KCK: Elewîtîye pê têkoşînê demokrasîyî yena pawitene

KCK: Serrgêra Qirkerdişê Sêwasî de wayîrvejîyayîşê vîrameyîşê şehîdanê Sêwasî pê tewrbîyayîşê têkoşînê demokrasîyî beno. Pê afernayîşê welatêkî beno ke tede elewî zî kurdî zî pê nasnameyê xo azad ciwîyenê.

Hemserekîya Konseya Rayberdişî ya KCKyî pê wesîleya serrgêra Qirkerdişê Sêwasî eşkerayîyêke weşanaye. Eşkerayîya KCKyî wina ya:

''Qirkerdişê Otêla Madimakî ya Sêwasî ra 27 serrî derbaz bîyî. Ma şehîdanê qirkerdişî bi minet û rêzdarî yad kenê. Waştiş û hesretê înan têkoşînê azadîye yê şaranê ma reyde teqez do bêrê caardene. Komelê etnîkî û pêro bawerîyî Kurdîstanê azadî de pê nasname, kultur, ziwan û bawerîya xo bi hawayêkê azad û demokratîkî do biciwîyê.

Qirkerdişê Sêwasî 2ê temmuze de binê çimdarîya pawitiş û asayîşê hêzanê dewlete de ame kerdene. Seba ke hêzê demokrasîyî yê kurd, tirk û elewîyan nêeşkê xo biresnê têkoşînê azadîye yê şarê kurdî no qirkerdiş ame kerdene. Senî ke ewro  her keso ke seba demokraîuî têkoşîn kenê sey xayîn û hemkarê Têgêrayîşê Azadîye yê Kurdîstanî yeno dîyene, a roje zî aqlê dewlete wayîrê heman hîşmendîye bi. Elewîyî seba ke beşêkê têkoşînê demokrasîyî bîyî a roje bîyî hedef. Bi nê hawayî dewlete armanc kerd ke elewîyan, hêzanê demokrasîyî û kurdan têkoşînê demokrasî û azadî ra dûrî bivisna. Seba naye Qirkerdişê Sêwasî ame kerdene. 

O çax Qirkerdişê Sêwasî seba ke elewîyî bitersê û xo hêzanê demokrasîyî ra dûrî bigêrê ame kerdene. Elewîyî têna welatêkê demokratîkî de eşkenê biciwîyê.

Îqtîdarê AKP-MHPyî her hetî ra wayîrê hîşmendîyêka tekperest o.Wazeno elewîyan asîmîle bikero, çin bikero. Îqtîdar nêverdano ke bawerîyê cîyayî pîya biciwîyê. Serrgêra Qirkerdişê Sêwasî de tek rayîrêk esto ke perwerîya vîrameyîşê şehîdan bîyaro ca. O zî tewrbîyayîşê têkoşînê demokrasîyî yo, afernayîşê welatêkê azadî yo ke elewî û kurdî eşkenê bi hawayêkê azadî bi nasnameyê xo biciwîyê. Heta ke îtîfaqê hêzanê têkoişînê demokrasîyî nêro caardene elewîyî nênê pawitene. Vengdayîşê şehîdanê Sêwasî yê kurdan, kedkaran û cinîyan no yo ke hêzanê demokrasîyî reyde tewrê têkoşînê demokrasîyî bibê.

Dewleta tirke 2ê temmuza 1993î de seba ke elewîyî tewrê têkoşînê demokrasîyî nêbê, kurdan reyde yew nêbê Qirkerdişê Sêwasî kerd. Îqtîdaro faşîst zî ewro dişmenîya her kesî keno, verê têkoşînê demokrasîyî gêno. Elewîyan ser o tedaya winasêne esta. 

Wezîfeyê elewîyan û dostanê ci tewrbîyayîşê têkoşînê demokrasîyî yo. Coka ganî hêzanê demokrasîyî reyde îtîfaq bikerê. Seke serekêkê dezgehêkê elewîyan vat; heta ke kurdî azad bibê ganî ma bibê kurd, heta ke êzîdîyî azad bibê ganî ma bibê êzidî. Wexto ke nêzdîbîyayîşo winasên bêro mojnayene û têkoşîno hempar bêro kerdene hînî wayîrê elewîyan do bêro vejîyayene.

Waştişê azadîye yê şehîdanê Sêwasî û adirê bedenê înan do pêro îrtîca bivêşnê û azadîya şaran û bawerîyan bîyarê ca.''