Endamê Komîteya Rayberdişî ya PKKyî Murat Karayilanî Radyoya Dengê Welat reyde qisey kerd.

Karayilanî destpêkê qiseykerdişê xo de şexsê Zîlane (Zeynep Kinaci), Helmet (Dîyar Xerîb), Şêx Seîd û 47 embazê ey ê ke 29ê hezîrane de ameybî dardekerdene pêro şehîdê azadîya Kurdîstanî yad kerdî û da zanayene ke Têgêrayîşê Azadîye yê Kurdîstanî do qesasê înan bigêro. Karayilanî dima zî rojdem ercna. Qiseykerdişê Karayilanî ra beşêk wina yo:

''Hêrişê vera Şingalî yê 15ê hezîrane de şehîdê ma çin ê, têna 3 şerwanê YBŞyî birîndar bîyî. Yanî hêrişê 15ê hezîrane ame pûçkerdene.

14 rojan ra nata Heftanîn de destanêkê çêrîye yeno nuştene. Heftanîn de şer dewam keno. Dişmenan tay cayî vistî destî labelê gerîlayî nê cayan de yê. Eke dişmenî nê cayan de bimanê do zêdêr kişteyan û bedelan bidê. Gerîlayê Kurdîstanî pê metodanê xo yê xoseran nêverdê ke dişmenî erdê Kurdîstanî de wina bi hesanî bimanê.

Dişmen wazeno Başûrê Kurdîstanî bi temamî îşxal bikero

Dişmen wazeno xo biresno sînoranê 'mîsak-i mîllî.' La hêverî armanc keno ke herêmêka tampone awan bikero. Na herêma tampone Xakurkê ra heta Efrînî ya. Yanî wazenê pêro Rojawan û Başûrê Kurdîstanî îşxal bikerê. Seba naye zî zaf rîskan danê xo ver. Her rey yew vejîyeno vano 'tegmenêk kişîya.' Aseno ke hêzê înan bi temamî tasfîye bîyo ke fermandarê ci kişîyayo. Yanî kişteyê dişmenî zaf ê.

Ma wazenê her kes raştîya îşxalê dewleta tirke bivîno. Sîyasetê îşxalî yo newe yê rejîmê AKP-MHPyî tehlukeyêko pîl o la belê ma sey gerîlayanê PKKyî vera nê tehlukeyî nameyê Kurdîstanî ser o xo ver danê, şer kenê. No şer têna mabênê PKK û dewleta tirke de nîyo. No şer mabênê şarê kurdî û xeta îşxalkere-şovenîste ya tirkan de yo. Nê esasî ser o xoverdayîşê ma do dewam bikero.

Hêrişê vera Kobanê, Şêladizê Şarbajêrî çarçewa konseptê neweyî de yenê kerdene. Yanî hêrişê vera Silêmanî, Şingal, Kobanê zî hêrişê bîlasebebî nîyê. Nê hêrîşî palnekerde yê. Bi nê hawayî wazenê şarê kurdî bitersnê û komelê kurdî teslîm bigêrê. Wazenê têna Vakur de ney Rojawan û Başûrê Kurdîstanî de zî bibê serdest.

A girînge hetê bînî ra wazenê ke nakokîye bivisnê mîyanê sîyasetê Kurdîstanî. Coka hêrişê herêmanê YNKyî kenê. PKK zî kenê bahane. Xora ma Şarbajêr û cayanê bînan de nîyê la PJAK hedef kenê. Yanî hêzê Rojhelatî vistî lîsteya xo. Bi nê hawayî wazenê mabênê hêzanê Kurdîstanî de nakokîye biafarnê. Mabenê PKK, YNK, PDKy3i de têmîyanîye vejenê. Konsept no yo.

Ganî kes pê konseptê neweyî yê dewleta tirke nêxepîyo

Ma do nêkewê dafika kolonyalîzmê tirkan. Ganî kes pê konseptê neweyî yê dewleta tirke nêxepîyo. Ganî her kes nê plananê dişmenan pûç bikero. Eke hêzê Kurdîstanî pêro pîya têbigêrê ma do bieşkê nê hêrişan çin bikerê. Yanî ganî şar vera hêrişanê dişmenan bibo yew û paştî bido yewbînan. Eke sîyaseto yewbîyaye, stratejîya neteweyîye bêrê mojnayene dewletê bînî do nêeşkê vajê 'Ma şorê, parçe bikerê, îşxal bikerê.'

Tewirê şarê ma yê Başûrî erjîyaye yo

Vera hêrişan sere de ê Silêmanî û Germîyanî şarê ma yê Başûrî tewirêko xurt mojna. Ez şarê ma yê Başûrî rê selam kena. Şehîdanê Şêladizê reyna yad kena. Şarê ma yê Şêladizê tacê ma yo. Tewirê înan ê welatperwerîye zaf erjîyaye yo. Ma pê bawer ê ke şarê Behdînanî û temamîya Başûrê Kurdîstanî wayîrê nê rûhî yo. Mesele mabênê sîyasetmedaran de ya û şarê kurdî ganî na babete de bivejîyo verê sîyasetmedaran. Ganî sîyasetmedarê Başûrê Kurdîstanî tehlukeyê vera Kurdîstanî bivînê. No şer têna mabênê PKK û artêşa tirke de nîyo. No şer stratejîk û hîra yo.

Têkoşînê vera tecrîdî wezîfeyê ma yo

Tecrîdê Îmraliyî Tirkîya de sey faşîznî, Kurdîstan de zî sey kerdişanê faşîzmî û qirkerdişî yeno caardene. Yanî bingeyê sîyasetê tecrîdî yê Îmraliyî de faşîzm û qirkerdiş esto. Coka eta ke tecrîd nêqedo sîyasetê qirkerdişî û faşîzmê Tirkîya do nêqedê. Ma têkoşînê vera tecrîdî sey wezîfeyêkî vînenê. Heman wextî de no wezîfeyê ker kesî yo.''