Hemserekîya Konseya Rayberdişî ya KCKyî derheqê hêrişanê dewleta tirke ya Rojawanî de eşkerayîya nuştekîye daye û nê vatî:

''Dewleta tirke çarçeweya plananê qirkerdişî de 13ê çeleyê 2024î ra nata hêrişê Rojawanî kena. Sey verî hêrişî vera şarî yenê kerdene û warê cuye, tesîsê berardiş û enerjî, depo, embarî, nêweşxane mekteb heme yenê hedefgirewtene. Ma nêhêrişanê bêehleqan ê dewleta tirke şermezar kenê. Dewleta tirke bi nê hêrişan reyna mojna heme dinya ke senî dişmenê kurdan û şaran a. Dewleta tirke û îdareyê Tayyîp Erdoganî de dişmenîya kurdan bîya sey nêweşîye.

Dewleta tirke ya verê çimanê her kesî de Rojawan de sûcê şerî kena. Hêrişê vera Rojawanî çarçeweya sûcanê şerî de yê. Bi qetlîyaman zî sûcê qirkerdişî kena. Depoyê erzakî, îstasyonê elektrîk, awe û enerjî yenê pirodayene û bajarî bêelektrîk, bêawe, bênan verdenê. No sûcê şerî yo tewr giran o.  Dewleta tirke xeylêk rey verê çimanê dinya de sûcê şerî kerd la dinya vera ci bêveng a. No tewir nîno qebulkerdene. Vera hêrişanê dewleta tirke bêvengmendiş yeno manaya hemkarîya sûcanê şerî û sûcanê qirkerdişî yê dewleta tirke.

Ganî sere de Neteweyê Yewbîyayeyan vera nê sûcanê şerî bivejîyo û tewir bîgêro. Reyna heme dezgehê mîyanneteweyî ganî vera nê tewir bîgêrê û vera hêrişanê qirkerdişî yê dewleta tirke bivejîyê. Hêzê Koalsîyonê ke Rojawan de yê ganî têna vera hêrişanê DAÎŞÎ nê vera hêrişanê tirkîya zî bivejîyê. Rojawan de 70 welatan ta hêzê koalîsyonî est o. Eke vera hêrişanê vera Rojawanî nêvejîyenê, qey hey ûca de yê. Dewleta tirke bi polîtîkaya xo têna zirar kurdan nêdana, zirar dana heme herême. Îdareyê Tayyîp Erdoganî wazeno Rojhelatê Mîyanênî de şerî xorî bikero. Ma reyna veng danê dezgehanê Ewropa û hêzanê koalîsyonî ke wa vera hêrişanê dewleta tirke bêveng memanê.

Şarê Rojawanî vera hêrişanê dewleta tirke xover dano. Ma nê tewirê xoverdayoxî yê şarê Rojawanî selam kenê. Ganî şarê kurdî çar parçeyanê Kurdîstanî  û teberê welatî de semedê Rojawanî wirzo payan ser. Ganî heme dostî û hêzê demokratîk şorişgêrî zî paştî bidê şarê kurdî. Şorişê Rojawanî mîraso hempar ê heme merdimîye yo. Ma reyna hêrişê qirkerdişî yê dewleta tirke yê vera Rojawanî şermezar kenê  û veng danê ke wa her kes vera nê hêrişan vengê xo berz bikero û paştî bido Rojawanî.''