Endamê Komîteya Rayberdişî ya PKKyî Murat Karayilanî bi wesîleya serrgêra 37. ya Hemleya 15ê Tebaxe ANFyî rê qisey kerd. Beşo diyîn ê roportajê Karayilanî bi kilmî wina yo:

''Serrgêra 37. ya Hemleya 15ê Tebaxe de gerîlayê azadîye pê fedakarî û çêrî resayî astêka pîle. Înan destpêkê na serre de waştêne Herêmanê Pawitişî yê Medya îşxal bikerê. Coka 10ê sibate de hêrişê Garê kerd. Xêrê xoverdayîşê embazan û fermandar Şoreş Beytuşebapî de planê înan ê îşxalî bin kewt. Dima înan 23ê nîsane de hêrişê Zap, Metîna û Avaşînî kerd. Dewleta tirke wina hesibnayêne ke 10 rojan de Herêmanê Pawitişî yê Medya îşxal bikera. Ê pê teknîkê xo, hetkarîya hêzan ê komplogeran, hetkarîya PDKyî bawer bîyî. 112 rojî yo şer dewam keno la hema zî ê nêeşkayî Avaşîn bigêrê. Xora Zap de hêzanê ma ê vindarnayî.

Gerîlayê modernîteya demokratîke bi koordîne têgêrenê, yew tîme şina serê hedefî, tunelan de şer kenê. Gerîlayî pê nê metodan û îradeyê xo eşkenê hêrişan û teknîkê dişmenî pûç bikerê, vera gazê kîmyewî xo ver bidê. Ma terzê xo yê Garê nika Metîna û Zagrosan de anê ca. Ma pê nê terzî xora Rojawan de ser kewtî.

Yeno vatene ke hêzê PDKyî wazenê Balinda ra bêrê, dole bi dole bêrê Sîda, Sîda ra zî bêrê Rençpirak. Şar nika Kela Bêdewê de yo, Werxêle de yo. Dewleta tirke çend serrî yo xîret kena ke şerê zereyî yê kurdan veja. Ma PDKyî ra wazenê ke wa paştî bido ma. Eke nêwazeno paştî bido wa hetkarîya dişmenî mekero ma rê bes o. Ma hêvera artêşa tewr pîle ya NATOyî şer kenê. Ganî her kes na raştîye bivîno û paştî bido ma. Ganî partîyê Başûrî, pêro kurdî bizanê ke tarîx ho newe ra nusîyeno. Xoverdayîşê gerîlayan ganî pêro kurdan rê bibo sereberzî.

Seke ma vat mabênê gerîlayan û arêşa tirke ya îşxalkere de şerêko cidî qewimîyeno. No şer têna Avaşîn, Zap û Metîna de nê pêro waranê Kurdîstanî de yo. La babetê Zap, Metîna û Avaşînî ma rê girîng ê. Dewleta tirke pê cerganê DAÎŞî û El Nûsrayî vera ma şer kena. Dewleta faşîste vera ma kutikan, gazê kîmyewî, teknîkê xo, teyarayan û hêzanê paramîlîteran xebitnena. Înan vatêne qey mîyanê hewteyêkî de nê cayan bigêrê. Eke wina ma nêgêrîyayêne ablûqa, rayîrê ma nêameyêne girewtene, îstîxbarat nêameyêne dayene dişmenî ma rew ra artêşa tirke bin kerdêne. Artêşa tirke nêeşkayêne hende aver şora.

Serra 38. ya Hemleya 15ê Tebaxe do biba serra serkewtişî. Ma nê esasî ser o gerîlatîya modernîteya demokratîke zêdêr aver berê, Rayberê xo azad bikerê, Kurdîstanî azad bikerê. Seke ma verî vat netîceya nê şerî semedê pêro beşanê Kurdîstanî girîng o. Bi nê hawayî dewam bikera artêşa tirke do bin bikewa. Binkewtişê dişmenî do bibo qezencê şarê kurdî.''