Hemserekîya Konseya Rayberdişî ya KCKyî derheqê serrgêra Fermanê 74. yê cerganê DAÎŞî yê vera Şingalî de eşkerayîyêke daye.

Eşkerayîya KCKyî wina ya:
''Fermanê 74. mojna ke êzidîyî hewceyê xopawitiş, xoserî û heqanê winasênan ê. Êzidxaneyo xoser seba êzidîyan şert o. Eke wina bibîyêne êzidîyan hêrişan de DAÎŞ do pişman bikerdêne.

DAÎŞî vera êzidîyan qirkerdişêko tewr zalim kerd û waşt ke pê Fermanê 74. êzidîyan tarîxî de çin bikerê. Ma reyna soz danê ke ma do Kurdîstanê azadî awan bikerê ke êzidîyî tede bi hawayêkê azadî biciwîyê. Êzidxano xoser o ke hasretê Mam Zekî Şengalî, Bêrîvane Şengalî û Zerdeşt Şengalî bi, do qetî bêro awankerdene.

Ma şexsê Mam Zekî Şengalî, Bêrîvane Şengalî û Zerdeşt Şengalî de pêro şehîdan bi hûrmetî yad kenî. Cerganê DAÎŞî yê ke pabesteyê AKPyî yê, cinîyê êzidîyî remnayî û qetil kerdî. Ma soz danê ke qesasê înan bigêrê. Seba ke êzidîyî azad bibê bedelê ci çita beno wa bibo ma do bidê. Heta ke êzidîyî azad nêbê Kurdîstan zî azad nêbeno. Ma pê na hîşmendîye têkoşînê xo bikerê.

Wexto ke DAÎŞî hêriş kerd artêşa Iraqî û pêşmergeyan êzidîyî nêpawitî. Têna rayberîya Derwêşê Evdîyî de 12 gerîlayan Şingal pawit û verê qirkerdişêkê pîlêrî girewt. Sere de PDK û artêşa Iraqî hêzê mîyanneteweyî deyndarê gerîlayan ê.

Fermanê 74. mojna ke êzidîyî hewceyê xopawitiş, xoserî û heqanê winasênan ê. Êzidxaneyo xoser seba êzidîyan şert o. Eke wina bibîyêne êzidîyan hêrişan de DAÎŞ do pişman bikerdêne. Seba ke reyna maruzê qirkerdişan nêbê ganî êzidîyî xopawitişê xo bîyarê ca.  Têna êzidîyî nê ganî pêro kurdî, roşnvîrî, hunermendî, sîyasetmedarî xoserîya Êzîdxanî bipawê. Heta ke Şingal nêbo welato verên ê êzidîyan, êzidîyî nêeşkîyenê bêrê pawitene. Mesuldarîya pêro êzidîyan a ke abigêrê welatê xo.  

Zaf girîng o ke êyê je Fermanê 74. de Şingal terikna abigêrê Şingalî. Cuya kampan merg o. Deynê  êzidîyan o ke abigêrê welatê xo û cuya xo aver berê. Ganî êzidîyî bi taybetî êzidîyê Ewropa nêverdê ke êzidîyê Şingalî muhtacê çîyêkî bibê. 

Ganî êzidîyê Şingalî Fermanê 74. ra dersanê pîlan bigêrê. Ganî bizanê ke bê xopawitiş û xoserî ê do nêeşkê estbîyayîşê xo dewam bikerê. Bê xoserî û xopawitiş mumkîn nîyo ke êzîdîyî qala ameyoxê xo bikerê. Ganî êzidîyî pê komunan, meclîsan xo rêxistin bikerê. Nê wezîfeyê esasî yê êzidîyan ê. Xora asan nîyo ke şaro ke ame qirkerdene cade bireso azadîya xo. La wexto ke xoserî û xopawitiş bêrê caardene amyoxê êzidîyan do garantî bibo û êzidîyî do fermanan de têrî nêrê. 

Serra 7. ya Fermanê 74. de ma venga êzidîyan danê ke seba ke dormeyê xoîdarekerdişê Mam Zekî Şengalî û xopawitişê Zerdeş Şengalî de bêrê pêser, seferber bibê. Ma venga meridmîye, dezgehanê demokratîkan û hêzanê sîyasîyan ê mîyanneteweyîyan danê ke mesuldarîya xo bîyarê ca, seba awankerdişê xoserîya bi xopawitişî wurzê payan ser.''