Hemserekîya Konseya Rayberdişî ya KCKyî bi eşkerayîyêke hêrişê dewleta tirke ya îşxalkere yê vera Silêmanî, Şingal û Kelarî şermezar kerdî. Eşkerayîye wina ya:

''Mîyanê hewteyê peyênî de dewleta tirke ya qirkere hêrişê Silêmanî, Kelar û Şingalî kerd û netîceya nê hêrişan de şehadetî qewimîyayî. Ma nê qirkerdişanê dewleta tirke şermezar kenê. Ma şehîdanê xo bi rêz û minetî yad kenê. Hêrişê vera Şingal, Silêmanî û Kelarî sey hêrişanê bînan çarçewa qirkerdişê kurdan de ameyî kerdene. Dewleta îşxalkere bi nê hêrişan wazena ke kurdan bitersna, îradeyê kurdan bişikna û plananê xo yê qirkerdişî bîyara ca. Ma venga her kesî danê ke vera dişmenîya dewleta tirke ya îşxalkere bibo wayîrê tewirêkî û wurzo payan ser.

Dewleta îşxalkere planê xo yo newe yê serê Başûrî vist dewre. Seba caardişê nê planî zî dewleta tirke tedaya Iraqî û YNKyî kena ke sey PDKyî hemkarîya ci bikerê. Bi nê hêrişan zî dewleta tirke kena ke çimê nînan bitersna. Gef û hêrişî plananê dewleta tirke eşkera kenê. Îqtîdarê AKP-MHPyî bi nê tewirê xo kewt pozîsyonê winayênî ke eşkeno zerar bido her kesî. 

Hêrişê vera Şingalî de şarê ma yê êzidîyan ra Sadûn Mîrza Elî şehîd bi. Nê hêrişî vera îradeyê Şingalî yê azadî ame kerdene. Dewleta tirke wazena qirkerdişo ke DAÎŞ nêeşka bikero temam bikera.

Abdulkadîr Sabrî Toprako ke Silêmanî de şehîd bibi verê faşîzmê AKP-MHPyî de neçare mendbi ke Vakurî ra koçê Başûrî bikero. Embaz Abdulkadîr ewladêkê şarê ma bi ke mîyanê şarî de sey Dr. Sabrî şinasîyayêne û bi zerrîwazî xizmetê şarî kerdêne. O heman wextî de ewladê şehîdêkî bi. Embaz Sabrî hema doman bibi babîyê ey embaz Rêzan tewrê têkoşînê azadîye bibi û serranê 90an de şehîd bibi.

Hêrişê Kelarî de kadroyanê têgêrayîşê ma ra embaz Şevger şehîd bi. Embaz Şevger 2022 ra nata Başûr de têkoşîn kerdêne, karê sîyasîyî kerdêne. Şexsê hîrê şehîdanê ma de ma pêro şehîdanê şorişî û demokrasîyî bi rêz û minetî yad kenê. Ma do hesreta şehîdan qetî bîyarê ca.''