Hemşaredarê HDPyî ya Colemêrgî Cîhan Karamano ke herinda ci de qeyûm amebi tayînkerdene cinîya ci Perîhane Karaman 2021 de 'endamî û propagandaya rêxistine' ra tepişîyabî û ci rê cezaya zîndanî ya 7 serran dîyabî. Karamane verî erşawîyaye Zîndanê Wanî la dima surgunê Amedî ameye kerdene.

Hemşaredar Cîhan Karamanî pare kerd ke cinîya ci wextêko derg mîyanê rêxistinanê HDPyî de cagirewto û vat: ''Embazê ma pê dosyayanê sexteyan tepişîyenê. Cinîya mi zî pê delîlanê sexteyan û şahidanê sexteyan tepişîyaye û di mengan ra dima bêxebera ma surgunê Zîndanê Amedî ameye kerdene. Dewlete bi surgunkerdişê tepişteyan armanc kena ke keyeyî têkoşînî ra dûrî vinderê, bitersê û hetê ekonomîkî ra zehmetîyan biancê. La dewlete do armancê xo de ser nêkewa. Şertî se benê wa bibê, ê do nêeşkê hêvîya ma ya azadîye bişiknê.''

Karamanî ard ziwan ke îqtîdar pê polîtîkaya surgunkerdişî do nêeşko bireso armancanê xo û vat: ''Heta ke têkoşîn est bo tepiştiş û surgun zî do est bê. Heta ke komara demokratîke bêra awankerdene têkoşîn zî do dewam bikero. Bi na wesîle ez venga şarê ma dana ke mîyanê partîya ma de cabigêro û têkoşîn bikero.''