Endamê Komîteya Rayberdişî ya PKKyî Murat Karayilanî Stêrk TV de şerê gerîlayan, taktîkê şerî yê gerîlayan û şerê Îsraîl-Hamasî ercnayî.

Qiseykerdişê Karayilanî ra tay noqtayê girîngî wina yê:

''Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ya ke 10ê teşrîna verêne de amebî îlankerdene zaf girîng û manadar a. Dinya seba ke wayîra fikranê Rayber Apoyî vejîyena wayîra na hemle zî vejîyaye. Hetê bînî ra ma rê şerm a ke ma bi qîmî wayîrê Rayber Apoyî nêvejîyenê. Rayber Apo 25 serrî yo vera sîstemê tecrîd û îşkenceyî yê Îmraliyî têkoşîn keno. Ganî ma zî hetê ey de nê têkoşînî pîl bikerê. Ganî ma sey kurdan û têgêrayîşê azadîye wayîra na hemleya dostanê ma vejîye û hemle pîlêr bikerê. Ganî hînî ma azadîya Rayber Apoyî bîyarê ca.

Komara Tirkîya hetê kurdan ra zî ronîyaye. Kurdan têkoşînêko xurt kerdbi. Meclîsê verênî de qala ney amebî kerdene. La bi Peymana Lozanî kurdî ameyî înkarkerdene. Dewleta tirke vera tasfîykerdişê têgêrayîşê ma kena hedef. Qaşo înan serra 100. ya Komara Tirkîya de têgêrayîşê ma binî ra biqedînayêne. La ma hema zî est ê.

Nê prosesî de embazanê ma Rojhatî û Erdalî 1ê teşrîna verêne de Anqara de çalakîyêka fedayî ya girînge kerde. Na çalakîye mesajê raştî dayî. 1996 de bi çalakîya fedayî ya embaze Zîlane prosesêko newe dîyabi destpêkerdene. Çalakîya fedayî ya Anqara zî çalakîyêka winayên a. Ma biwaştêne na çalakîye de dewleta tirke do kişteyê girîngî bidîyêne. La ma teyna waşt ke mesajê 'Ma eşkenê çi biwazê bikerê. Eqlê xo bigêrê sereyê xo. Na çalakîye hişyarîyêk a' bidê.

Na çalakîye zaf zorê dişmenî şîye. Dişmen çalakîye ra dima hêrişê Herêmanê PAwitişî yê Medya, şarê ma û sîyasetmedaranê kurdan kerd. Nameyê operasyonî zî kerd 'operasyonê qehremanîye.' Polîsî erzenê keyeyan ser, hemwelatîyanê bê pawitişî destbend kenê. Na qehremanîye ney tersnekî ya. Dewlete na çalakîye kerde bahane hêrişê Rojawanî kerd. Rojawan de warê sivîlî, warê cuye û binawanîye dîyenê bombayan ver. Dişmen bi hêrsê çalakîya Anqara wina har bi.

2023 de şer tewr zaf Vakurê Kurdîstanî de qewimîya. Vakur de şehadetê girîngî zî qewimîyayî. La embazanê ma Vakur de derbê tewr serkewteyî dayî dişmenî ro. Şehîdanê Vakurî têkoşînêko pîl peyê xo de sey mîrasî verda.

Başûr de Herêmanê Pawitişî yê Medya de şerêko girîng yeno kerdene. Dewleta tirke û medyaya ci qala nê şerî nêkenê, raştîyan nêvanê. Artêşa tirke hîrê serrî yo rixmê destekê NATOyî, çekan û bombayanê xo, teknîk û teknolojîya xo nêeşkena Zap de ser bikewa û gerîlayan çin bikera. Çunke gerîlayî wayîrê yew doktrînî yê. No doktrîn nêverdana ke dişmen ser bikewo. Doktrînê ma yê şerî no yo ke ma şerê tunelan û şerê gerîlayan yew kenê. Gerîlayê ma waran de sey xeyaletan têgêrenê.

Tunelanê Şehîd Doganî yanî Sîda de dişmenî 2 serrî yo kerd nêkerd nêeşko gerîlayanê ê tunelî çin bikero. Nika dişmen awe verdana zereyê tunelî ke pê ceyranî gerîlayanê tunelî şehîd bikero. Ancî Girê FM, Girê Şehîd Munzurî, Girê Cûdîyî de zî şero winayên est o. Dişmen gaz, çek û bombayanê qedexeyan û kîmyewîyan şuxilneno. La ancî zî embazê ma çalakîyanê xo kenê. Gerîlayî bi terzê neweyî şer kenê coka dişmen nêeşkeno kontrol bigêro xo destî. Di hetê awa Zapî zî destê gerîlayan de yê. Dişmenî 2 serran o Zap de mewzîyêke zî nêviste destî! Dişmen her roje kişteyan dano la ney nimneno.

Dewleta tirke emser pê destekê PDKyî wazena îşxalê xo ser bivisna. Çend rojî verî leşkerê tirkî bi destekê PDKyî Sêgir de cabîyî. Seba ke embazê ma nêwazenê bidê PDKyî ro dewleta tirke hêverî hêzanê PDKyî şawena ke cabida xo.

Wa şarê ma hol bizano ke ma eşkenê bi doktrînê xo yê şerî her ca de dişmenî bin bikerê. Doktrînê ma doktrînê serkewtişî yo. Ma Başûr de estbîyayîşê pêro kurdan pawenê. Dewleta tirke kena ke ma Başûrî ra veja û hêrişê şarî bikera. Ma dewaya azadîya kurdan kenê. Dişmen pê tasfîyekerdişê gerîlayan keno ke tasfîyekerdişê şarê kurdî zî temam bikero. Coka no şer seba ma stratejîk o. 

Ma şerê Îsraîl û Hamasî teqîb kenê. Kurdîstan senîn o Filîstîn zî o qayde yo. Ganî cade no şer biqedo. Rayîrê çareserîya mesleyan ganî dîyalogî bibê. Rayber Apoyî seba meseleya kurdan û Filîstînî sîstemê Konfederalîzmê Demokratîkî û neteweya demokratîke pêşkêş kerdbî. Ganî mesele bi nê perspektîfî çareser biba. Erdogan yew sextekar o û teyna peyê menfaetanê xo de yo. Erdogan Kurdîstan de gonîya kurdan şimeno la zûr keno ke o hetê şarê Filîstînî de yo.

Ez Konferansê Ciwanan ê Dinya selam kena. Ganî ciwanî bi paradîgmaya Rayber Apoyî xo aver berê, rêxistin bikerê. Cinî û ciwanî serkêşê ma yê. Ez ciwanan rê nê konferansî de serkewtiş wazena û selamê xo şawena.''