Endamê Komîteya Rayberdişî ya PKKyî Duran Kalkanî bi wesîleya 1ê Gulane Roşanê Karkeran ANFyî rê qisey kerd û tay ercnayîşî kerdî.

Qiseykerdişê Kalkanî ra beşêk wina yo:

''Nê rojan de ke ma amadekarîya 1ê Gulane kerdêne faşîzmê AKP-MHPyî 17ê nîsane de, hêrişê Zap û Avaşînî kerd. Dewlete 2016 ra nata hêrişê Herêmanê Pawitişî yê Medya kena. Şerî Xakûrkê û Heftanînî de dest pêkerd, dima vilayê Metîna, Zap û Avaşînî bi.  Nê hêrişî merkezî hedef kenê. Dewlete wazena pêro Herêmanê Pawitişî yê Medya çin bikera. Eke PKK qels bibo dore yena PDK, YNK û Rojawanî. 

3 hedefî este; çinkerdişê PKKyî, îşxalê pêro herêmanê kurdan û destvistişê tay erdê ereban. Dewlete û îqtîdarê AKP-MHPyî nê planî ser o şinê. Dewlete kena ke pê paştdayîşê Amerîka, NATO û PDKyî Avaşîn û Zapî bigêra binê kontrolî, gerîlayan çin bikera. No qirkerdiş o. 

Ma rew ra nê hêrişî pawitêne. Serkewtişê ma yê Garê, Zap, Metîna û Avaşînî înan ra nêşîyo. Nê hêrişî plankerde bîyî. Îqtîdarê AKP-MHPyî wazeno binkewtişê xo yê 2021î bizivirno. Coka înan nê hêrişan de pêro îmkanê xo seferberd kerdî. La nê hêrişî hêrişê peynî yê nê îqtîdarî yê. Nê hêrişan de îqtîdar yan do birijîyo yan zî îqtîdarê xo rê dewam bikero. Sey 2021î nika zî Amerîka, NATO, PDK û Tirkîya pîya hêriş kenê. Aseno ke hukmatê Iraqî zî mîyanê nê hêrişan de yo. Hetê taktîk û terzî ra dewlete de tay vurîyayîşî est ê. Mîsal dewlete nika parçe bi paçe hêriş kena. Yanî bi hêzêkê giranî hêrişê cayêkê qijî kena. PDK vano 'Ma paştî nêdanê' la pêşmergeyê PDKyî qereqolanê Tirkîya pawenê, hecedarîyanê înan peyda kenê, leşkerê tirkan binê asayîşê PDKyî de derbazê herême kenê. Axir nê hêrişî do çarenusê îqtîdarê AKP-MHPyî dîyar bikerê.

Tirkîya şerê Ukrayna-Rûsya xo rê vurna kerd firsend. NATO û Amerîka seba ke Tirkîya vera Rûsya vejîya tay tawîzan danê ci, çekanê sey F-16an danê. Xora gerîlayê HPG û YJA-Starî vera nê hêrişan bi çêrî xo ver danê. Seke mi vat ma amadekarîyê xo zî kerdbî. Coka avantajê gerîlayan est ê. Gerîlayî hînî zanenê ke şerê tunelan, tîmanê hereketinan, şerê bin û serê erdî bikerê. Xoverdayîşê gerîlayan ra ê nêeşkayî helîkopteran ra leşkeranê xo bîyarê war.Vînîbîyayîşê artêşa tirke zî hende zaf ê ke nêeşkenê binimnê. Gerîlayî qetî do vera îxanet û îşxalî ser bikewê.

PDKyî verî ra nata wina hemkarîya dişmenî kerdêne. PKKyî rîyê înan o raştikên vet werte. PDK têgêrayîşêkê eşîran o. Kerdişanê PDKyî ra dewleta tirke Başûr girewt binê kontrolê xo. Hînî çîyo sey Başûrê Kurdîstanî çin o. PDK û dewleta tirke pîya qeçaxçîtîya petrolî kenê, bazirganîye kenê. Keyeyê Barzanîyan Başûrî sey kolonyalê xo şuxilnenê. Na hemkarîya PDK- dewleta tirke pêro çimeyanê Başûrî diznena. Ganî şar û komelê Başûrî ney bivînê. Biradostî ra heta Heftanînî pêro herême ameye rotene bi Tirkîya. 

Îxtîmalêko qij o la eke dewleta tirke nê şerî de ser bikewa yanî eke PKK bin bikewo dore yena têgêrayîşanê bînan ê kurdan. Sere de PDK dewleta tirke netîceya nê îxtîmalî de pêro hêzanê kurdan hedef bikera. Erdogan xora duştê statuyê Başûrî yo. Yanî şero ke vera PKKyî yeno kerdene a raşte vera pêro kurdan şerê qirkerdişî yo. Eke PKK bin bikewo pêro destkewteyê kurdan do bêrê çinkerdene. Tewr zaf zî Başûr û Rojawan do ney ra zerar bivînê. Seke ma vatbi dima zî do dore bêra ereban. 

Qetî ma do nê şerî de ser bikewê. 2008 de zî ma ê Zap de bin kerdbî. Eke nê hêrişî Zap û Avaşîn de bin bikewê, rejîmo faşîst ê AKP-MHPyî do birijîyo, demokrasî do bêra Tirkîya û Konfederalîzmê Dinya do bêro ronayene. No şer seba înan şerê merg-mendişî yo. Seba ma zî wina yo. Eke nê şerî de gerîlayî ser bikewê do pêro dinya demokratîk biba. 

Wextê hêrişanê 17ê nîsane de artêşa Iraqî zî hêrişê Şingalî kerd. Nê hêrişî paralel ê. Erdogan û hukmatê Iraqî pîya têgêrenê. DAÎŞî verî hêrişê Şingal û Mexmûrî kerdbi û nê hêrişî ameybî şiknayene. La nika Şingal û Mexmûr binê abluka de yê. Seke qesasê DAÎŞî yeno girewtene. Ganî êzidîyî xo îdare bikerê, bibê xoser.  Ganî şarê Başûrî û Iraqî û sîyasetmedarî hêrişanê vera Şingalî vindarnê.  PKK tim do hetê şarê Şingalî de bibo. Hêrişê vera Şingalî hêrişê vera PKKyî yê.

Kurdî se kenê wa bikerê la ganî hêrişanê vera Zap û Avaşînî de ser bikewê. Azadî û estbîyayîşê kurdan pabesteyê nê şerî yê. No şer her kesî eleqedar keno. Ganî pêro gerîlayî nê şerî de bi înîsîyatîfêkê berzî têbigêrê, fermanan mepawê û çi hewce keno Zap de bikerê. Xora şer têna Zap û Avaşîn de nîyo. Ganî gerîlayî her ca de vera hêrişan xo ver bidê. Ganî her ca bibo warê xoverdayîşî. Ganî gerîlayî bi nê ruh û hişmendî têbigêrê.

Têna gerîlayî nê ganî pêro şarê kurdî her ca de têkoşîn bikerê, faşîzmê AKP-MHPyî şehîr bikero. Ganî pêro kurdî paştî bidê xoverdayîşê gerîlayan. Bi taybetî wa ciwanê kurdî erkanê xo bîyarê ca. Ganî ciwanî her ca de çalakîyan bikerê, tewrê gerîlayan bibê û derban bidê AKP-MHPyî ro. Roşnvîr, hunermend, nuştox, sîyasetmedarî wa vera îxanet û îşxalî yew bibê, şarî reyde têkoşîn bikerê. Bi taybetî tewirê şarê Başûrî zaf girîng o. Cinî, ciwanî û şarê Tirkîya û hêzê şorişgêr-demokratîkî zî wa nê prosesî de vera îşxalî têbigêrê. Bi taybetî waranê 1ê Gulane de tewirê vera şerî bêro mojnayene. Ganî şar, roşnvîr, sîyasetmedar, hunermend, cinî û ciwanê ereb û farsî zî vera dewleta tirke wurzê payan ser û paştî bidê kurdan. 

Sibata 2008î de Yaşar Buyukanit û Îlker Başbugî zî hêrişê Zapî kerdbi. La bin kewtî. AKP nê binkewtişî ra dima bi îqtîdar. Erdogan zî ho rêçê înan de şino. Şerê Zapî şero peyên o. Faşîzmê AKP-MHPyî do Zap de birijîyo. Peynîya Erdoganî do biba sey peynîya Başbug û Buyukanitî.  Gerîlayî do Zap de ser bikewê, Kurdîstanê Azadî û Tirkîyaya demokratîke awan bikerê. Nê esasî ser o ez venga her kesî dana ke wa mesuldarîya xo bîyaro ca. Serkewtiş do bibo ê ma.''