Endamê Komîteya Rayberdişî ya PKKyî Duran Kalkanî cewab da persanê Medya Haber TVyî û rojdem ercna.

Qiseykerdişê Kalkanî ra beşêk wina yo:

''Ma hê dekewenê serra 23. ya Komployê 9ê Teşrîna Verêne ya 1998î û serra 22. ya Komployê 15ê Sibate. Ê kesanê ke waştêne kurdan qir bikerê, Kurdîstan parçe bikerê, hîşmendîya verêne do dewam bikerê Komplo ard ca. Eke Komplo nêameyêne kerdene û Rayber Apo azad bibîyêne nika meseleya kurdan rewî ra çareser bibi û kurdî eşkayêne bibê komelêkê azadî. Tirkîya zî do bibîyêne demokratîk. Ewro Tirkîya de qirkerdişê vera kurdan tirkan rê zî yeno ferzkerdene.

Pê komployî verê nê qewimîyayîşan ame girewtene. Komplo vera azadîye û demokrasî hêriş bi.A raşte komployî armanc kerdêne ke bingeyê îmhaya Rayber Apoyî de PKK û Têgêrayîşê Azadîye yê Kurdan tasfîye bikero û kurdan bi temamî qir bikero.

Ganî bêro cigêrayene ke nê 22 serran de kamî çendêk pere qezenç kerdi Kurdîstan, Tirkîya û Rojhelatê Mîyanênî de bazarîyê senînî ameyî kerdene. Komplo bîlasebeb nêbi. Tay kesan nê komployî ra zaf çi qezenç kerd.

Komployê 9ê Teşrîna Verêne ya 1998î û 15ê Sibata 1999î çarçewa planêkî de ameyî kerdene. Bira Komployî hetê Serekê Amerîka yê ê çaxî Bill Clintonî ra yanî hetê Amerîka ra dîyaye. Rayber Apoyî Amerîka ra çîyêko xirab zî nêkerdbi. Amerîka û Bill Clintonî ganî hesabê nê kerdişê xo bidê. Amerîka derheqê mi û tay embazan de zî tay birî dayî. La heman Amerîka ewro kurdan wesifnena û vana kurdan, cinîyan ê kurdan vera DAÎŞî şerêko pîl kerd.

Ewropa zî Komplo de rolêk girewt xo mil.Rayber Apoyî pê Ewropa bawer kerd, şi Roma, Yewîya Ewropa rê vat ke wa meseleya kurdan bêra çareserkerdene. Almanya, Fransa û Îtalya pêro Komployî ra mesuldar ê. Înan paştî daye Amerîka. Hetê bînî ra Rûsya, Yunanîstan û Kenya zî Rayber Apoyî ser o bazarîye kerde. Reyna Misir, Sûrîye, Iraq nînan zî komplo de rolê xirabî kay kerdî.

Ma eşkenê sere de PDK û YNK pêro sîyasetê kurdan zî heman çi vajê. 22 serran ra nata nînan ne derheqê tecrîdî de ne de derheqê Komployî de çîyêk nêvato.

Ê ma zî kêmasî û xeletîyê ma estê. Zereyê ma de zî tasfîyekerî estbî. Rayber Apoyî zî 'embazîya kême' rexne kerdbi.

23 serran ra nata Rayber Apo, şar û têgêrayîşê ma têkoşîn keno. Heta nika z3i pêro plansazîyê komplogerana ameyî pûçkerdene. Komployî waştêne Rayber Apo îmha bikero, Têgêrayîşê Azadîye tasfîye bikero û kurdan qir bikero. La komplo ser nêkewt. Înan waştêne Rayber Apo berê Şam û Atîna û Dengizê Sipî de bido ey ro. La Rayber Apoyî sey vateyê înan nêkerd. Dima înan Rayber Apo berd Roma û uca de ci rê teda ameye kerdene. Dima Rayber Apo ame berdene bi Moskova, Yunanîstan, Kenya û uca ra zî Îmrali.

Înan vatêne qey eke ê Rayber Apo çin bikerê PKK zî do mîyanê 6 mengan de biqedo. La nê planan ser o 22 serrî vîyartî. Komplo senî ame çinkerdene werte de yo. 15ê Sibate ra dima Têgêrayîşê ma zêdêr wayîrê Rayber Apoyî vejîya.

Hukmatê Ecevît-Bahçelî-Yilmazî xîret kerd ke Îmrali de Rayber Apo pûç bikerê. La Rayber Apoyî Îmrali de tim xo ver da û fikrê neweyî pêşkêş kerdî. Ey verê PKK û kurdan akerd, pêro hesabê komplogeran pûç kerdî.

Ecevîtî ra dima hukmatê AKPyî rê no wezîfe ame dayene. La Rayber Apoyî o çaxî zî paradîgmaya konfederalîzmê demokratîkî ronaye û bi nê hawayî reyna Komplo kerd pûç. Hukmatê AKPyî vera ma 24ê temmuza 2015î ra nata şerê topyekunî yê qirkerî keno. Dîktatorîya AKP-MHPyî pê paştdayîşê komplogeran, NATO û Amerîka vera PKK, Rayber Apo û kurdan şer keno. Ma zî vera ney xo ver danê.

22 serran de kurdî bi des hezaran şehîdî dayî, bedelî dayî. La nê bîlasebeb nêbî. Kurdan reyna kayê komplogeran kerdî pûç. Vakur de xoverdayîş dewam keno, Başûr wayîrê statuyî yo, Şorişê Rojawanî ame caardene. Rojhelatê Kurdîstanî zî binê tesîrê nê qewimîyayîşan de yo.

Ewro pêro dinya, kedkar, cinî, ciwan û şorişgêrê globalî wayîrê Rayber Apoyî vejîyenê seba azadîya ey kampanyayan virazenê.

Ma sey Têgêrayîşê Azadîye pê Hemleya 'Wextê Azadîye' dekewenê serra 23. ya komployî. Ma do na serre pê hemleya xo bikera serra azadîye. Ma nika pêro dinya de payan ser o yê. Gerîla, cinî, ciwanê kurdî, dîaspora û pêro dinya hemle aver benê. Komloyo Mîyanneteweyî serra 23. ya sîstemê Îmraliyî de do bêro rijnayene û verê azadîya Ocalanî do bêro akerdene. Nika her çi pabesteyê azadîya Rayber Apoyî yo. Ma pê bawer ê ke na hemle ma do ser bikewê û ma do Rayber Apo azad bikerê.

Ewro na hemleya ma tesîrê her kesî, pêro beşanê komelî keno. Ewro ma Xoverdayîşê Zanîngehê Bogaziçi de dî ke pêro beşê komelî paştî danê ci. Çunke hînî her kes AKP-MHPyî ra acîz bîyo û zaneno ke no îqtîdar hînî qels o. No xoverdayîş têna vera rektorê qeyûmî nîyo, no xoverdayîş vera tecrîd û faşîzmê AKP-MHPyî yo.

Gerîlayî ewro her ca xo ver danê. Têgêrayîş û çalakîyê gerîlayan dewlete tersnenê. Ê şîyî Iraq, Hewlêr, Almanya, Îran, Rûsya ke ver bigêrê înan. Na dîplomasî armanc kena ke vera gerîlayan hêzêk awan bikera, gerîlayan û paştdayîşê seba gerîlayan asteng bikera. Hukmatê AKP-MHPyî pêro îmkanê xo vera gerîlayan xebitneno.

Ê hem vanê 'gerîlayî qedîyayî, tay mendî' hem zî Dêrsimî ra heta Colemêrg pêro waran qedexe kenê. Çunke nê cayan de gerîlayî estê. Eke şima gerîlayî qedînayî şima çira verê berê HDPyî de hende cinîyan nişnenê ro?

Gerîlayî şer kenê û do bikerê. Embazê ma do zêdêr tewrê hemle bibê, Kurdîstanê azadî awan bikerê û serkewtişanê pîlan bîyarê ca. Gerîlayî do pêro nê çîyan rê ratberîye bikerê. Xora gerîlayî seba naye wayîrê formasyon, hîşmendî, rêxistine û perwerdeyê qîmî yê. Seba çêrî û fedakarîya gerîlayan ma nêeşkenê çîyêk vajê. Ez ê pêroyînan rê serkewtiş wazenê. Ê vera komployî bîyî rayberê şerî. Gerîlayî serra 23. ya komployî de do rayberîya xo xeta serkewtişî de bîyarê ca.