Hemserekîya Konseya Rayberdişî ya KCKyî vera hemkarîya PDKyî ya bi dewleta tirke eşkerayîyêke daye. Eşkerayîye wina ya:

''Wextêkê winasênî de ke şerê gerîlayan ê vera dewleta tirke ya îşxalker bîyo giran PDKyî vera waranê gerîlayan dest pê hêrişê ablûqa kerd. Netîceya ney de mabênê hêzanê taybetan ê PDKyî û gerîlayan de şer qewimîya. PDK bi nê tewirê xo, bi hawayêkê eşkerayî kişta dewleta tirke de tewrê şerî bîyo. PDK bi na gama xo xîret keno ke hemkarê xo dewleta tirke binkewtişî ra bixelisno. Coka dormeyê waranê gerîlayan gêno.

Armancê dewleta tirke û PDKyî nika bi yew. Armancê înan yew o ke wazenê gerîlayan cayanê înan ê 40 serran de bêtesîr bikerê. Mabênê hêrişanê dewleta tirke û ablûqaya PDKyî de ferqêk çin o.Têna rolê înan cîya yê. Rolê dewleta tirke çakûç o, ê PDKyî sindan o.

HPGyî çend reyî venga PDKyî da ke polîtîkaya ablûqaya gerîlayan war verdo. La semedo ke dewleta tirke reyde pêkerdo na polîtîka war nêverda. PDK nê wextî de ke dewleta tirke qels bîya xîrey keno ke aye xurt bikero. Bi nê hawayî paştî dano dişmenê kurdan. Ma PDKyî ra waştbi ke ma reyde dîyalogan bikero, meseleyan nîqaş bikero la o vera ma têgêra.

Eşkera yo ablûqaya waranê gerîlayan, birnayîşê waranê gerîlayan yeno manaya îlankerdişê şerê vera gerîlayan. Verî zî selahîyetdarê PDKyî Fazil Mîranîyî vat beno ke ê do vera gerîlayan şer bikerê. Eke şerêk biqewimîyo mesuldarê ci PDK yo.

Wa kurdî biza bizanê ke dewleta tirke seba îşxalê Herêmanê Pawitişî yê Medya rewî ra hêrişan kena. Gerîlayî vera nê hêrişan xo ver danê. Gerîlayan pê metod û taktîkanê xo teknîk û hêzê artêşa tirke pûç kerdî. La PDK nê xoverdayîşî û îşxalê dewleta tirke seyci vînenê. Îşxalî rê çîyêk nêvano la gerîlayan sûcdar keno. Mesrûr Barzanîyî dûştîya xo ya PKKyî arde ziwan û Meclîsê Hewlêrî de vera gerîlayan veng da. Pê nê vengdayîşê xo ey ferasetê xo, polîtîkaya xo eşkera kerdî.

Îsbat bîyo ke Başûrê Kurdîstanî hetê PKKyî ra pawîyeno. Kes nêeşkeno waştişê PKKyî yê seba pawitişê Başûrî bikero babeta nîqaşî. Wexto ke DAÎŞî xo resna Hewlêrî, gerîlayan mudaxeleyê înan kerd. Mesûd Barzanîyî gerîlayan ra sipas kerd û dewleta tirke zî sûcdar kerde vera DAÎŞî paştî nêdaye înan. Coka sûcdarkerdişê gerîlayan redkerdişê raştîyan o. Herinda paştdayîşê gerîlayan de paştdayîşê dewleta tirke xafletêko taîxî yo.

Ganî hêzê sîyasî û Parlamentoya Başûrî vera îşxalê dewleta tirke tewirê xo bimojnê û dewleta tirke ra biwazê ke cade Başûrî ra veja. La herinda naye de gerîlayan ra yeno waştene ke waranê xo ra vejîyê, xoverdayîş war verdê. No waştiş polîtîkaya dewleta tirke rê xizmet keno ke wazena Têgêrayîşê Azadîye tasfîye bikera, kurdan qir bikera.

Wezîfeyê roşnvîr, hunermend, sîyasetmedar, dezgehê demokratîkî û şarê kurdî yo ke çar parçeyanê Kurdîstanî de vera nê hêrişanê PDKyî tewirê xo bimojnê. Ma venga hêzanê sîyasîyan û şarê kurdî danê ke vera hêrişanê dewleta tirke tewirê xo bimojnê. No wext seba kurdan wextêko tarîxî yo. Eke no tewir bêro mojnayene amyoxê kurdan û Kurdîstanî do rşnî û azad bibo. Eke vera hêrişanê îşxalî tewirêko hempar nêro mojnayene û têkoşîn nêro kerdene 4 parçeyê Kurdîstanî do bikewê binê tehlukeyî. Ganî kurdî nê tehlukeyî bivînê û goreyê mesuldarîya xo têbigêrê.

Roja ke PDKyî warê gerîlayan girewtî binê ablûqa dewleta tirke Mexmûr da bombayan ver. No netîceya polîtîkaya hempare ya dewleta tirke û PDKyî ya. PDK 2 serrî yo ablûqayan keno, teyarayê şerî zî bombayan varnena ser. PDK pê nê ablûqayan rolê sindanî ano ca. Eke kampa multecîyan bigêrîya binê ablûqa xora dewleta tirke zî ney ra paştî gêna û hêrişê kampe kena.

Şarê Mexmûrî vera zulmê dewleta tirke Kurdîstanê Azadî de israr kerd û koçê Başûrê Kurdîstanî kerd. Dewleta tirke Vakurê Kurdîstanî de şarî rê çi zulmî kena Mexmûrî rê zî kena. Coka ganî kurdî wayîrê mexmûrijan vejîyê  ke tewirê kurdayetîye, azadîye û rûmetî ra tawîz nêdanê. Wa kurdî her ca de vera hêrişanê îşxalî yê dewleta tirke wurzê payan ser. Roje roja têkoşînî ya, roja vervejîyayîşê îşxalê dewleta tirke ya.

Şarê kurdî, hêzê sîyasî û dezgehê demokratîkî ganî vera nêzdîbîyayîşê PDKyî yê bi dewleta tirke ya îşxalkere her ca de tewirêk bimojnê û vera îşxalî bi zurtî paştî bidê têkoşînê gerîlayan. Cinî û ciwanê kurdî her ca de wa vera dişmenê kurdan vernîya têkoşînî de ca bigêrê û rolê xo yê tarîxî bîyarê ca.

Hêriş û astengî se benê wa bibê wexto ke xoverdayîş ame mojnayene şarê kurdî teqez Kurdîstanê Azadî û Rojhelatê Mîyanênî yê Demokratîkî biaferno. Na roje nêzdî ya; pê xoverdayîşê xo her ca de ma do nê rojan hîna nêzdî bikerê.''