Endamê Komîteya Rayberdişî ya PKKyî Murat Karayilanî bi wesîleya serrgêra 20.  ya Hemleya 1ê Hezîrane ya ke 2004 de ameye îlankerdene, ANFyî rê qisey kerd.

Qismê diyînî yê eoportajê Karayilanî ra tayê noqtayê girîngî wina yê:

''1925 ra nata dewlete kena ke bi şîdet û qirkerdişî têgêrayîşê kurdan biqedîna. La hinî no mumkîn nîyo. Kurdî sey verî nîyê. Kurdan rê tim zulm yeno kerdene. La bedelê nê zulmî şarê Tirkîya zî danê. Şer de xeyr çin o. 

Nuşteyê Mustafa Kemal Ataturkî yo ke Rojnameyê Sozcuyî de weşanîyayo raştîyan ano ziwan ke nê raştîyî hertim hetê Rayber Apoyî ra zî ameyêne vatene. Nê raştîyî nê yê; kurdî awankerdişê Tirkîya de hêzanê bingeyînan ra yê, heta ke kurdî û tirkî yew nêbê serkewtiş zî mumkîn nîyo, Mîsaki Mîllî erdê kurdan û tirkan o, ganî nê wird şarî seba serkewtişî tarîxê xo yê hemparî bipawê, Tirkîya erdê kurdan û tirkan o hempar o, ganî herinda şarê tirkî de 'şarê Tirkîya' bêro vatene, ganî kurdî bibê wayîrê sîstemê xoserîye.

Xora Meclîsê Verênî (Meclîsê Ronayoxî) de 10ê çeleyê 1922yî de 'Planê Caardişê Bira Otonomîya Kurdan' est bi. La dima dewlete verê xo da polîtîkaya înkar û îmhaya kurdan.

Rojhelatê Mîyanênî de û Tirkîya de meseleya kurdan relatîyêka girîng a. Heyf ke dewlete û tay hêzê vanê qet bi şerî do bieşkê na mesele çareser bikerê. Bi serran o metodê şerî vera kurdan şuxilîyeno. Kurdî raştîyê komelkî yê. Sey şarê kurdî ma raştîyêk ê, gerîlayî raştî yê, Rayber Apo zî raştîyanê ma temsîl keno. têkoşînê azadîye yê Kurdîstanî wayîrê zemînêkê komelkî yo û dişmeno ke vano qey bi top û tank û îxanetî ser bikewo mîyanê şaşîye de yo.

Tay kesî vanê qey Amerîka bi destê PKKyî Rojawanê Kurdîstanî de dewletêka kurdan awan bikera. Na tewşîyêk a. Amerîka, NATO, dewletê Ewropa ûsn. tim vera PKKyî têgêrayî. Rojawan de QSDyî seba têkoşînê vera DAÎŞî artêşa Amerîka de mutefîqîye kerde ke no normal o. Hetê bînî ra yew eleqeyê QSDyî bi PKKyî çin o. Rejîmê AKP-MHPyî dişmenîya kurdan kenê coka dişmenîya Rojawanî zî kenê. Têgêrayîşê ma û Rayber Apo vera dewleta netewe ya. Rixmê ney zî ê bi zûran îdîa kenê ke ma do dewlete awan bikerê.

Şerê vera kurdan sebebê krîzê ekonomî yê Tirkîya yo. Rejîmê AKP-MHPyî yo faşîst bi polîtîkayanê şerî welatî ver bi felaketan beno. Bi zûra 'Ma hê PKKyî qedînenê' şarî xapîneno. No xora mumkîn nîyo. PKK her çî ra ver têgêrayîşêko îdeolojîk o ke nêno çinkerdene. Meseleya Tirkîya ya esase meseleya kurdan a ke ganî cade bêra çareserkerdene. 

Xoverdayîşê gerîlayan astêka zixme de dewam keno. Gerîlayî vera teknîk, teknolojî û çekanê kîmyewîyan-qedexeyan têkoşîn kenê. Gerîlayî bi taktîkanê xo heqê dişmenî ra yenê. Têkoşînê gerîlayan têkoşînê azadîye yê kurdan rê hêz dano.''