Endamê Komîteya Rayberdişî ya PKKyî Duran Kalkanî derheqê Komployê Mîyanneteweyî yê vera Rayberê Şarê Kurdî Abdullah Ocalanî de ANFyî rê qisey kerd.

Qiseykerdişê Kalkanî ra tay noqtayê girîngî wina yê:

''Komployo Mîyanneteweyî 9ê teşrîna verêne ya 1998î de dîya destpêkerdene. Zor dîya Rayber Apoyî ke Sûrîye ra vejîyo. Komployo Mîyanneteweyî hêrişêk bi ke îmhakerdişê Rayber Apoyî, tasfîyeya PKKyî û qirkerdişê şarê kurdî armanc kerdêne. Rayber Apoyî 15ê Sibate sey 'Roja Reşe' pênase kerde. Çunke vera Şêx Seîdî zî 15ê sibata 1925î de hêrişê provakasyonî amebi kerdene. Yanî hêrişê qirkerdişî 100 serran hê xo pey de verdenê.

Têgêrayîşê ma 1973 de serkêşîya Rayber Apoyî de vera qirkerdişê kurdan xo rêxistin kerd, 1975 de bi partîye û 1984 de dest pê gerîlatîye kerd.

Serranê 1980an û 90an de dewleta tirke bi destekê NATO, hêzanê mîyanneteweyîyan û herêmîyan kerd ke têgêrayîşê ma tasfîye bikera û Rayber Apoyî îmha bikera. Dewleta tirke bi destekê Amerîka, PDK û hêzanê bînan 90an de Başûr de vera ma operasyonê pîlî kerdî.  1998 de înan raşta raşte Rayber Apo kerd hedef. Rayber Apo bi zorî Sûrîye ra ame vetene. Dima erşawîya Yunanîstanî, Rûsya ûsn. Tewr peyên Rayber Apo Kenya de bi komployî ame esîrkerdene. 

La Rayber Apoyî dewleta tirke, komplogerî û komplo teşhîr kerdî.  Rayber Apo proses hol analîz kerd. Dewleta tirke ê mîyanî de plan kerdêne ke Rayber Apoyî biremna û îmha bikera. La seba Rayber Apoyî çalakîyê fedayî yê pîlî ameyî kerdene. Dewleta tirke waştêne Rayber Apoyî îdam bikera la wina nêbîye. Wayîrvejîyayîşê şarî verê ney girewt.

Sîstemê Îmraliyî bi xo dewamê komployî yo. Dewleta tirke û hêzanê komplogeran vatêne qey esaretê Rayber Apoyî xoverdayîşê ey do asteng bikero. Her kes xoverdayîşê Îmraliyî nemumkîn dî. La şarê ma û têgêrayîşê ma tim paştî daye Rayberîye. 

Komployî ra dima hêzanê komplogeran Erdogan û AKP ardî hukmatê Tirkîya ke Îmraliyî îdare bikerê. Axir Rayber Apoyî pêro hêrişî şiknayî. Rayber Apoyî Îmrali de sîstemê konfederalîzmê demokratîkî aferna û paradîgmaya neteweya demokratîke ber arde. Rayber Apoyî bi nê hawayî şorişê pîlî kerdî.

2009 de seke Rayber Apoyî vatbi darbeyêke ameye kerdene û Partîya Komelê Demokratîkî qefilîyaye. 2010-2012 de prosesê şerî bi. 2013-2015 de Prosesê Çareserîye qewimîya la AKPyî dima ancî dest pê hêrişan kerd. 2015 de Planê Çokdayîşî ame amadekerdene. Îşte Rayber Apoyî nê 25 serran de rixmê hende hêrişan zî têkoşîn kerd.

Seke zanîyeno dostanê ma Hemleya Azadîya Rayber Apoyî 74 merkezanê dinya de 10ê teşrîna verêne de îlan kerdbî. Ma serrgêra 25ine ya hemle bingeyê ney de pêşwazî kenê. Seba azadîya Rayber Apoyî nika xeylêk çalakî û aktîvîteyî yenê kerdene. 17ê sibate de Koln de rayraşîyayîşo merkezî est o. Şarê ma do bi xurtî tewrê nê rayraşîyayîşî bibo û îradeyê xo bimojno. Gerîlayan zî bi çalakîyanê xurtan eşkera kerd ke çew nêeşkeno Rayber Apo îmha bikero.

Sîstemê tecrîd û îşkenceyî yê Îmraliyî sîstemêko winayên o ke tede bi hawayêkê merkezî şexsê Rayber Apoyî de hêrişê qirkerdişî yê vera kurdan yenê plankerdene.  A raşte dewleta tirke Îmraliyî îdare nêkena, gardîyanîya ci kena. Hêzê komplogerî Îmraliyî îdare kenê. Kokê qirkerdişê kurdan Îmrali de yo. Çunke Rayber Apo îfadeya azadîya kurdan o. Ganî komelê kurdan û hêzê şorişgêr û demokratîjî hêrişanê îmha yê vera Rayber Apoyî zerrî ra hîs bikerê.''

Hînî armancê sîstemê tecrîdî û komployî pêro deşîfre bîyî. Eke no sîstem hîna zaf dewam bikero netîceyê ci seba dewleta tirke do giran bibê. Ganî ma serrgêra 25ine de newe ra komployî biercnê. Serra 26ine de ganî ma bi xurtî xo ver bidê, na serre bikerê serra azadîya Rayber Apoyî.''