Endamê Konseya Rayberdişî yê KCKyî Mustafa Karasuyî derheqê rojdemî de roportajêk da ajansê ma. Beşê yewinî yê roportajî de Karasuyî tecrîdê vera Rayberê Şarê Kurdî Abdullah Ocalanî, şerê Zap, Metîna û Avaşînî û xayînîya PDKyî ser o qisey kerd.

Beşê yewinî yê roportajî ra noqtayê girîngî wina yê:

''Rayber Apo kesêko normal nîyo. Ey vera dewlete sere wedarit û kerd ke şar pê qirkerdişê dewleta tirke biheso. Coka dewleta tirke dişmenîya Rayber Apoyî kena. Sîstemê tecrîdî yê Îmraliyî cayêkê dinya yê bînî de çin o. Dewlete pê cezayanê dîsîplînî yê ke bahaneyê ci yê, nêverdena o keye û avûkatanê xo bivîno. Têkoşînê vera tecrîdî yanî têkoşînê azadîya Rayberîye û têkoşînê azadîya kurdan yew ê. Seba azadîya Rayber Apoyî têkoşîno huqûqî, sîyasal û demokratîk zaf girîng o. Mîsal sendîkayê Îngilîstanî tay kampanayayan kenê û 12ê hezîrane de seba azadîya ey Gemlîk de rayraşîyayîş bêro kerdene, na çalakîye gamêka girîng a. Xîretê winasênî kêm bibê zî ma rê ercîyaye yê. Kesê ke têkoşînê azadîya Rayberîye kenê, ganî têkoşînê azadîya kurdan zî bikerê. Seba ke tecrîd bêro şiknayene û azadîya Rayber Apoyî bêra caardene ganî têkoşînêko winasên bêro kerdene.

Derheqê şerê Zap û Avaşînî de hêzê ma tim agahîyan danê. Ma zanayêne ke îqtîdarê AKP-MHPyî do hêriş bikero û 17ê nîsane de zî hêrişan dest pêkerd. Gerîlayan goreyê ney zî tedbîrê xo cara girewtbî. Hêrişê dewleta îşxalkere yew hele zî nêvindenê, cayêk nêmendo ke nêdîyayo bombayan ver. Dewleta tirke nêeşkena erdî ra têbigêra, coka bi taybetî pê SÎHAyan vera hewayî ra hêrişan kena. Dewleta tirke seba ke vera şerê tunelan û tîmanê hereketînan de bêçare menda, dest eşta çek û gazê kîmyewîyî. Dewleta tirke Saddamî ra zêdêr zî vera gerîlayan çek û gazê kîmyewîyî şuxilnena. Welatê Ewropa û Amerîka vera nê hêrişanê kîmyewîyan ê Tirkîyaya ke endama NATOyî ya, bêveng manenê û bi nê hawayî sûcê dewleta tirke mîyan kenê. Gerîlayî vera nê hêrişan bi xoverdayoxîya fedayîye ya Apogîran xo ver danê. Gerîlayî her roje, her hele derban danê dişmenî ro. Derbê gerîlayan fermandar û leşkeranê artêşa tirke teng kenê, bêhêvî verdenê.

Nê hêrişê vera Zapî hêrişanê 2008 û verê ci ra cîya yê. Dewleta tirke nika vera kurdan şerê qirkerdişî kena. Hetê bînî ra 2015 ra dima îqtîdarê AKP-MHPyî ronîya û dişmenîya vera kurdan resaye asta tewr berze. AKP-MHP seba ke payan ser de vindero hêrişê kurdan keno û seba ney pêro îmkananê xo şuxilneno. Îqtîdarê AKP-MHPyî kewto peyê serkewtişêkê sembolîkî. Coka înan 2021 de hêrişê Garê, Zap, Metîna û Avaşînî kerd. Nika zî reyna bi operasyonê 'Pençe-Kilit'î hêrişê Zapî kenê. Îqtîdar wazeno Zap de kilîdî abikero û uca ra şoro weçînayîşî. La narey ê raştê gerîlayan ameyî û mat mendî. Coka hêrişê her kesî kenê û her kesî sûcdar kenê. Îqtîdar nêeşkeno vajo 'ma bin kewtî.' Înan qaşo Zap do bivistêne destî û serfîrazîya xo îlan bikerdêne. La nika ê sendromê Zapî ancenê.

Dewleta tirke têna dişmena kurdan nîya dişmena pêro şaran a û her ca de têna menfatanê xo wazena. Eke dewleta tirke nê şerî de ser bikewa do hêrişê ereban zî bikera ke ereb û kurdî cîranê yewbînan ê. Xora Sûrîye û Iraq de hêrişê waranê ereban kena. Eke têgêrayîşê ma yê azadîye nê hêrişan bişikno o çax, qederê Rojhelatê Mîyanênî vurîyeno, Tirkîya vurîyena. Demokrasî do bêra Rojhelatê Mîyanênî û Tirkîya. Coka wa pêro şarî qîmet û girîngîya têkoşînê ma hol fam bikerê. Eke kurdî azad bibê Rojhelatê Mîyanênî de dewrêko newe do dest pêbikero.

Dewleta tirke seba ke têgêrayîşê ma tasfîye bikera pêro hêz û dişmenê demokrasî û azadîye vistî dewre. PDK zî bi nê hawayî estbîyayîşê xo mîyanê îqtîdarê AKP-MHPyî de vîneno. Qoricî û PDK wina vanê ke eke AKP-MHP şoro ê zî do şorê. PDK bi hawayêkê zelalî mîyanê nê şerî de yo. Beno ke dewleta tirke tay sozî dayê PDKyî. La a raşte PDK cara dişmenîya PKKyî keno. PDK xeta kurdayetîye ra vejîya û xeta xayînîye de yo. Dewleta tirke key teng biba PDK keweno dewre. PDK sewqîyatê cebilxane û erzaqanê gerîlayan asteng keno, têkilîya mabênê hêzanê gerîlayan birneno, gerîlayan gêno binê ablûqa û waranê gerîlayan dano dewleta tirke. Hêzanê ma PDK hişyar kerd. Ganî şar, cinî, welatperwer, roşnvîr û ciwanê kurdî verê PDKyî bigêrê. Eke PDK nêro astengkerdene pêkewtişê vera PDKyî vilayê pêro waranê gerîlayan beno.

Ma çend reyî venga PDKyî dabi. Ganî hînî PDKyî rê nêvajîyo 'îxanet mekere, hemkarê dişmenî mebe.' Hînî wextê ney qedîyayo. PDK reya verêne îxanetê kurdan nêkeno. Ma Garê û Metîna de PDKyî rê sebr kerd. La PDKyî tewirê xo ra fek vera nêda. PDK Rojawan, Şingal û Başûr de dewleta tirke reyde têgêreno. A cinîya ke London de mekapê gerîlayan berz kerdbi, cewabo tewr raşt da PDKyî. Hînî binê nameyê neteweperwerîye de îxanet û hemkarîye nêrê nermkerdene. Eke ma wazenê ke PDK nê tewirî war verdo ganî ma vera ci tewirê xo yê tewr zelalî bimojnê. Ganî ma hînî PDK nêkerê mîyanê yewîya neteweyîye û xebatanê yewîye. Çunke wina yew derdê ey çin o. Ganî şarê kurdî pê çalakî û eşkerayîyanê xo vera îxanet û hemkarî vejîyê û hetê têkoşînê PKKyî de ca bigêrê.''