Endamê Konseya Rayberdişî ya KCKyî Mustafa Karasuyî bernameyêkê taybetî yê Medya Haberî de hêrişê îşxalî yê artêşa tirke û têgêrayîşê PDKyî ercnayî. Qiseykerdişê Karasuyî ra beşêk wina yo:

''Vera Rayber Apoyî tecrîdêko giran yeno kerdene. Wayîrvejîyayîşê Rayber Apoyî, têkoşînê vera tecrîdî têkoşînê vera qirker û kolonyalîstan o. Zere û teber de kurdî wayîrê Rayber Apoyî vejîyenê. 

2 serrî verî PDKyî hêzê xo erşawitbî Zînî Wertê. Ma o çax dabi zaneyene ke no kerdişê PDKyî seba tasfîyeya Têgêrayîşê Azadîye yo.Têkilîyê Amerîka-Tirkîya-PDKyî rojdem bibî. Dima hêrişanê vera Heftanînî dest pêkerd û dewleta tirke dest pê îşxalî kerd. Garê ra dima nika vera Zap, Avaşîn û Metîna seba tasfîyekerdişî hêrişî yenê kerdene. Seba tasfîyeya ma PDK şuxilîyeno.

Şam de 1999 de Amerîka, Îsraîl, Tirkîya pê beşdarîya PDKyî waşt têgêrayîşê ma tasfîye bikerê la têgêrayîşê ma hîna bîyo xurt. Nika no komplo Herêmanê PAwitişî yê Medya de yeno kerdene. No yew konsept o. Çarçewa nê konseptî de rolêk dîya PDKyî, rolêk dîya Tirkîya.PDK xîret keno ke Metîna bigêro binê ablûqa, debikewo mîyanê waranê gerîlayan.  PDK do bibo sindan, dewleta tirke do hêriş bikera biba çakûç. Bi nê hawayî Têgêrayîşê Azadîye do bêro tasfîyekerdene.

Gerîlayan Garê de xo ver da, Heftanîn de xo ver da. La dewleta tirke nêeşkaye ser bikewa. Nika zî artêşa tirke teng bîye, nêeşkena xo bileqna. Gerîlayî her roje derbe danê înan ro. Gerîlayan dormeyê artêşa tirke girewto. Ablûqaya gerîlayan a PDKyî yena a mana ke PDK resa hewarê artêşa tirke. PDK xîret keno ke artêşa tirke bixelisno.  Na rewşêka cidî ya û nêna qebulkerdene.

PDK keno ke artêşa tiirke bixelisno û gerîlayî bîlîyê înan bibê. SÎHAyê dewleta tirke waran tesbît kenê û teyarayê şerî zî danê nê waran ro. Hêzê PDKyî wina yenê waranê ma. Semedo ke pêşmergeyê normalî vera PKKyî şer nêkenê hêzê taybetî yenê waranê ma. No yeno a mana ke PDK kişta dewleta tirke de kewto şer. No nêno qebulkerdene.

Hêzê PDKyî waranê gerîlayan gênê binê ablûqa. Nê waran de tay pêşmergeyî merdî. Ame vatene ke teyarayanê şerî yê dewleta tirke da înan ro. Mumkîn o. Ma hema tedeyîya serebûtî tam nêzanenê. Dewleta tirke wazena nê waran de têna ca biba, a ne gerîlayan ne zî pêşmergeyan wazena. La xora gerîlayî do kampanê xo war nêverdê. 

Nê hêrişî seba îşxal û destsernayîşê erdê Başûrî yê. La PDK dewleta tirke û PKK seyci vîneno û vano 'Wa wirdî zî şorê.' Bi nê hawayî gerîlayan rê teslîmîyet ferz keno. Aya ke dewan vêşnena, veng kena, merdiman kişena dewleta tirke ya. Ê nêeşkenê Tirkîya rê çîyêk vajê. La hêrişê dewleta tirke pê bahaneya PKKyî meşrû kenê. Ne ma ne zî şarê kurdî ney qebul kenê. Nêzdîbîyayîşê PDKyî dewleta tirke rê qirkerdişê kurdan rê xizmet keno.

Hêrişê vera Mexmûrî tesadûfî nîyo. PDK waranê gerîlayan gêno binê ablûqa, dewleta tirke zî hêrişê Mexmûrî keno. PDK pê ambargoyê vera Mexmûrî hêrişanê dewleta tirke keno meşrû. Wexto ke mexmûrijan vera DAÎŞî xo ver da her kesî ê fîraz kerdêne la nika semedo ke mexmûrijî vera dewleta tirke xo ver danê her kes vano wa teslîm bibê. Ganî kurdî wayîrê Mexmûrî vejîyê. Şarê Mexmûrî rûmetê şarê kurdan o. Ganî polîtîkayê Mexmûrî yê PDKyî bêrê eşkerakerdene.

PDK vano 'Semedo ke gerîlayî estê dewleta tirke hêriş kena.' PDK wa nê tewirê xo ra fek vera bido. Ma hê vera dewleta tirke şer kenê. Wa PDK xo mekero mîyan. Ma wazenê na raştîye vîrê hêzanê sîyasîyan de cabigêra.

Vera gerîlayan çekê kîmyewî şuxilîyenê. Başûr de darî birîyenê, dizîyenê. Başûr her roje dîyeno bombayan ver. La selahîyetdaranê Başûrî ra veng nêvejîyeno. Ez venga sîyasetmedar û roşnvîran dana ke bêvengîye metodêkê îşxalî yo. Ganî na babete de her kes tewirêk bimojno, wa kurdî wurzê payan ser. Meverdê xozaya şima talan biba.''