Beşê 3. yê roportajê rojnameyê Yeni Ozgur Politika de Endama Komîteya Rayberdişî ya PKKyî Duran Kalkanî derheqê serrgêra 36. ya Hamleya 15ê Tebaxe de qisey kerd.

Qiseykerdişê Duran Kalkanî ra beşêk wina yo:

''Xeta îdareyê 15ê Tebaxe girîng a, xeta Egîd û Zîlane girîng a. Nê xetî temsîlîyetê xeta Rayber Apoyî de şerê gerîlayan de xo mojnenê. Hamleya 15ê Tebaxe de hem xeta şerî hem zî xeta îdareyî estbî ke nê xetî şerê gerîlayan ê ewroyênî vet meydan. Dişmenî bi serran zaf xîret kerd ke na xete biherimno, pûç bikero û tasfîye bikero.

Coka ganî xeta Egîd û Zîlane hol bêra famkerdene. Çunke na xete ewro zî ma rê serkewtiş ana û ma na xete ser o şer kenê. Îqtîdarê AKP-MHPyî hetê zulmî ra cuntaya 12ê Êlule ra wetêr o. Senî ke vera cuntaya 12ê Êlule na xete de xoverdayîş ame kerdene ganî vera nê îqtîdarî zî na xete ser o xoverdayîş bêro kerdene.

Cinîyan zî bi xeta fedayîtîye ya 30ê Hezîrane gerîlatî, xoverdayoxî aver berdî û xeta Egîd û Zîlane kerde temam. Ganî kesayetê Zîlane û Egîdî hol bêrê famkerdene, îradeyê înan û hîşmendîya înan bêrê ercnayene.

Kesayetê Egîdî cîya bi. Ey tim meseleyî çareser kerdêne, heqê zor û zehmetîyan ra ameyêne. Egîd sey xo tênêgêrayêne tim xîret kerdêne ke bimuso, fam bikero, biwano û cigêrayîş bikero. Heman wextî de ey xîret kerdêne ke merdiman perwerde bikero û çîyêk bimusno înan. Zaf qisey nêkerdêne la xo weş îfade kerdêne. Îdarekerdişê Egîdî îdarekerdişê karî bi. Embaz Egîd qet dişmenî reyde nêşî, tim vera dişmenî şi. Nêkewt binê kontrolê dişmenî. Xeta Hamleya 15ê Tebaxe zî xeta embaz Egîdî zî tim wina bîye. Ganî her kes na xete weş fam bikero. Çunke naye ra berî xetêka şerwanîya azadîye çin a.

Embaz Egîd aslê xo de farqînij bi dima înan keyeyê xo bar kerdo Êlih. Wexto ke o lîse de wendekar bi embaz Mazlûm şinasneno. Ey zî embaz Mazlûmî reyde Êlih de şorişgêrî kerd, vera faşîstan şer kerd. Dima şi û tewrê têkoşînê Sêwrege bi û şi teberê welatî. 79-80 de Lubnan û Filîstîn de kampan de perwerdeyê gerîlatîye dî. Gulana 80î de agêra Kurdîstan û Botanî ra derbazê warê Sêrtî bi. O û embaz Kemal Pîr seba îdareyê xoverdayîşî ameybî wezîfedarkerdene. La heyf ke tebaxa 80î de Kemal Pîr ame tepiştene û Egîd zî sey birîndar xelisîya. Wextêkê dergî embaz Egîdî tedawî dî. Xora o çax Darbeya 12ê Êlule zî bîye. Darbe ra dima reyna 80-81 de kampanê Filîstîn û Lubnanî de mend. Temmuza 1981î de tewrê Konferansê 1. bi. Egîd û embaz Mehmet Karasungur seba amadekarîya gerîlatîye Başûr û Rojhelat de ameyî wezîfedarkerdene. Serra 82î de embaz Egîd Lolan de tewrê kombîyayîşê îdarî û plansazî bi.

Dişmen reya verêne 25ê gulane de rojhelatê Xaburî de mudaxeleyê teberî kerd. O çax embaz Egîd zî derbazê Heftanînî bi û uca de kampêke naye ro. Temamîya serra 83î de embaz Egîdî warê gerîlayan ê Botan û Şirnex de gêra. Zimistanê 83-84î de Heftanîn de mend. Wisarê 84î de seba ke Qileban û Şirnex de çalakîyan bikero  wezîfe girewt. Dima sey Fermandarê Yewina Propaganda ya Çekdare ya 14ê Temmuze ame wezîfedarkerdene. 15ê Tebaxa 1984î ra heta 15ê teşrîna peyêne ya 1984î  wina şer kerd. O fermandarê a yewine bi ke Guleyo Verên' eşt. Bi fermanê Rayberîye kanûna 84î de derbazê warê Rayberîye bi.  Rayberîye nîsana 85î de o reyna erşawit welat. Embaz Egîd xoverdayîşê Botanî yê 1985î îdare kerd.

Sey fermandarê HRKyî kanûnê 1985î de derbazê Botanî bi û heta wisarê 86î Gabar de mend. Gabar de vera dişmenî tay çalakîyî kerdî. Embaz Egîd wexto ke grubêke reyde derbazê Heftanînî bîyêne netîceya dafika dişmenî de  şewa 28ê adara 1986î bîye. Dişmenî nê şehadetî ra dima zaf propaganda kerd. Kongreya 3. de Têgêrayîşê ma bi temamî derbazê xeta Fermandar Egîdî bi. Têgêrayîşî bire daye ke Akademîya Mahsum Korkmazî bêra akerdene. Ronayîşê ARGKyî xeta embaz Egîdî ser o bi.

Ez serrgêra 36. ya Hamleya 15ê Tebaxe yê Rayber Apoyî, embazan şarê ma, dostan û gerîlayan fîraz kena. Ez şexsê fermandarê ma yê bêmergî Egîdî de pêro şehîdan bi mînet û hûrmetî yad kena. Ma do serra 37. ya Hamle de xeta Egîdî de bi ruhê 15ê Tebaxe do  xurtêr şer bikerê û ser bikewê. Embaz Egîd tim nê şerî reyde ciwîya. Nê şerî Kurdîstano azad aferna û naye ra pey zî do biaferno. Embaz Egîd û teqîbkerdoxê ci yê şehîdî tim nê Kurdîstanê azadî de do biciwîyê.''