Komîteya Têkilîyanê Teberî ya KCKyî derheqê alozîya Kerkûk û Dêra Zorê de eşkerayîyêke daye. Eşkerayîye wina ya:

''Iraq û Sûrîye hêrişanê DAÎŞî ra dima hema zî nêeşkayî aramîye peyda bikerê û nika zî Kerkûk û Dêra Zorê de raştê alozîyanê neweyan yenê. Alozîyê Kerkûk û Dêra Zorê yê hemwextî spontane û tesadufî nîyê. Eşkera yo ke mabênê na alozîye û zîyaretê Wezîrê Karanê Teberî yê Tirkîya Hakan Fîdanî de yew eleqe est o. Hetê bînî ra eşkerayîyê Fîdan û Erdoganî yê seba nê wird cayan zî nîyet û waştişê dewleta tirke eşkera kenê.

Fîdanî îdîa kerd ke pêkewtişê Kerkûkî hetê PKKyî ra dîyayê destpêkerdene, Erdoganî zî agêrayîşê Rûsya de vat ke pêkewtiş û alozîya Dêra Zorê qewimîyayîşê hol ê û bi nê hawayî destekê xo yê seba cergan zî îtîraf kerd.

Dewleta tirke Sûrîye û Iraq de heqanê înan ê serdestîye binpay kena û pozîsyonê îşxalî de ya. Dewleta tirke kena ke Iraq û Sûrîye de îşxalê xo mende bikera. Şexsê bi nameyê Hakan Fîdanî wextê musteşarîya xo ya MÎTî de qetilkerdişê giranî û înfazê komkîyî kerdbî, metodê şerî yê gemarinî û provakasyonî kerdbi. Nika zî no kes heman kerdişan binê nameyê wezîrîye de keno.

Hakan Fîdan û Erdoganî Kerkûko ke tede kurd, ereb, tirkmen, asûrî û armenîyî ciwîyenê sey 'erdê tirkan' îlan kerdo û nê kesî seba ke nîyetê xo yê îşxalî binimnê PDK û keyeyê Barzanîyan şuxilnenê. MÎT serranê peyênan de kena ke Kerkûk xo rê bikero merkezê ajanîye, provakasyon û îşxalî. Yeno waştene ke Kerkûk wa bibo merkezê pêkewtişan û alozîyan.

Cepheyê Tirkmenan o ke raşta raşte pabesteyê Anqara û MÎTî yo û îdareyê PDKyî zî seba ke dewleta tirke û dîktatorîya Erdoganî meşrû bikerê xebitîyenê.  

Dewleta tirke pê tay kesayetanê tirkmenan û keyeyê Barzanîyan kena ke hukmatê Iraqî ser o teda bikera û Kerkûkî bikera warê rant, îdare û îqtîdarê xo. Ganî rayîr nêro dayene nê nîyetanê dewleta tirke. Ganî şarê Kerkûkî vera mudaxeleyanê teberî û polîtîkayanê provakekerdişî seba ke Kerkûkî bikerê kelaya azadîye, demokrasî, haştîye û wayûbiratîye têkoşîn bikerê û xo rêxistin bikerê. Şarê Kerkûkî wayîrê ê kapasîte yê ke xo bi xo îdare bikerê.

Nê esasî se ro seba haştîya Kerkûkî ganî hêverî vera îşxalê dewleta tirke nêrazîbîyayîş bêro mojnayene. Ganî 90 qereqolê dewleta tirke erdê Iraqî ra bêrê wedaritene. Ganî hegemonyaya dewleta tiirke ya vera Başûrî bêra qedînayene. Eke dewleta tirke û dîktatorîya Erdoganî îşxalê xo yê vera Iraqî biqedînê û şorê Iraq, Kerkûk, Sûrîye Lîbya û pêro Rojhelato Mîyanên do biresê aramîye.''