Fermandarê Qerargehê Merkezê Pawitişê Şarî (MPŞ) Murat Karayilanî derheqê hêrişanê îşxalî yê 17ê nîsane de bi cîhazê bêtelî hêzanê gerîlayan ê Zapî de qisey kerd. Karayilanî derheqê xoverdayîşê gerîlayanê HPG û YJA-Starî de agahîyê zaf girîngî pare kerdî.

Karayilanî hêverî şehîdê menga gulane yad kerdî. Karayilanî dima bale ante ser ke hêrişê dewleta tirke ya îşxalkere yê 17ê nîsane 40 rojan xo pey de verdayê.

Qiseykerdişê Karayilanî ra noqtayê girîngî wina yê:

''Waranê Zap û Werxelê de xoverdayîşêko tarîxî est o. Ma zanenê ke dişmenê ma keso asan nîyo. Dişmenê ma faşîst, barbar û nîjadperest o la namerd û tersnok o zî. Dişmen pê destekê NATOyî û pê çekanê kîmyewîyan hêrişê ma keno. Embazê ma bi îrade, çêrî û fedakarîyêka pîle tarîxî nusenê, tarîxê merdimîye de rîpelêkê neweyî akenê. Ez pêro embazan selam û fîraz kena. Ma zanenê ke fedakarî û çêrîya Şima ya Zapî normal nîya.

Zap de têna tarîxê Kurdîstanî de nê, tarîxê şerî de rîpelêko newe nusîyeno. Ma Zap de pêro dinya rê mojnenê ke îradeyê merdiman senî pê teknolojî eşkeno. Coka no xoverdayîş zaf girîng o. 300 şerwananê spartayîjan derbê giranî dayî Împaratorîya Persan. La şêrê Zapî têna destanî nêafernenê, tarîxê xoverdayîşî de prosesêkê neweyî aver benê. Cinî û camêrdê Apogîrî yê Zapî pê metodanê xo yê xoverdayîşî do biresê serfîrazîye. Nê 40 rojî ney eşkera kenê.

Dewleta tirke bi hişmendîya Îtîhat û Terakî wazena pêro Kurdîstanî, sere de şarê erebî pêro şaranê herême bigêra binê kontrolî. Şima Zap de têna waranê Rêkanî û Nêrwahî nê pêro Başûrê Kurdîstanî pawenê. Şima statuyê Başûrê Kurdîstanî, destkewteyanê kurdan, estbîyayîş û azadîya Kurdîstanî pawenê. No xoverdayîşê Zapî xoverdayîşê pêro şaranê herême yo. Zap de têkoşîno enternasyonel berz beno. Ez embazanê enternasyonelan ê Zapî selam kena.

Xoverdayîşê Zapî seba her kesî mesajêk û vengdayîşêk o. Ewro Zap, Rêkan û Nêrwehan de îradeyêko pîl berz beno. Senî ke Rayber Apo 24 serrî yo vera tecrîdê giranî xo ver dano, şagîrtê ci yanî gerîlayî  ganî koyanê Kurdîstanî de na hişmendîye temsîl bikerê. Ma zanenê ke embazî senî nê xoverdayîşê fedayî yê fîrazî kenê. Ganî her kes ney hol bizano. No têkoşîno tênefes rêze nîyo pîl o. Bara ci giran a. Xoverdayîşo ke hedef keno ke 40 rojan artêşa tewr pîle ya diyîne ya NATOyî bin bikero, pîl o û asan nîyo. Her çî ra ver na îdîayêka pîl a, çêrîyêka pîl a.

Ganî bi taybetî embazê ke Girê Sorî de xo ver danê, wa bizanê ke eke xebata şima pê îradeyê pîlî, embazîya pîle, ruhê Apogîrî û metodanê Rayber Apoyî dekerde nêba do ser nêkewa. Coka ganî şima embazê Girê Sorî mîyanê xo de embazîye pîl bikerê, qîmetê yewbînan bizanê, yewbînan bipawê.

Wina aseno ke dişmen keno ke terzê xo yê hêrişî aver bero. La heta nika ser nêkewt. Dişmen keno ke pê teknolojîya pîle û hêrişanê teknîkan aver şoro. Wextê peyênî de dişmen Girê Cehennem, Şikefta Birîndara, Werxelê, Şehîd Şahîn û Kuro Jahroyî de giranîye dano hêrişanê xo. Seba ke ê nêeşkenê kutikan şawenê. Embazî vanê Girê Cehenemî de tay kesan bi kurmanckî û bi sorankî qisey kerdêne. Ganî ma tesbît bikerê ke nê kam ê. Dewleta tirke kena ke kurdan pê destê kurdan qir bikera. Wina aseno ke dewlete cergî dayê arê û hêzêk awan kerd. Ê wina hêrişê ma kenê la nêeşkenê ser bikewê.

Ganî embazî vera metodanê namerdan ê dişmenî baldar bibê û tedbîranê xo bizêdînê. Aseno ke hînî metodê cîyayî yê dişmenî nêmendê. Ganî embazê tunelê şerî tecrubeyanê xo de xorin bibê û pawitişê xo bihêz bikerê.

Embazê Werxelê ganî pêro Avaşînî bikerê warê şerî. Ganî pêro embazî dormeyê xoverdayîşê Zapî de çember bibê. Şarê ma zere û teberê welatî de bi fedakarî paştî dano gerîlayan. No paştdayîş do xoverdayîşê Zapî aver bero.

Wa embazî xo vîr a mekerê ke ê hê serkêşîya tarîxî kenê. Seba ney zî ganî embazî taktîkanê pawitişî û afernayoxam bikerê. Eke wina bibo serkewtiş do ê ma bibo. Ganî embazî baldar bibê, giranîye bidê rol û mîsyonê xo û plananê emrdergan bikerê. Prosesê verê ma derg o. Eke embazî nê esasî ser o têbigêrê do bibê serkêşê wextê neweyî. Ez pê nê hîs û fikran pêro embazan selam kena û înan rê serkewtiş wazena.''