Endamê Komîteya Rayberdişî ya PKKyî Murat Karayilanî  cewab da persanê Radyoya Dengê Welat û rojdem ercna. Qiseykerdişê Karayilanî ra beşêk wina yo:

''Serkewtişê Garê seba pêro kurdan serkewtişêko pîl bi. Çunke dişmenî waştêne Garê de ser bikewo û netîceyêke bigêro dima zî herême de serwer bibo. No plan Garê de bin kewt. Nê serkewtişî destê kurdan zî kerd xurtêr. 2008 de Zap de zî heman çi qewimîya. Nika her kes goreyê nê serkewtişê ma prosesê xo amade keno. Ma pê bawer ê ke nê serkewtişî ra dima ma û PDK têkilîyanê xo xurt bikerê.

Ganî kurdî şerê dinya yê 3. de pîya têbigêrê. Eke Lozanêko newe biqewimîya destkewteyê Başûr û Rojawanî zî do destî ra şorê. Peymana Lozanî 2023 de qedîyena. Erdogan nika ra amdekarîya keno ke sînoranê Mîsak-i Mîlî îşxal bikero. Ganî kurdî zî goreyê ney stratejîya xo awan bikerê.

Roja Newroze Berdesorê de hêzanê PDKyî hêrişê gerîlayan kerd. Hol o ke no serebût pîl nêbi.  erdê Kurdîstanî ser otay hesabî yenê kerdene. Heta ke yewîya ma nêra caardene kurdî wa dişmenî rê hetkarîye nêkerê. Ez venga pêro partîyanê Kurdîstanî, kurdan, sazgeh û dezgehanê kurdan dana ke seba caardişê yewîya neteweyî mesuldarîya xo bîyarê ca. Ma sey PKKyî mesuldarîya xo anê ca.

Dewleta tirke seba ke Şorişê Rojawanî çin bikera, kurdan pakî bikera sere de Rûsya û Amerîka pêro hêzanê mîyanneteweyîyan reyde hemkarîye kena. Ganî kurdî zî seba ke verê ney bigêrê dîplomasîyêka mîyanneteweyî bikerê û vengê xo bidê eşnaweyene. Eke Rojawan de şerwanî û şar bibê yew, îradeyê xo xurt bikerê ma do ser bikewê.

Şarê ma 8ê Adare û Newroze de mojna ke se beno wa bibo ê wayîrê Rayber Apoyî vejîyenê û azadîya ey wazenê. Newroze û xoverdayîşê Garê îsbat kerd ke 'Planê Çinkerdişî' bin kewt. Qet yew planê înan ê qirkerdişî yê vera kurdan û Têgêrayîşê Azadî do ser nêkewo. Ganî no bizanîyo.

Dewlete nika vana 'mabênê PKK û HDPyî de têkilîye esta.' Înan wextê prosesê çareserîye de heyetê HDPyî erşawit ma hetî. La nika fotografê ê pêvînayîşan sey delîl mojnena. Yew eleqeyê ma bi PKKyî çin o. Îqtîdar seba ke emrê xo derg bikero wina hêrişê HDPyî keno.

Ganî şarê ma bi xurtî tewrê kampanyayanê seba azadîya Rayber Apoyî bibo û seba caardişê azadîya ey têkoşînêkê xurtêrî bikero. Heta ke Rayber Apoyî reyde pêvînayîşê rî bi rî bêro kerdene ganî şarê ma çalakîyanê xo rê dewam bikero. Dezgehê mîyanneteweyî zî weşîya Rayberîye ra mesuldar ê. Wa ê zî mesuldarîya xo bîyarê ca û seba ke Rayberîye ra xeberêke bêra girewtene têbigêrê.

Rayber Apo Zîndanê Îmraliyî de, embazê ma zîndanan de, şarê kurdî meydanan de, gerîlayî koyan de vera Planê Çinkerdişî xo ver danê. Ez tîya ra pêro çalakîkeranê grevê vêşanîye selam kena. Tay kurdî seba menfaatanê xo tewrê nê 'Planê Çinkerdişî' bîyî. Rîyê înan sîya yo. Înan bi taybetî xoverdayîşê Garê de vatêne qey eke PKK bin bikewo tay menfaatan visnenê xo destî. La xelet vejîyayî. Qet yew planê înan ê qirkerdişî yê vera kurdan û Têgêrayîşê Azadî do ser nêkewo. Ganî no bizanîyo.

Goreyê ma seba têdûştîy cinî û camêrdan Peymana Îstanbulî qîm nêkena. La reyna zî ganî hêzê demokrasî û cinîyî wayîrê na peymane vejîyê û seba caardişê ci têkoşîn bikerê.

Ma niika Heftanîn de Hewteyê Çêrîye de yê. Ma do xeta Fermandar Egîdî de rayraşîyayîşê xo dewam bikerê. Embaz Egîd sembolê çêrî, qerardarî û ruhê xoverdayîşî yo.

Dişmen seba ke qesasê Garê bigêro ho amadekarîyan keno. Semedo ke dişmen binkewtişê Garê ra dima bîyo tewş aşmêke û nême ra nata nêeşkeno bileqo. Artêşa TCyî ya îşxalkere têna pê teknîk û îstîxbaratê xo bawer kena. Nînan ra ber yew hêzê înan zî çin o. Beno ke dişmen menga nîsane de têbigêro.

Dişmenî zimistan de tay operasyonê ni nameyê 'Erenî' kerdî. La îlan nêkerd ke nê operasyonî qedîyayî. Dişmen wina mojneno ke seke operasyonî dewam kenê la ê nê operasyonan de ser nêkewtî. Tay tîmanê ma derb werdî la TCyî netîceyêka girînge nêviste destî.

Dewlete propaganda kena û vana 'ma ê tepiştî, teslîm girewtî' ûsn. Nê pêro zûr ê. Înan Şingal û Rojawanî ra 2 kesî ardî. Nê kesî cara têgêrayîşê ma ra remaybî. Dewlete wina mojnena ke seke înan  ê kesî tepiştî. Bi nê hawayî zî vana 'ma ser kewtî.' No raşt nîyo.

Ma emser bi taybetî zaf hêvîdar ê. Hem xoverdayîşê Garê hem zî tewirê 8ê Adare û Newroze seba têgêrayîşê ma bîyî moral. Amadekarî û kombîyayîşê ma mojnenê ke seba serkewtişî firsendê ma zêdêr ê. Emser Vakurê Kurdîstanî de gerîlayê azadîye zêdêr aktîf bibê û cewabê propagandayan bidê. Erdoganî qaşo vatêne 'roja çarşemeyî ma do mujde bidê şima.' La herinda mujdeyî de vat 'ma bin kewtî.' Nika zî şerm nêkenê vanê 'Ma PKK kerd qels.' Ma do cewabê ci bidê.

Eke gerîlayê ma pê ruhê Garê û Newroze têbêrê ma do cewabê xurtî bidê dişmenî. Gerîlayê azadîye yê Kurdîstanî seba caardişê azadîya Rayberîye û Kurdîstanî çarçewa Hemleya 'Wext wextê azadîye yo' de 2021 de rolanê pîlan do bîyarê ca.''