Ewro 1ê Gulane yo. Karkerî binê krîzê ekonomîkî yê dewleta tirke de ciwîyenê. Karkeranê înşaatî yê ke bi serran o nê sektorî de xebitîyenê derheqê krîzî de ANFyî rê qisey kerd.

Karker Kemal Devecîyî ard ziwan ke ê her roje xebitîyenê la tim roja bîne fikirîyenê. Devecîyî vat: ''Ma fikirîyenê ke senî şeker û rûnî bihêrînê. Par ma pê yewmîyeya xo eşkayêne her çî bihêrînê. La nika wina nîyo. Ma vera deynî kenê. 4 domanê mi est ê, pêro zî wanenê. Ez nêwazena ke ê zî sey ma înşaatan de bixebitê.''

Remzî Yildizî bale ante ser ke şerê înan ê xebate hol nîyê û vat: ''32 serrî yo ez înşaatan de xebirîyena. 3 domanê mi zî wanenê û ekonomî zaf zor dana mi. Her roje berhemî benê vay. Zengînî benê hîna zengîn, feqîrî zî benê hîna feqîr. Ez û domanî ma tim nîqaşan kenê. Çunke ê xizanîye fam nêkenê. Verî ma pê yewmîyeya xo eşkerayêne rûn, şeker û ardan bigêrê la nika nêeşkenê.''

Vedat Fîktano ke 15 serrî yo înşaatan de xebitîyeno vat: ''Bi serran o ez kira de ya. Çend serrî yo ez xebitîyena la kişte de pereyê mi çin o. 5 domanê mi est ê la ez nêeşkena înan bida wendene. Çunke yewmîye ma rê nêvejîyeno.''

Alîşer Akgunî vat: ''Ma yewmîye ancax a roja xo xelisnenê, nêeşkenê pê pereyê xo bidê kişte. Rixmo ke ma keyeyî de 3 kesî xebitîyenê, nêeşkenê debara xo bikerê.''

Servet Çelebîyo ke 15 serrî yo karker o, vat: ''Çend serrî yo ez xebitîyena la destê ma de çîyêkî çin o. 6 domanê mi est ê, pêro şinê dibistane. Ma roje de 200 lîra yewmîye gênê la no pere ma rê çare nêbeno. Yew tenekeyê rûnî bîyo hezarêk lîra. Ma mengêke de 3-4 hezar lîra qezenç kenê. Halê ma xirab o. Coka ameyoxî ser o yew hêvîya ma çin a.''