Endamê Konseya Rayberdişî ya KCKyî Mustafa Karasuyî bernameyêkê Medya TVyî de rojdem ercna. 

Qiseykerdişê Karasuyî ra beşêk wina yo:

''Ez embaz Sînan Dêrsim bi rêzdarî û minetî yad kena. O endamêko girîng ê partîya ma bi û hem Tirkîya hem zî Ewropa de xeylêk xebatî kerdî. Ey tim xeta rayberîye û partî temsîl kerde. Têkoşînê ey do hetê ciwan û cinîyan ra bidîyo dewamkerdene. Ey seba ke qesasê Terteleyê Dêrsimî bigêro têkoşîn kerd. Hesreta ey do bêra caardene, Kurdîstan do bêro azadkerdene, qesasê Terteleyê Dêrsimî do bêro girewtene. Dêrsim do bêro azadkerdene.

Zîndanê Îmraliyî de sîstemê qirkerdişî esto. Yewîya Ewropa û Parlamentoya Ewropa ney anê ca, dewleta tirke zî gardîyanîya zîndanî kena. Coka wexto ke Qanûnê Mehkemeya Bingeyî tecrîd sey binpaykerdişê heqanê merdiman nêdî ganî çew şaş nêbo. Şexsê Rayberîye de bi nê hawayî dewleta tirke nêzdîyê kurdan bena. 

Hemleya 'Wextê Azadîye' Newroze, 8ê Adare û Serkewtişê Garê de bi serfîrazî ameye caardene. Şarê kurdî bi nê hawayî wayîrê Rayberîye vejîya. 

Xoverdayîşê zîndanan seba ma zaf girîng o. Bi des hezaran tepişteyî bi serran o zîndan de xo ver danê. Xoverdayîşê gerîlayan û tepişteyan ma resna na aste. Hemleya Wextê Azadîye do aver şora. Her çiqas hêrişanê îşxalî yê dewleta tirke newe ra dest pêkerdbi zî  xoverdayîşê gerîlayan do nêro vindarnayene. No şar 100 serrî yo hesreta azadîye yo. 

Hêrişê vera Metîna, Zap, Avaşînî serra 2014î ra nata parçeyê Planê Çinkerdişî yê. Dişmen wazeno îradeyê gerîlayan bişikno û bi nê hawayî qirkerdişê kurdan temam bikero. Dewletê kapîtalîstî seba menfatanê xo nê hêrişan peygoş kenê. 

Ewropa û Amerîka pê bedelê qirkerdişê kurdan wazenê îqtîdarê AKP-MHPyî reyde têkilîyanê xo weşêr bikerê. Tirkîya tawîzî dayî Ewropa û Amerîka û înan zî destûr da hêrişanê Tirkîya. Pêvînayîşê Erdogan û Bidenî ra dima serrgêra Qirkerdişê Armenîyan de nê hêrişan dest pêkerd. Tîya de mesajê 'Ma serra 1915î de armenîyî qir kerdî nika dore ameye şima' esto.

Tasfîyeyê têgêrayîşê ma pê Komployê Mîyanneteweyî dest pêkerd û pê hêrişanê vera Herêmanê Pawitişî yê Medya dewam keno. Nê hêrişî şexsê gerîlayan de vera pêro kurdan yenê kerdene û yenê manaya îşxalê Başûrê Kurdîstanî. Eke îradeyê gerîlayan bêro şiknayene îradeyê başûrijan zî do bêro şiknayene. Tirkîya hema zî peyê Mûsil û Kerkûkî de ya.

Ma serkewtişê Garê ra dima nê hêrişî cara pawitêne. Garê ra dima AKP û dewleta tirke ameyî verê rijîyayîşî. AKPyî seba ke îqtîdarê xo bixelisnê hêrişê Herêmanê Pawitişî yê Medya kerd.

Mabênê Tirkîya, Amerîka û Ewropa de têkilîyê gemarinî estê. Amerîka seba ke têgêrayîşê ma ser o teda rona hîrê embazê ma girewtî mîyanê lîsteya terorî. Amerîka bi nê hawayî paştî dana Tirkîya û qirkerdişê kurdan tesdîq kena.

PDK û partîyê sîyasî yê bînî yê Başûrî vera hêrişanê dewleta tirke tewir nêgênê. Reyna nê hêzî vera tecrîdkerdişê Rayber Apoyî zî tewirêk nêgênê. Eke lîderêko bîn ê kurdan bigêrîyayêne binê tecrîdî PKK verê ci vejîyayêne. PDK babeta hêrişan û tecrîdî de mesuldarîyêke nêgêno xo ser û heta îşxalê dewleta tirke keno meşrû. PKK wextê hêrişanê vera parçeyanê bînan ê Kurdîstanî de tim wayîrê înan vejîya. Ganî şarê kurdî û nê hêzî vera nê hêrişan pê ruhê Newroze têbigêrê û mesuldarîye bigêrê xo milî.

Bi taybetî ganî şarê Başûrî vera nê hêrişan vejîyo meydanan. Çunke nê hêrişî destkewteyanê şarê Başûrî zî hedef kenê. Eke nê îşxalî nêrê vindarnayene dore yena Silêmanî û Hewlêrî zî. Wa şar, roşnvîr, hunermend, nuştoxê Başûrî hedefê îşxalkeran asteng bikerê. Reyna şarê ma yê Vakur, Rojawan, Ewropa zî vera hêrişanê îşxalkeran vejîyê meydanan. 

Gerîlayî vera îşxalan bi hawayêkê fedayî xo ver danê û do bidê. Gerîlayî senî ke Zap de kerd reyna îşxalkeran do tarûmar bikerê. Ganî xoverdayîş sey hêrişan hîra û pîl bibo. Xora têna pê xoverdayîşê gerîlayan netîce nêvisîyan destî.  Têkoşîn do pê serewedaritişê kurdan, dîplomasî, têgêrayîşê cinî û ciwanan binetîce bibo. Ma bi na wesîle xoverdayîşê gerîlayan selam kenê. Eşkera yo ke gerîlayî xeta Rayberîye de nê têkoşînî berê heta peynî. Nê hêrişan ra dima yewîya şar û gerîlayan do bihêzêr biba. 

Ez xoverdayîşê keyeyê Şenyaşarî selam kena. Hêrişê vera nê keyeyî a raşte vera pêro şarê Pirsûsî yeno kerdene. Îbrahîm Halîl Yildiz û dormeyê ci linga Pirsûsî ya kolonyalîstan a. Sere de şarê Pirsûsî ganî pêro kurdîstanijî wayîrê keyeyê Şenyaşarî vejîyê. Xoverdayîşê keyeyê Şenyaşarî bêedaletîya îqtîdarî eşkera kerde û mojna ke peynîya înan nêzdî ya. 

Xoverdayîşê dadî û şarê êzidîyan fîraz o. Eke wextê hêrişanê DAÎŞî de hêzê xopawitişî yê Şingalî bibîyêne hende merdimî nêameyêne qirkerdene. O çax PDK, hukmatê Iraqî hetê Şingalî de nêvindertî remayî. Gerîlayî resayî hewarê şingalijan. Hukmatê Iraqî û PDK nika hêzanê xopawitişî uca ra vejenê. Na neheqî ya. Peynîya peymana serê Şingalî de Neteweyê Yewbîyayeyî, Amerîka, Fransa zî estê.

Şingal de PKK çin o. Raşta zî uac de sempatîzanê Rayber Apoyî estê. Çunke gerîlayan Şingal xelisna. Na sempatî normal a. Êzidîyî wazenê Şingal xoser bibo, hêzê înan ê xopawitişî bibê. Nê waştişî meşrû yê. Iraq ganî rayîrêkê çareserîye bivîno. Têkoşînê şingalijan têkoşîno tewr meşrû yê dinya yo.

Hêrişê Qamişloyî mojnenê ke tay hêzî hema xoserîya Rojawanî qebul nêkerda. Coka Qamişlo de pêkewtişî estê. Dewleta tirke mîyanî ra paştî dana nê pêkewtişan. Ganî hêzê rejîmî cade nê hêrişanê provakatoran ra fek vera bido.

Dewleta tirke xîret kena ke pê bahaneya Korona 1ê Gulane Roşanê Karkeran asteng bikera. La ganî şorişgêr, demokrat, kedkar, cinî û ciwanî her ca de 1ê Gulane fîraz bikerê. Ez 1ê Gulane yê pêro kedkar û karkeran fîraz kena û hêvî kena ke 1ê Gulane azadîye, demokrasî û sosyalîzm nêzdî bikero.''