Fermandarê Qerargehê Merkezê Pawitişê Şarî (MPŞ) Murat Karayilanî venga gerîlayanê Herêmanê Pawitişî yê Medya kerd û bîlançoya şerê di mengan ercnaye.

 Fermandarê Qerargehê MPŞyî Murat Karayilanî wina venga gerîlayan da:

''Hezîrane menga fedayîyan a. Ma şexsê Zîlane, Gulane û Dîyar Gerîbî de pêro embazanê ma yê şehîdan yad kenê. Ma do rêçê têkoşînê înan teqîb bikerê, vîrameyîşê înan mîyanê têkoşînê azadîya Kurdîstanî de bipawê.

Ewro zî fedayîyî bi îdeolojîya Rayber Apoyî Zap, Avaşîn û Metîna de şer kenê. Xoverdayîşê înan hêvîya têkoşînê azadîya Kurdîstanî zêdîneno. Destpêkerdişê hêrişanê îşxalî yê dişmenî ra di mengî derbaz bîyî û bîlançoya di mengan eşkera bîye. Heta nika xoverdayîşêko winasên nêbibi. Bi tecrubeyê şerê 2021î no xoverdayîş yeno kerdene. 

Gerîlayan rayîr û metodê pawitişê waranê azadan qetî kerdî. Seke zanîyeno vera Rayber Apoyî, şarê ma û gerîlayan şerêk yeno kerdene û armancê şerî çinkerdişê destkewteyanê kurdan o. 14ê nîsana 2022yî de erd û hewayî ra hêrişan dest pêkerd. La netîceya xoverdayîşê gerîlayan de artêşa tirke Zap de teng bîye. 

Ê pê çekanê modernan û kîmyewîyan zî nêeşkayî netîce bigêrê. Artêşa tirke reya verêne hende Zap de bena teng. Coka artêşa tirke plananê xo de tay vurnayîşî kerdî. Hêverî înan hêrişê vera Zap û Avaşînî hîra kerdî; rojawanê Zapî Girê Cûdî, Girê FMyî û Girê Hekarî girewtî binê hêrişan. Di; rejîmê faşîstî waşt şerê Ukrayna-Rûsya ra medet bikero û hêrişê Rojawanî bikero. Hîrê; tecrîd, hêriş û îşkenceyo psîkolojîk ê Îmraliyî zêdîya. Dewleta tirke seba ke Zap de teng bîye hêrişê xo yê vera warê sîyasîyî û çapemenîye zî zêdînayî. Çunke wazena Kurdîstan de pê sîyasetê qirkerdişî netîce bigêra.

Dewleta tirke nika hêrişê Rojawanî kena, Rojawan de qirkerdişan kena. Embazê ma yê Rojawanî eke nê tecrubeyê di serrî yê gerîlayan xo rê nimûne bigêrê eşkenê vera hêrişanê dewleta tirke ser bikewê.

Vakurê Kurdîstanî de Botanî ra heta Serhed, Dêrsim, Amedî her ca de operasyon û hêrişî est ê. Gerîlayî vera ney bêveng nêmendî û do nêmanê. Ganî naye ra pey gerîlayî bihêzêr cewab bidê dişmenî. Coka îlankerdişê Hemleya Egîdanê Botanî zaf girîng a. Dişmenî çend mengî yo xeylêk cayê Cûdîyî îşxal kerdê. La nê hêrişê îşxalî ameyî pûçkerdene. Ez gerîlayanê Cûdîyî fîraz kena.

Reyna şarê ma vera tecrîdî Rayraşîyayîşê Gemlîkî de ca girewt. Rixmo ke no rayraşîyayîş ame astengkerdene,  tewirê şarê ma binkewtişê AKP-MHPyî eşkera kerd. Rixmê tecrîdî zî vengê Rayber Apoyî vilayê pêro dinya beno. Ê nêeşkenê ney asteng bikerê. Pêro dinya de seba ey xoverdayîşêk est o. Eke siba dişmen hêrişê Rojawanî bikero do reaksîyonêkê pîlî bigêro. 

Embazê ercîyayeyî;

Dewleta tirke seba ke vera hêrişanê kîmyewîyan veng nêkerê û ambargoyê ci yê çekan wedarnê tedaya Swêd û Fînlandîya kena. Dewlete înan rê şantaj kena û estbîyayîşê xo çinkerdişê kurdan û destkewteyanê kurdan ser o nana ro. 

Ewro çar hetanê Kurdîstanî de zulm est o û çew naye ra veng nêkeno. Coka xoverdayîşê gerîlayan û şarê ma zaf girîng o. Şero germin Zap, Avaşîn û Metîna de yo la a raşte şer pêro Kurdîstan de yo. Ganî Vakur û pêro waranê Herêmanê Pawitişî yê Medya de xoverdayîş bêro averberdene. Ganî embazê Herêmanê Pawitişî yê Medya goreyê şerî cade pozîsyon bigêrê, plan, kar û terzê têgêrayîşî rêxistin bikerê. 

Bîlançoya di mengan eşkera kerd ke gerîlayî do netîceyanê pîlan bivisnê destî. Xoverdayîşê gerîlayan resayo astêka tarîxîye. 3 hewte yo Girê Hekarî, Girê FMyî û Girê Cûdîyî fedakarî û xoveerdayîşê embazan hêrişê dişmenî pûç kerdî. Ez embazanê tîyayî selam kena. Xoverdayîşê gerîlayan ameyoxê şaran roşnî keno.

Çîyê ke ewro Zap, Metîna û Avaşîn de qewimîyenê leweyê marîfet û îradeyê merdiman ê. Gerîlayî vera teknîk û teknolojî îradeyê merdiman îsbat kenê. Goreyê bîlançoya di menga 774 çalakîyî ameyê kerdene. Ganî Herêmanê Pawitişî yê Medya de ma giranîye bidê çalakîyanê sey mîyandekewetiş, derbkerdiş, suîkast, koordîne. Bi taybetî wa warê Vakurî giranîye bidê sabotaj û sîkastî ser.

Bîlançoya di mengan xirab nîya la ganî tempo nêro kêmînayene. Ganî ma pawitiş û hêrişkerdişê aktîfî ser o vinderê. Ganî pêro embazî nê metodan bîyarê ca û xeta Şerê Şarî yê Şorişgêrî de bimanê. 

Eke embazê ma wina bi sebr, dîsîplîn, israr, nimite, eqil û afernayoxî têbigêrê qetî do ser bikewê. Ez pêro embazan reyna bi heskerdiş û hûrmetî selam kena û nê şerê tarîxîyî de înan rê serkewtiş wazena.

Bijî Şerê Berxwedana Gerîla! Bijî Şerê Gel ê Şoreşgerî! Bijî Serok Apo!"