîş û viraştişê çîyanê neweyan pawitişo mewcûd nêeşkeno bêro bicaardene. Îhtîyacîya averberdişê pawitişî bi xurt bîyayîş, kîtle bîyayîş û mucadeleyêkê pîlî yê şorişgêrî esta. Ma nê dersan ci ra vejê. Ma bawer ê ke do serra çarine ya mucadeleyî de HBDH do dormeyê xo bi nê hawayî hîra bikero û faşîzmê AKP-MHP’yî bin fîno.”

ÎNANÊ KE VATÊNE KARDÎ RESAYA ESTEYÎ NA HEMLE DAYE DESTPÊKERDENE

Kalkanî dewamê qîseykerdişê xo de hemleya ‘Ma tecrîdî bişiknê, faşîzmî birijnê’ ercnaye û xoverdayoxê na hemleye Leyla Guvene, Nasir Yagiz, şorişgêrê zîndanan û bi desan welatperwerê ke zere û teberê welatî de na hemleye rayra benê silam kerdî.”

Kalkanî vat, “Ez reyna wazena vajî ke do bi ser bikewê. Wextê peyênî de Almanya de welatperwerêkê bi nameyê Ûgûr Şakarî adîr na bedenê xo ra. Ez ci rê şîfaye wazena. Rixmo ke ma çalakîya winayêne tesdîq nêkenê zî çalakîya ê ramot ke zexto faşîst û teror, çetinîya hêrişanê qirkerdoxan kamcîn merheleye de yê. Resayo a merheleye ke hendî şar adir nano bedenê xo ra. Şar hemverê nê zextan de xo vêşneno, bi seyan rojan xo vêşan verdano, hucre bi hucre bedenê xo helneno. Merheleya teror û zextê faşîstî resaya na dereceye. No halêko zaf muhîm o.”

TIRKÎYAYA DEMOKRATÎKE

Kalkanî ard ziwan hemleya ‘Ma do tecrîdî biqedînê, faşîzmî birijnê’ do netîceyanê bingeyênan xo reyde bîyaro û vat, “Aya yewine do Kurdistanî azad bikero, aya dîyine zî do Tirkîya bikero demokratîke. Bi nê hawayî do vernîya demokratîkbîyayîşê Rojakewtena Mîyanêne zî akero. Tecrîdo ke esto tecrîdê hemverê kesêk yan zî cayêk de nêyo. No zihnîyetêk o, sîyasetêk o. Metodêkê îdareyî yo. Naye ra tecrîd bîyo metodêkê îdareyê AKP-MHP’yî. Yeno manaya qirkerdişê Kurdan. Hal resayo na nuqtaye. Sere de Kurdan şaran hemverê nê de bi xurtî xover da. No xoverdayîş agêra bi hemleyêka plankerdîye. Bîya hemleyêka xoverdayîşî ke amacê ci serkewtiş o. Amacê hemleye azadîya Kurdistanî û demokratîkbîyayîşê Tirkîya yo.”

HEMLE HEMAN WEXTÎ DE FELSEFEYA HBDH’YÎ RAMOJNENA

Kalkanî ard ziwan ke bi nameyê HBDH’yî ê hemleye bi nê hawayî ercnenê, wayîr ci rê vejênê û vat, “HBDH zî serê zihnîyetêkê winayênî de vejîya werte. Slogana êya bingeyêne wina bîye; ma do faşîzmî birijnê, şaranê xo azad bikerê. Felsefeya aye yo bingeyên bi nê hawayî vejîyaye werte. Dorê na slogane de awan bi û mucadeleyê ci yê 3 serran zî serê nê bingeyî de yo. Amaco bingeyên; rijnayîşê faşîzmî yo ke Kurdistanî ser o qirkerdişî ferz keno.”

MUCADELEYO HEMPAR Û PÊGIREWTE

Kalkanî dewamê qiseykerdişê xo de nê vatî: “Roje roja mucadeleyî ya. Roja rîjnayîşê faşîzmî û afernayîşê azadî û demokrasîyî ya. Tîya çîyo muhîm o nêyo ke tena têgêrayîşan çîyêkê winayênî ser o qerarêkê wînayênî dayo yan nêdayo. Ma bala xo bide serê ci ke na hemleye hetê têgêrayîşêkê ra nêamî destpêkerdene. Merdimê ke binê zext û zorê faşîstî de bîyî na hemle daye destpêkerdene. Çîyo ke keweno doşê ma HBDH’yî ser, ke tîfaqo tewr hîra yê hêzanê demokratîk û şorişgêran o, eşnawitişê nê vengî yo, nê xoverdayîşî rê wayîrvejîyayîş o û veşîkerdiş û xurtkerdişê ci yo. Ganî ma hîna zaf mîyanê cinî, ciwan, karker û kedkaran de vila bikerê. Ma cimatî seba nê xoverdayîşî hîna zaf seferber bikerê. Ma nê kenê, cehd kenê ke bikerê. Ma do heme hêzanê xo seferber bikerê ke na yewe bica biyarê. Çunke no mucadele mucadeleyêko hempar o, pêgirewte yo.”

Kalkanî vat qedînayîşê tecrîdî do boyêka hîraye bido Kurdan, rayîrê azadîya Kurdan abo û vernîya rijnayîşê faşîzmê Tirkîya abo û vat, “Çunke her çî sîstemê tecrîd û îşkenceyî yê Îmraliyî de asê mendo. Kilîd ûca yo. Na yewe ra peymeyo tekane yê azadîperwerîye, demokratîkbîyayîşî û antî-faşîstîye hemverê sîstemê tecrîd û îşkenceyî yê Îmraliyî de vejîyayîş o.”

SERRA ÇARINE YA MUCADELEYÊ HBDH’YÎ

Kalkanî ard ziwan mucadeleyê HBDH’yî yê 3 serranê ravêrteyan tecrube û pêserîya muhîme veto meydan û HBDH resayo dereceya têgêrayîşêk ke rijnayîşê faşîzmî û bicaardişê serkewtişê dayo xo ver.

Kalkanî vat, “Ê se vanê wa vajê, çiqas diktator Erdogan û Bahçelî 24 saetan demagojîye kenê wa bikerê, çiqas kenê bare-bare wa bikerê faşîzm rîjêno. Krîzê ekonomî-sîyasîyî giran beno. Eşkera yo ke sebebê nê faşîzm, kolonyalîstîye, qîrkerdîş û şer o. Îmkanê xapênayîşî yê faşîzmê AKP-MHP’yî yê şaran raste ra wedarênê. Hetê bînî ra polîtîkayê înan ê herêmîyî, polîtîkayê înan ê zereyî bi temamî bin kewtê. Keno ke Rûsya û Amerîka vera bido pê û tayê çîyan bi dest bifîno, la her di hetan de zî keno vîndî. Soçî de bin kewtî, têkilîyanê xo yê Amerîka de bin kewtî, polîtîkaya ci ya Idlîbî bi ser nêkewte, gefanê xo yê serê Minbic û Vakûr-Rojakewtena Sûrîye ra netîce nêgirewt. Başûrê Kurdistanî de bi serewedartişê şarê Dêralok û Şêladizê bin kewt. Şarê Vakûrê Kurdistanî zî rixmê hêriş û qirkerdîşan de xeta azadîye û demokrasîyî de qerardar o. Her roje na yewe bi çalakîyanê xo ramojneno. Şar seba ke weçînitişanê 31’ê Adare de şarê Kurdistanî bi ser bikewo, Tirkîya de zî faşîzm bin bikewo, bîyo yew û bi hawayêkê seferberkîyî mucadele dano.”

PROSESO MEWCÛD PROSESÊ QEDÎYAYÎŞÊ FAŞÎZMÊ AKP-MHP’YÎ YO

Kalkanî ard ziwan ke proseso ke nika tera yeno ravêrtene prosesê qedîyayîşê faşîzmê AKP-MHP’yî yo û vat, “Ganî her kes nê bivîno. La ganî no zî bêro zanayene ke tu çî bi sereyê xo nêrijêno. Îhtîyacî bi mucadeleyî esta. Bi xoverdayîşê antî-faşîstî do faşîzmê AKP-MHP’yî bin bikewo. Na yewe rastîyêk a. Naye ra wext wextê rijnayîşê faşîzmî, wextê serkewtişê xeta azadîye û demokrasîyî yo. Serra 4’ine ya HBDH’yî na rastîye ramojnena.”

Kalkanî vat, “Serra 4’ine do bibo serra mucadeleyî ya bi metodanê hîna zengîn û zafhetan. Metropolanê Tirkîya de, Kurdistan de û temamê Rojakewtena mîyanêne de do bibo mucadeleyêko pêroyî. Mucadeleyê çekdarîyî ra heta mucadeleyê îdeolojîk do mucadeleyo kîtlekî bi heme rayîran bêro dayene. Serra 4’ine de bi mucadeleyêkê winayênî do cepheyê azadîye û demokrasîyî bi ser bikewo.”

Kalkanî peynîya qiseykerdişê xo de vat, “Slogana destpêkî ya HBDH’yî do bica bêro. Felsefeya destpêkî do bêro bicaardene. Faşîzm do birijîyo, şorişo yewbîyaye do bi ser bikewo. Faşîzm do birijîyo, demokrasîyê şaran do bi ser bikewo, cinî û ciwanî do bi ser bikewê.”