Konseya Serekîya Pêroyî ya KCKyî bi wesîleya Newroze eşkerayîyêka nuştekîye daye.

Eşkerayîye wina ya:

''Ma Roşanê Newroza ke şarê kurdî pê têkoşînêkê pîlî pêşwazî keno, pê serewedaritişan gandar verdeno û verê zaliman sembolê xoverdayîşî keno fîraz kenê. Ma pê bawer ê ke Roşanê Newroze do biba wesîleya pêvînayîşê bi Rayber Apoyî, tacîdarkerdişê serfîrazîya têkoşînê azadîya Kurdîstanî. Ma roşanê xoverdayîşî yê Rayber Apoyo ke mîrasê xoverdayîşî nîşanê ma da, yê pêro cinîyan, pêro şarê xo fîraz kenê.

Meşaleya azadîye bi hezaran serran vera Dehaqî şexsê Kawayê asînkarî de berz bîye, hetê domananê xoverdayoxan ê Kurdîstanî ra serê ci de destanî nusîyayî. Embaz Mazlûm Dogan pê 3 kîbrîtan dêsê faşîzmî rijnayî. Embaze Zekîye Alkan adirê Newroze bedenê xo de vist ta, serê bircanê Amedî de çalakîya Mazlûm Doganî rê bîye veng. Embaze Rehşan Kadîfekale de adirê Newroze bedenê xo de vist ta, vera ferasetê înkar û qedexekerî bîye cewab û têkoşîn Kurdîstanî ra berdo Tirkîya. Embaze Bêrîvane û Ronahî dêsê kapîtalîzmê Ewropa pê adirê Newroze helnayî. Embaze Sema vera hêrişanê Rayberîye bedenê xo kerd kile û newroze fîraz kerde. Nê embazanê ma her warê têkoşînê azadîye de seba cuyêka azade şer kerd. Ma nê embazanê xo yê şehîdan bi hûrmet û rûmetî yad kenê.

Blokê faşîstî ê AKP-MHPyî vera Rayberîya ma kerdişê îmha û qirkerdişî vistî dewre û wazeno pê adirî kay bikero. Wexto ke kurdan na xebere eşnawite vejîyayî meydanan û her ca de dest pê çalakîyan kerd. Çu nke kurdî estbîyayîş û ameyoxê xo Rayber Apo de vînenê. Şarê ma na raştîye her roje kuçeyan de pê slogananê 'Biciwîyo Serek Apo' û 'Bê serek cuye nêbena' ard ziwan. Çarçewa Hemleya 'Wext wextê azadîye yo' de sere de zîndanan de her parçeyê Kurdîstanî û teberê welatî de seb azadîya Rayber Apoyî çalakîyî ameyî kerdene. Na hemle reyde hetêkî ra rayberîya Sendîkayanê Îngilîstanî de Kampanyaya 'Wextê ci ameyo! Ocalanî rê Azadîye' zî geş bena. 8ê Adare de zî cinîyê kurdî waran de bi heman aste wayîrê Rayber Apoyî vejîyenê. Cepheyê gerîlayan de zî vera îşxalkerîya Garê cewabêko xurt ame dayene û rejîmê faşîstî derbêka pîle werde.

Zaf manadar o ke xeber û îdîayê winasênî yê derheqê weşîya Rayberê ma de şarê ma xo amade keno ke reyna waranê Newroze de azadîya Rayber Apoyî biqîro. Nê îdîa û xeberan mojna ke rejîmê faşîstî seba ke qesasê xo bigêro Rayberîye ser o hesabê gemarinî kerdî. Rejîmo faşîst wazeno bi nê hawayî qesasê binkewtişê Garê bigêro. Ganî şarê ma asta tewr berzze de beşdarê na Newroze bibo û pêro waran de pê tavistişê adirê azadîye nê hesabanê faşîzmî pûç bikero.

Ganî şarê ma yê her parçeyanê Kurdîstanî û teberê welatî na Newroze bivurna Newroza azadîya Rayberîye. Çalakîyê Newroze heta ke Rayber Apoyî reyde pêvînayîşê rî bi rîyî bêro kerdene wa dewam bikerê. Heta pêvînayîşê keye û avûkatan wa çew keyeyê xo de meronişe.Ma venga şarê xo û dostanê xo danê ke rayberîya cinî û ciwanan de ba dormeyê Rayber Apoyî de bibê yew û Newroze de xoverdayîş pîl bikerê.''