Endamê Komîteya Rayberdişî ya PKKyî Duran Kalkanî rojnameyê Yeni Ozgur Politika rê derheqê prosesê kişîyayîşê Palmeyî de roportaj da. 

Qiseykerdişê Kalkanî ra beşêk wina yo:

''Kişîyayîşê Palmeyî û prosesê peyê kişîyayîşî plankerde yê. Seba ke kurdî û PKK bêrê sûcdarkerdene seba ke vera Têgêrayîşî hêriş bêro kerdene Palme ame kiştene. Têna Swêd de nê her cayê Ewropa de kişîyayîşê Palmeyî ra dima kurdan rê teda ameye kerdene. 

Kişîyayîşê Palmeyî asta globale de ame plankerdene. MÎT, kontragerîlaya Tirkîya û hêzê mîyanneteweyî mesûldarê nê cinîyetî yê. 

Cuntaya Kenan Evrenî Hamleya 15ê Tebaxe sey 'hîre-çar eşqîyayan' pênase kerdbi. Serra 1984î de Kenan Evrenî hêrişê nê 3-4 eşqîyayan kerd. La ser nêkewt. O çax gerîlayan xeylêk çalakîyî kerdî, heta vera konvoyê Evrenî yo ke amebi Şemzînan çalakîyêke amebî kerdene. Na çalakîye de pawitoxê Evrenî kişîyayî. Naye ra dima dewleta tirke mesele berde destê NATOyî. Waşt ke NATO madeya ke vana hêrişê vera endamêkê NATOyî sey hêrişê vera NATOyî yo, bîyaro ca. NATOyî zî no qebul kerd.

Serra 1985î ra dima şerê vera PKKyî tim hetê NATOyî ra ame caardene. Pêro kerdişê TCyî hetê NATOyî ra ameyî tesdîqkerdene. NATOyî vera PKKyî şerêko taybet ard ca. Nê xora zaf tesîrê Têgêrayîşê ma kerd. Dima zî 28ê sibata 1986î de Palme kişîya. Bira kişîyayîşê Palmeyî nê prosesî de ameye dayene. Hezîrana 1986î de dewletanê Ewropa, dewletanê îstîxbaratî pêro kombîyayîşêko hempar kerd, meseleya PKKyî ercnaye û vera PKKyî tehqîqato hempar da destpêkerdene. Derheqê PKKyî de zanayîşî kom bîyî û dîyayî Almanya. Dewleta Almanya zî dest pê dewaya Dusseldorfî kerd.

Sibata 1988î ra pey zî prosesê tepiştişê îdarekaranê PKKyî dest pêkerd. Tay hêzan xebere daye ma ke îdarekarê ma do bêrê tepiştene. Dewaya Dusseldorfî tesadufî nîya. Proses pê suîkastê Papayî dest pêkerd. Serra 1985î de zî Hamleya 15ê Tebaxe ra dima NATO kewt dewre. Palme kişîya. Dewaya Dusseldorfî ra dima zî prosesê tepiştişî dest pêkerd. 1998î ra heta 1999î nêverda ke Rayber Apo şoro Ewropa. Rayber Apo Roma ra ame vetene ke nê prosesî vetişê Rayberî de rolêk kay kerd. Almanya û Fransa berê xo Rayber Apoyî rê racayî. Bahaneya înan zî kişîyayîşê Palmeyî bîye.

Komplo hema zî nê esasî ser o dewam kena. Bahaneya Komploya Mîyanneteweyîye bahaneya xo kişîyayîşê Pameyî ra girewte. Coka ganî ma pê uzrwaştişî qîm nêkerê. Ganî Komploya Mîyanneteweyîye werte ra bêra wedaritene, sîstemê tecrîd û îşkenceyî yê Îmraliyî bêro wedaritene. Ganî seba azadîya Rayber Apoyî şert û mercî bêrê caardene. Zerarî ancax bi nê hawayî yenê tazmînkerdene.''