Endamê Komîteya Rayberdişî ya PKKyî Murat Karayilanî Bernameyê Taybetî yê Stêrk TVyî de hêrişê îşxalî û xoverdayîşê bi merkezê Zapî ercnayî.

Qiseykerdişê Karayilanî ra tay noqtayê girîngî wina yê:

''Ne têgêrayîşê ma, ne şarê ma, ne keyeyê ci ne zî avûkatê ci nêeşkenê Rayber Apoyî ra xeberêke bigêrê. Rayber Apo seba şaran yew merkezê çareserî yo. La vera ey bi tecrîdî îşkenceyo psîkolojîk yeno kerdene. Dewleta tirke seba ke îradeyê şarê ma bişikna û şarê ma qir bikera tecrîdê Îmraliyî kena giranêr. Şarê ma ganî bizano ke şexsê Rayberîye de yeno tecrîdkerdene. 

Ganî vera tecrîdî prosesê serhildanî dest pêbikero û têkoşîn û sîyasetêkê şarî bêro kerdene. Eke şarê ma tewirê xo bi hawayêkê girseyî bimojno dewleta tirke do neçare bimana ke tecrîdî ra abigêra. Heta ke tecrîd dewam bikero demokrasî û azadîye do nêrê. Tecrîd yew meseleya azadîye û demokrasî ya, meseleya merdimatî ya. Teyna pê têkoşînî ma eşkenê meseleya tecrîdî çareser bikerê û heta ke tecrîd dewam bikero Kurdîstan de qirkerdiş zî do dewam bikero.

Ez Roşanê Gandarbîyayîşî yê 15ê Tebaxe fîraz kena, şexsê Fermandarê Bêmergî Egîd (Mahsûm Korkmaz) û şehîda fedayîye Zîlane (Zeynepe Kinaci) de pêro şehîdanê ma bi rêzî yad kena. Serra 50. ya Peymana Lozanî yanî 1973 de şarê kurdî seke merde bi. Hemleya 15ê Tebaxe û Apogîran seke şarê ma gandar kerd. O çax zîndanan de xoverdayîşêko tarîxî ame kerdene û dima Hemleya 15ê Tebaxe ameye pratîzekerdene. Hemleya 15ê Tebaxe hem hemleyêka sîyasî hem zî hemleyêka îdeolojîke, komelkî û sîyasîye bîye. Hemleya 15ê Tebaxe şorişêkê komelî, şorişê cinîyan û şorişê şarî afernayî. O çax wexto ke şarê ma ameyêne qirkerdene têkoşînê gerîlayan dîya destpêkerdene û dima serewedaritişê şarî aver şîyî. Ewro zî gerîlayî xeta 15ê Tebaxe de Vakurê Kurdîstanî, Zap û Herêmanê Pawitişî yê Medya de şer kenê. Wextê Hemleya 15ê Tebaxe de dewleta tirke vatbi ke '72 saetan de nê (gerîlayî) do bêrê qedînayene.' La gerîlayî vera vera bîyî pîl, zêdeyêr û Kurdîstan de fikrêk awan kerd.

Serranê peyênan de dewleta tirke bi hawayêkê bêmabênî hêrişê Vakurê Kurdîstanî kena.  2 mengî yo Agirî/Gilîdax de wina operasyonî est ê. Reyna Dêrsim de operasyonê sîstematîkî est ê. Mêrdîn û cayanê bînan ê Vakurî de zî rewşe wina ya. Dewleta tirke heta ke nê cayan de ma şehîdî nêdayê xebera nê operasyonan nêdaye rayaumûmîye. Dewleta tirke propagandaya 'ma dana piro, kişena' kena. Tewr peyên herêmanê Garzan û Hîzanî de dişmenî bi hêzanê pîlan operasyon kerd. Embazê ma Vakurê Kurdîstanî de bi hawayêkê qehremanî şer kenê, xo ver danê. Reyna rojanê peyênan de xeta Qaşûra de pêkewtişî est ê. Beno ke uca de tay şehîdê ma est bê. Hetê bînî ra nê pêkewtişanê peyênan de Vakurê Kurdîstanî de gerîlayê cinîyî bi hawayêkê aktîfî têgêrenê. Nê gerîlayê cinîyî fedayî yê  û serkêşîye kenê.

Dewleta tirke hîrê serrî yo kena ke Zapî îşxal bikera û tede cabiba. Ewro Zap merkezê şer û xoverdayîşî yo. Dişmen rixmê teknîk û teknolojî û hêzanê xo zî 3 serrî yo nêeşka Zapî bivisna destî. Dişmenî Zap de vera embazanê ma çekê qedexekerdeyî û bombayê kîmyewî zî şuxilnayî. Destekê PDKyî ra nêbîyêne artêşa tirke rew ra xo Zapî ra antbî zî. Eke dewleta tirke Zap de bi temamî bin bikewa no do hêz bido hukmatê Başûrê Kurdîstanî. 

Gerîlayî ewro tunelanê şerî de şer kenê ke nê tunelî bîyê kelayê xoverdayîşî. Reyna gerîlayî erazî de bi hawayêkê kome şer kenê. Dewleta tirke her roje Zap de kişteyan dana. Ma Zap de stratejî û taktîkanê afernayoxan anê ca û qetî Zap de do ser bikewê. Wa şarê ma bizano ke Zap de kelayê xoverdayîşî est ê û nê xoverdayîşî do tarîxê kurdan de bi tîpanê zerdênan cabigêrê.

Dewleta tirke teyna dişmena PKKyî ney dişmena pêro kurdan a û wazena pêro Kurdîstanî îşxal bikera. Ma zanenê ke dewleta tirke bi destê MÎTî Başûr de xo rêxistin kena. La PDK rixmê hende çîyan zî paştî dano dewleta tirke. Xoverdayîşê Zapî seba pêro kurdan çimeyê sereberzî yo. La PDK keno ke xoverdayîşê Zapî bişikno. Heyf ke PDK Zap de gerîlayan gêno binê ablûqa û îstîxbaratî dano dewleta tirke. Başûr de dewleta tirke sivîlan qetil kena la PDK ney rê zî vengê xo nêkeno. 

Ma qetî nêwazenê ke gerîla û pêşmergeyî pê bikewê. Ma bi hîsgerî têgêrenê la fermandar û selahîyetdarê PDKyî wina nêkenê. PDK nika Zap de dewleta tirke rê rayîran akeno. Eke verê nê kerdişanê PDKyî nêro girewtene beno ke mabênê gerîla û pêşmergeyan de şer dest pêbikero. Coka ez venga şarê ma, roşnvîr, nuştox, sîyasetmedar û roşnvîran dana ke wa verê ney bigêrê û PDKyî hişyar bikerê! 

PDK vano qey eke Zap de gerîlayî bin bikewê, PDK do ser bikewo. La eke gerîlayî bin bikewê dewleta tirke do bieşka Başûrî îşxal bikera. Wa çew peyê menfaetanê xo de nêşoro, menfaetanê kurdan de şoro. 

Ez venga kek Mesûd Barzanîyî dana ke ma ra nêbo dewleta tirke selam zî nêdana şima û eke dewleta tirke ma tasfîye bikera, do dore bêra şima. Şima nê sîyasetê xo ra fek vera bidê. Gerîlayî ewladê Kurdîstanî yê. 

Ganî PDK serebûtanê tarîxî ra derse bigêra û verê şarê kurdî de mesuldarîya xo bîyaro ca. Wa PDK paştî nêdo dewleta tirke. Ma nêvanê ke wa PDK paştî bido ma. Eke wazeno wa bêteref bimano. 

Nê prosesê tarîxîyî de wa her kes bi hawayêkê cidîyî nêzdîyê rol û mîsyonê xo bibo. Stratejîya ma stratejîya Şerê Şarî yê Şorişgêrî yo. Şarê ma bingeyê ney de wa tewrê têkoşînî bibo. Ma hê kewenê serra 40. ya Hemleya 15ê Tebaxe. Ganî hînî ma yewîya xo awan bikerê û rêxistinîya xo xurtêr bikerê. Ez reyna her kesî rê Roşanê Gandarbîyayîşî fîraz kena û her kesî rê têkoşîn de serkewtiş wazena.''