Endamê Konseya Rayberdişî ya KCKyî Mustafa Karasu beşdarê bernameyê taybetî yê Medya TVyî bi û rojdem ercna.

Qiseykerdişê Karasuyî ra tay noqtayê girîngî wina yê:

''25 serrî yo Rayber Apo yeno tecrîdkerdene. Rayber Apoyî hema roja verêne vatbi ke CPT mesuldarê nê sîstemî Îmrali yo. Nêzdîbîyayîşê CPTyî nêzdîbîyayîşê Ewropa yo. Ewropa tecrîdî kena meşrû. Vanê CPT dezgehê vera îşkenceyî yo. La hîrê serrî yo Rayber Apoyî ra xeberêke nêna girewtene CPT çîyêk nêkeno. Ganî ma raştîya CPTyî teşhîr bikerê. Yew meşrûtîyetê sîstemê Îmraliyî nêmendo. Eke ma şorê ser, têkoşînêkê xurtêrî bikerê eşkenê sîstemê Îmraliyî birijnê. No tewirê CPtyî zî sebebêkê xurtkerdişê têkoşînî yo. 

Dostanê ma 10ê teşrîna verêne de Hemleya Azadîye dabî destpêkerdene. Şarê ma xora 25 serrî yo seba azadîya Rayber Apoyî têkoşîn keno. Nika no têkoşîn resayo asta leweyî. Hinî wextê ci ameyo ke berê Îmraliyî bêrê parçekerdene. Xora sîstemê Îmraliyî bi zorî payan ser de verdîyeno. Hinî hêzê komplogerî zî nêeşkenê komployî bipawê. Safhaya diyîne ya Hemleya Azadîye ya ke dîyaya destpêkerdene ganî qetî komelkî biba û ser bikewa. Ganî no têkoşîn Rayber Apoyî azad bikero. 

Çalakîyanê gerîlayan ê 2023yî û çalakîyanê çele û sibate artêşa tirke lerznaye û Herêmanê Pawitişî yê Medya de teng kerde. Gerîlayî bi nê çalakîyanê xo vera komployî zî îradeyê xo eşkera kenê. Çunke binvistişê kolonyalîstan binvistişê komplogeran o. Eke Komployo Mîyanneteweyî bêro binvistene polîtîkayê qirkerdişî do bişikîyê. 

Ez 8ê Adare yê pêro cinîyan fîraz kena. Ez pêro cinîyan ê kedkaran selam kena. 8ê Adare teyna roja paştdayîşê cinîyan nîyo roja têkoşînê cinîyan, roja vurnayîş û azadkerdişê dinya yo. Têkoşînê cinîyan eşkeno pêro dinya û merdimatîye bixelisno. Çunke cinîyî hêzê serkêşî yê azadî û demokrasîyî yê. Ganî cinîyî 8ê Adare de na raştîye bimojnê. 

Mîyanê têkoşînê azadîye yê cinîyan de keda Rayber Apoyî zaf a. Rayber Apoyî tim giranîye daye azadîya cinîyan û xeta azadîya cinîyan û artêşa cinîyan awan kerde. Seke Rayber Apoyî vatbi xeta azadîya cinîyan do îdeolojîyanê camêrdan pûç bikera, îqtîdaran wedarna.

Nika verê şarê ma de weçînayîşê herêmîyî est ê. AKP nika ra peyê kayanê gemarinan de yo û keno ke weçînayîşan de xo sey serkewte bimojno. Sîyasetê kurdan vano ke ê do qeyûman bişawê. Raşta zî ganî şarê ma weçînayîşan de îradeyê xo bimojno û sîstemê qeyûman tarûmar bikero. Îqtîdarê AKP-MHPyî kurdan, meseleya kurdan, partîyanê kurdan û raştîya Kurdîstanî çin hesibneno. La heta ke meseleya kurdan çareser nêba îqtîdarê Tirkîya nêeşkenê refahî bîyarê welatî. Wa her kez bizano ke  bi têkoşînî çareser bena. Yanî teyna pê dîyalog û muzakereyan nêbeno. Çunke mezgê dewleta tirke mezgê qirkerdişî yo û ganî no mezg bêro vurnayene.

Weçînayîşanê 31ê adare de ganî şarê kurdî wayîrê nasname û kulturê xo vejîyo. Dewaya kurdan dewaya şaredarîyan ney dewaya azadîye ya. Coka şarê ma wa weçînayîşan de îradeyê xo yê waştişê azadîye û nasnameyê xo bimojno.

PDK vera vera verê xo dano waranê gerîlayan. Ma serebûtanê cabîyayîşê hêzanê PDKyî teqîb kenê. Dewleta tirke û PDK bi kayê xo yê neweyî kenê ke hukmatê Iraqî zî biancê kişta xo. Dewleta tirke xora Herêmanê Pawitişî yê Medya de teng bîya, PDK zî teşhîr bi. Coka PDK û dewleta tirke zor danê dewleta Iraqî. PDK bi ala Iraqî hêzanê xo şaweno waranê gerîlayan. Ma hêvî kenê ke Iraq bi nê kayan bihesîyo û tewirê xo bimojno. Çîyo ke PDKyî rê bêro vatene nêmendo. Xora PDKyî heta nika hemkarîye kerde û nika zî hemkarîya xo resneno astêka bîne.''