Endamê Komîteya Rayberdişî ya PKKyî Duran Kalkanî bi wesîleya serrgêra 47ine ya ronîyayîşê PKKyî ANFyî rê roportajêk da.

Qismê peyênî yê roportajê Kalkanî ra tay noqtayê girîngî wina yê:

''Wexto ke fikrê Apogîrî vila bîyêne hetê bînî ra faşîzm, teror, zulm û tedaya dewlete zî zêdîyayêne. Seke ma vatbi PKK têgêrayîşanê bînan ra cîya bibi. Çunke PKKyî zanayêne ke bê çekan çew nêeşkayêne vera nê kerdişanê dewlete xo ver bido. Rayber Apo dişmen hol ercna, awanîya sîstemê şerî ya dewlete hol fam kerde û xo bi ferasetê gerîlatîye perwerde kerd. Darbeya 12ê Êlule ra dima zî 15ê Tebaxa 1984î de şerê gerîlatîye dîya destpêkerdnee. 

Rayber Apoyî teorîya gerîlatîye goreyê raştîyanê Kurdîstanî dîzayn kerde. PKK de sey ê bînan ferasetê dewletronîyayîşî çin bi. PKKyî gerîlatîya xo de zî cuya kolektîfe kerde esas. Gerîlayanê ma qetî xo xeta leşkerîye de rêxistin nêkerd. Gerîlayê ma hêzê pratîk û çalakîyan ê. Gerîlayê HRK, ARGK, HPGyî tim wina bîyî. Xora ê rojan ra heta nê rojan gerîlayî vurîyayî zî. Ewro gerîlayî hêzê tewr xurtî yê modernîteya demokratîke yê. 

Gerîlayî vera-vera bîyî hêzê mîyanê komelî. Çalakîya TUSAŞî zî asta tewr pîle de mojna ke hêzê gerîlayan milîtanîya partîye yê û cewherê ci hêzê xo yê. Dewleta tirke rixmê hendê hêzê xo û destekê NATO, Rûsya ûsn. zî nêeşkaye çalakîkeranê TUSAŞî vindarna. Çalakîya TUSAŞî mojna ke gerîlayê ke xeta Apogîre de rêxistin benê, fekadarîye kenê û milîtanîye mojnenê nênê astengkerdene.

Ma tim vanê 'xopawitiş.' Ganî ti bieşka xo bipawa. Hema zî her kes çalakîya TUSAŞî nîqaş keno. Ganî dewlete û îqtîdar na çalakîye ra dersan bigêrê. Wa mevajê ke 'ma eşkenê bi rehetî bidê kurdan ro.' Eke dewlete wina bikera do derbe biwera û fam nêkera ke derbe çara ameya.

PKK partîya cinîyan a û ciwanan a. PKK hema destpêkî ra nata hêzê xo nînan ra gêno. Cinî û ciwanî parçeyê PKKyî nîyê serkêşê PKKyî yê. Seba PKKyî azadîya cinîyan xeta tewr girîng a. Hetê bînî ra kadroyê PKKyî yê esîlî ciwan ê. Nê sebeban ra dewlete zî tewr zaf cinî û ciwanan kena hedef ke şexsê nînan de PKKyî biqedîna. Ganî ma nê raştîyan bizanê û hîna bi aktîfî tewrê têkoşînî bibê. Ganî ciwan û cinîyî lome nêkerê. Dewlete lome ra fam nêkena. Wa cinî û ciwanî verê xo bidê refanê PKKyî, xo rêxistin bikerê û bi aktîfî tewrê têkoşînî bibê.

Her ke fikrê Rayber Apoyî vilayê dinya bi PKK zî bi partîyêka enternasyonale. Hemleya Azadîye ya Globale, Şorişê Rojawanî û Şorişê Jin, Jiyan, Azadî dinya rê tesîr kerd û fikrê Rayber Apoyî hîna vila kerdî. Ewro çareserîya pêro meseleyan Konfederalîzmê Demokratîkî de yena dîyene. Xora PKKyî zî teyna seba şarê kurdî ney seba pêro şaran têkoşîn dabi destpêkerdene.

Kurdîstan merkezê şerê azadîye û demokrasîyî yo. Merkezê Şorişê Cinîyan o. Nika Rojhelatê Mîyanênî de şerê pîlî yenê kerdene û Şerê Dinya yo 3in beno vila. Xora hetêkê nê şeran de Tirkîya zî est a. Naye ra çareserîya meseleya kurdan zaf girîng a. Zaf kesî û hêzî Rayber Apoyî sey serkêşê haştîya dinya pênase kenê. Raşt o Rayber Apo wayîrê hêzêkê winayênî yo. 

Dewlete heta ewro tim kerd ke bi hêrişanê xo Rayberîye, gerîlayan û PKKyî çin bikera. La nêeşkaye. Coka dewlete kewta tengîyêka tûje. PKKyî heta ewro bi fedakarî û cesaretî vera pêro hêrişan xo ver da. Rayber Apoyî û gerîlayan xo ver da. Cinîyan, ciwanan, şarê ma û dostanê ma xo ver da. Emser bingeyê Hemleya Azadîye de seba azadîya Rayber Apoyî û çareserîya meseleya kurdan têkoşînêko xurt ame kerdene. Hinî ma serra 47ine ya PKKyî de ê azadkerdişê Rayber Apoyî û çareserkerdişê meseleya kurdan kenê hedef. Heta nika no têkoşîn bi, hinî resa safhaya caardişî. Ma serra 47ine de her kesî rê serkewtiş wazenê.''