Hemserekê Kongreya Komelê Demokratîkî (KCD) Bedran Ozturk, Hemserekanê Partîya Herêman ê Demokratîkan (DBP) Salîha Aydenîz û Keskîn Bayindirî derheqê xoverdayîşê zîndanan ê vera tecrîdî de Merkezê Pêroyî yê DBPyî de eşkerayîyêke daye.

Hemserekê KCDyî Bedran Ozturkî eşkerayîye wende û vat: ''Welat ver bi tarîtîye şino, azadîya şaran yena sînorkerdene û metodê rejîmê faşîstî yenê caardene. Wextê winasênî de ma hewceyê têkoşînê yewbîyayeyî yê hêzanê demokrasî yê. Tirkîya de bingeyê pêro meseleyan de meseleya kurdan esta. Tim pê şîdet û zorbazîye serê na mesele ame girewtene.

Birêz Abdullah Ocalan seba çareserîya meseleya kurdan aktorêko sîyasî û muxatabê çareserî yo. Wextê Prosesê Çareserîye de çekî vindertbî û aramîye resabî komelî. Îqtîdarî seba berdewamîya estbîyayîşê xo peynîya prosesî ard. Birêz Ocalano ke afernayoxo verên ê çareserîya mesele yo hetê nînan ra ame tecrîdkerdene. Pê tecrîdê Îmraliyî welat mîyanê tarîtîye de ame verdayene.''