Fermandarê Qerargehê Merkezê Pawitişê Şarî (MPŞ) Murat Karayilanî bi wesîleya 15ê Tebaxe cewab da persanê ANFyî.  Beşê diyînî yê roportajê Karayilanî ra tay noqtayê girîngî wina yê:

''Dinya çarçewa qewimîyayîşanê teknîk û teknolojîkan de zaf vurîyaye. Coka şerê gerîlayan zî na çarçewe de hetê taktîk, metod û teorî ra vurîya. Ewro şerê gerîlayan zafêr esasê îstîxbaratî de yeno kerdene. La xora hema zî şer de îrade, eql, marîfetê merdiman dîyarker ê. Rayber Apoyî serrî verî vatbi 'Teknîko tewr gird merdim o.' Terzê felsefe û perwerdeyî yê Rayber Apoyî giranîye dano merdiman ser. Refanê PKKyî de giranîye dîyeno eql, merîfet, îrade, çêrî û fedayîtîye. Gerîlayê ma zî xo rê nînan esas gênê. Hetê bînî ra seba ke Paradîgmaya Modernîteya Demokratîke proses raşt ernca gerîlayî eşkayî cade adapteyê qewimîyayîşanê teknîk ûn teknolojîkan bibê.

Xora mîyanê nê qewimîyayîşan de ereykewtişî, kêmasî, zehmetîyî zî bîyî. La projeyanê ma yê newe ra awanbîyayîşî nê meseleyî çareser kerdî. Bi taybetî 2018 de projeyê ma yê newe ra awanbîyayîşî vurîyayîşê pîlî kerdî. Nê projeyî giranîye da merîfetê merdiman û raştîya şarî ser. Ewro taktîkê ma binî ra vurîyayî. Şehîdanê ma yê sey Delale Amed, Atakan Mahîr û Alî Plingan nê prosesî de kedê pîlî dayî. Şehîdê ma afernayoxê  gerîlatîya dewrê neweyî yê. Nê vurîyayîşî esasanê partîbîyayîş, leşkerîbîyayîş û pisporbîyayîşî de qewimîyayî. Na gerîlatîya dewrê neweyî kena ke îstîxbaratî pûç bikera, hacetanê şerê hewayî pasîfîze bikera, erazî her hetî ra bişuxilna, şerê bin û serî aver bera. Bi nê hawayî hêzanê ma xo aver berd, vera hêrişanê teknolojîkan xo îsbat kerd û mojna ke artêşa ma bêmexlûb a.

Ma ewro na asta ke hêzê ma resayê ci bi sereberzî îfade kenê. Xora na aste netîceya xorinbîyayîş û kedêka pîle ya. Ewro gerîlayê azadîye asta tewr berze de resayî fedayîtîye. Gerîlayê Kurdîstanî ewro afernayîşê taktîkan de zî heman asta berze de yê. Gerîlayî eşkenê perspektîfê Şerê Şarî yê Şorişgêrî yê Rayberîye pratîze bikerê. Hetê bînî ra eşkera yo ke ewro taktîkê ma eşkenê rejîmê AKP-MHPyî birijnê. No rejîm keno ke gerîlayan tasfîye bikero û bi nê hewayî xo mende bikero. Coka şerê ma zî asta tewr berze de yo. Naye ra serra 39. ya 15ê Tebaxe seba ma serrêka girîng a. 

Tay kesî vanê ke 'hînî wextê şerê gerîlayan qedîyayo.' Êyê ke wina vanê komelan teslîmê hêzanê hegemonîkan kenê. Raşt o ke wextê gerîlatîya klasîke qedîyaya şîya. La gerîlatîya ke goreyê Paradîgmaya Modernîteya Demokratîke yena kerdene derbazdar a. Na paradîgma de gerîlayî sey hêzêkê pawitişî bawerî danê şarî, destek danê şarî. Yanî Modernîteya Demokratîke de gerîlayî wayîrê cayêkê girîngî yê la hêzo raştikên komel bi xo yo. Şoriş berhemê girseyan o. 3 esasî; girseyê rêxistinkerdeyî, hêzê gerîlayan û hêzê xopawitişî eşkenê şorişî bîyarê ca. 

Gerîlayê dewrê neweyî bi koordîne têgêrenê, girîngîye danê kamuflajê xorinî, dîsîplînê berzî ser. Nê dewrê neweyî de hînî gerîlatîya verêne nêbena. Ganî nê dewrî de gerîlayî perwerde bibê. Gerîlayî senî ke goreyê erazîyî têgêrenê û xo eyar kenê ganî bi nê hawayî goreyê komelî zî têbigêrê. Ye komelo ke tede gerîlayî est ê dişmen nêeşkeno vera nê komelî ser bikewo. 

Ewro Kurdîstan de gerîlayî hem pê tewirê xo yê paradîgma hem zî pê tewirê xo yê azadîgîrîya cinîyan eşkenê komelî ser bivisnê. Eke Bêrîvanî, Zîlanî, Sarayî, Semayî, Çîçek û Delalî mîyanê gerîlayanê azadîye de hende nêbibîyêne fikrê azadîgîrîya cinîyan zî hende aver nêşîyayêne. Seba ke gerîlayê cinîyî serkêşîye kenê cinîyê kurdî hende aktîf ê û hetê dinya ra şinasîyenê. Gerîlayê Kurdîstanî ewro temsîlkarî û serkêşîya demokrasî, azadîgîrîya cinîyan, azadîya komelî kenê. Kolonyalîstan waştêne ke Kurdîstan de kanwazîye serdest bikerê. La gerîlayan verê ney girewt. Eke ewro Kurdîstan merkezê demokrasî, averwazî û azadîye yo no xêrê gerîlayan ra yo. Têna Kurdîstan de nê Rojhelatê Mîyanênî de zî gerîlayê Kurdîstanî verê faşîzm û îşxalî gênê. 

Şero ke Herêmanê Pawitişî yê Medya de yeno kerdene mîsalêko girîng ê pawitişê waranê azadan o. Tay kesê ke vanê gerîlatîye qedîyaya, îdîa kenê ke gerîlayî nêeşkenê waranê azadan vera teknolojîya moderne bipawê. La 4 serrî yo dewleta tirke pê destekê NATOyî, destekê hêzanê xayînan û çekanê qedexeyan nêeşkena Başûrî îşxal bikera. Eke dewleta tirke siba hêrişê Rojawanî yan zî hêrişê cayêkê bînî bikera zî têkoşîno ke rêxistinkerde yo, xo rê xoverdayîş û pawitişî esas keno, Perspektîfê Şerê Şarî yê Şorişgêrî esas keno eşkeno ser bikewo. Nê hetî ra zî ma îmtîhanêkê girîngî danê û ma pê bawer ê ke nê îmtîhanî de ma do ser bikewê. Gerîlayê seserra 21. do nê prosesî de bêmexlûbîya xo bimojnê û serra 39. ya Hemleya 15ê Tebaxe bikerê serra xoverdayîş û serkewtişî.''