Endamê Komîteya Rayberdişî ya PKKyî Duran Kalkanî Medya Haber TV de derheqê tecrîdê Îmraliyî, Hemleya 15ê Tebaxe û xoverdayîşê gerîlayan de qisey kerd.

Qiseykerdişê Duran Kalkanî ra tay noqtayê girîngî wina yê:

''Sîstemê Îmraliyî sîstemê tecrîd, îşkence û qirkerdişî yo. Dewleta tirke binê nameyê cezayanê dîsîplînî de tecrîdî kena giranêr, verê pêvînayîşan gêna. Teyna dewleta tirke ney CPT, Konseya Ewropa û hêzê mîyanneteweyî yê bînî zî verê nê tecrîdî de bêveng ê coka hemkarê ci yê. Hetê bînî ra têkoşînê seba azadîya Rayber Apoyî zî dinya ra vila beno. Pêro merdimatîye wazena vengê Rayber Apoyî bieşnawa. Reyna her parçeyê Kurdîstanî de zî şarê ma seba azadîya Rayber Apoyî payan ser de yo. Ganî çalakîyê seba azadîya Rayber Apoyî bibê zêdeyêr.

Ewro bingeyê pêro meseleyan de meseleya kurdan est a. Rayber Apo eşkeno meseleya kurdan cade çareser bikero. La 29 mengî yo ey ra xeberêke zî nêna girewtene. Heta ke Rayber Apo azad nêbo ganî ma nêronişê. Ez nameyê partîye ser o venga pêro şarê ma, cinîyan, ciwanan, dostanê ma û her kesî dana ke hîna zaf tewrê nê têkoşînî bibê û bi metodanê afernayoxan têkoşînî pîlêr bikerê.

Fermanê 3yê Tebaxa 2014î 9 serrî xo pey de verdayî. Bi wesîleya serrgêra fermanî Bexdad de konferansê Şingalî ame kerdene û tede ame waştene ke wa PDK hemkarîya nê qirkerdişî ra bêro muhakemekerdene. No waştişêko zaf girîng o. PDKyî hemkarîya qirkerdişê DAÎŞî yê vera êzidîyan kerde. PDK wextê hêrişanê DAÎŞî de Şingalî ra rema çunke înan DAÎŞ de pêkerd. PDKyî qetî vera DAÎŞî şer nêkerd. Ewro vera Şingalî hêrişî dewam kenê ke nê hêrişî hetê PDK û dewleta tirke ra yenê kerdene. Oyo ke DAÎŞî kerdo ewro PDK û dewleta tirke kenê. 

Ma serrgêra 39. ya Hemleya 15ê Tebaxa 1984î de yê. Ez Roşanê Gandarbîyayîşî yê 15ê Tebaxe fîraz kena. 39 serrî yo gerîlayî bêmabên xeta Egîd û Zîlanan de û xeta Apogîran de şer kenê. Ma nê 39 serran de qasê 50 hezar şehîdî dayî. Ez pêro şehîdanê ma bi rêz û minetî yad kena. Ewro bingeyê pêro qewimîyayîşanê Kurdîstanî de Hemleya 15ê Tebaxe est a.

39 serrî verî rejîmê Darbeya 12ê Êlule bi hawayêkê barbarî hêrişê kurdan kerdêne. Vera na kanwazîya barbare têkoşînê gerîlayan dîya destpêkerdene. Ewro pêro dinya de xoverdayîşê ma yê gerîlayan raştê eleqeyêkê pîlî yeno. 

Ma 15ê tebaxa 1984î de senî bi fedakarî û cesaretî şîyî serê faşîzmî, nika zî bi pîlkerdişê fedayîtî şinê. 15ê tebaxa 1984î ra nata tim ê vanê 'ma hê gerîlayan qedînenê, qedînayê.' La çew zî nêeşka. Gerîlayê Kurdîstanî ewro her ca de payan ser de yê. Ewro sere de Zap, Avaşîn, Metîna de pêro Kurdîstanî de xoverdayîşê gerîlayan dewam keno. 

Ewro koyan de gerîlayê HPG û yJA-Starî bi ruhê 15ê Tebaxe îsbat kenê ke çew nêeşkeno înan bin bivisnê. Êyê ke 1984 de nêeşkayê 200-250 gerîlayan bin bivisnê, ewro qetî nêeşkenê. Ma do serra 40. ya Hemleya 15ê Tebaxe de têkoşîno ke qasê bedelê 39 serran o, do bikerê. 

Ewro PDKyî ra nêbîyêne dewleta tirke nêeşkayêne îşxal de hende aver şora. Lozan de konferansê serra 100. ya Peymana Lozanî ame kerdene la PDK tewrê ey zî nêbîyo. PDK ho Xakurkê de, Metîna de leşkeranê artêşa tirke rê kilavuzîye keno û xîret keno ke gerîlayan bigêro binê ablûqa. Wa şarê ma na raştîya hol bivîno.''