KCK: Demhat Agît û Cemîl Amed Silêmanî de ameyî qetilkerdene

Komîteya Têkilîyanê Teberî ya KCK'yî da zanayene ke Seyîdxan Ayaz (Demhat Agît) û Eser Irmak (Cemîl Amed) bi hetkarîya gemarin a dewleta Tirkî  û hêzanê mîyanneteweyî ameyî qetilkerdene.

Komîteya Têkilîyanê Teberî ya KCK'yî da pêhesanyene ke Demhat Agît û Cemîl Amed Silêmanî de ameyî qetilkerdene û derheqê babete de nê pare kerdî:

"Her di embazê ma Seyîdxan Ayaz (Demhat Agît) û Eser Irmak (Cemîl Amed) ê ke seba karanê weşîye, dîplomatîkî, sîyasîyî û neteweyî şaristanê Silêmanî yê Başûrê Kurdistanî de bîyî, bi operasyonêkê leşkerî hewayî ra ameyî bombardûmankerdene û qetilkerdene. Nê hêriş reyna mojna ke komploya mîyanneteweweyî ya verba Kurdan her çar parçeyanê Kurdistanî de dewam kena. Hêzanê mîyanneteweyî yê hemparan nê hêrişî de îradeyê Kurdan kerd hedef. Bêguman hêzanê herême û ajanan paştî daye komploya dewleta Tirkî ya faşîste. Hêzê hêrişkarî bi hedefkerdişê sîyasî, komelkî û dîplomatîkî wazenê ke şarê ma bêîrade û bêtemsîl verdê. No qirkerdişo ke Silêmanî de ame kerdene, sere de hetê YNK'yî ra ganî parlamentoyo neteweyî yê Kurdistanî de û hukmatê herême ra bêra eşkerakerdene û hêrişê korsanî yê dewleta Tirkî bêro şermezarkerdene. No hêrişê dewleta Tirkî yo ke hewayî ra kerd, binpaykerdişê wareyê hewayî yo. Hem ma hem zî şarê ma pabeyê ci yê ke no qirkerdişê sîyasî bêro eşkerakerdene.

Şarê ma yê Başûrê Kurdistanî şarêk o ke dejê giranî antî. Enfal û qirkerdişê Helebçe înan rê ameyî kerdene. Înan tewirê xo yo rûmetên û wayîrvejîyayîşê îradeyê xo verê kesêkî de zî ca nêverdayî. Verba Bekoyanê seserra 21'inê ke dewleta Tirkî ya mêtingere înan kena ajan û verba şarî xebitnena, ganî şar  bi ruhê neteweyî tewir bimojne û heqê cuya xo nêdê xayîn û ajanan. Sere de hêzanê sîyasî yê Başûrî rê ma veng danê Kurdan ke yewîya xo ya neteweyî bîyarê ca û tewirêko wayîrvejîyayîşê şehîdan bimojnê. Ma veng danê şarê xo û hêzanê sîyasî ke 23'ê Teşrîna Verêne de Silêmanî de beşdarê merasîmî bibê û tewirê xo bimojnê. Sere de keyeyanê embazanê ma Demhat Agît û Cemîl Amed rê, Rayber Apoyî rê, şarê ma rê serweşîye wazenê. Ma sozê xo newe kenê ke ma do têkoşînê bi keda pîle ya şehîdanê xo biresnê serkewtene."