Komîteya Ekolojî ya KCKyî bi wesîleya Roja Ekolojî ya Dinya ya 5ê Hezîrane eşkerayîyêke daye. Eşkerayîye wina ya:

''Rixmo ke 5ê hezîrana 1972yî de girîngîya ekolojî amebî îlankerdene hema zî tehlukeyê vera ekolojî dewam kenê. Sozê ke konferansê 1972yî de ameybî dayene nêameyî caardene. Ewro dinya qirkerdişê ekolojîkî de têrî ya. Hêzê serdestî yê kapîtalîstî bi kerdişanê xo ekolojî herimnenê.

Kurdîstan û Tirkîya de zî bi destê AKP-MHPyî qirkerdişo ekolojîk Efrînî ra heta Behdînanî, Botanî ra heta Serhed û Rojhelatî yeno kerdene. Dewê Kurdîstanî yê ke verê cû ameybî vengkerdene nika binê awbendan de verdîyenê. Bi talankerdişê daristanan,  bi desan awbendan,  bi hezaran ocaxanê madenî, santralanê enerjî vera zîretî îmkanî yenê çinkerdene û şarî rê xizanîye û kolkerdiş yenê ferzkerdene. Dewleta tirke bi plananê xo yê emperyal û faşîzanan qirkerdişê ekolojîkî sey çeke şuxilnena.

Xozaya Kurdîstanî heta nika hendê raşta hêrişanê giranan nêamebî. Sey şarê kurdî xozaya kurdan zî sey dişmenî yena dîyene. Bi armancanê faşîst û qirkeran, bi qirkerdişê ekolojîkî cografyaya ma gêrîyena binê ablûqa. Qirkerdişo ekolojîk heman wextiî de vera paradîgmaya ekolojîke ya têgêrayîşê azadîye zî hêrişêk o. Dewlete wazena şarê ma cografyaya ci ra dûrî bivisna. Seke Rojawan de dîyeno dewleta tirke hêrişê axpînanê şarî kena û awa şarî birnena. Rojawan de bi destê leşkeranê tirjan darî birîyenê û vêşnayene.

Rewşêka winayêne de Roja Ekolojî nêna fîrazkerdene. Eqsê ci ganî ma bi feryadê xoza bidejê, cigêrayîş bikerê û têbigêrê. Ganî ma her roje bivurna roja ekolojî. Ganî her kes têkoşînê ekolojî de cabigêro û her cayê dinya de seba ekolojî têkoşînêkê rêxistinkerdeyî bikero. 

Seke Rayber Apo vano ke qirkerdişo ekolojîk sebebê serewedaritiş, têkoşîn û welatperwerîye yo. Erkê ma yo wijdanî yo ke ma goş bidê feryadê xoza. Kurdîstan de her cayo ke tede qirkerdişo ekolojîk yeno kerdene ganî bivurîyo çeperê têkoşînî.Vera hêrişanê serê erd, herre, ware, koyan û daranê ma ganî ma têbigêrê.

Verê xoza de, verê tarîxî de, verê neslanê neweyan de mesuldarîyê ma est ê. Verê erdê Kurdîstanî de mesuldarîyê ma est ê. Hêzê modernîteya kapîtalîste û dewleta tirke wazenê seserra 21ine bikerê seserra Şerê Dinya yê Hîrêyînî, qirkerdişê ekolojîkî pîlêr bikerê û dinya bivurnê cehenemî. Vera ney ganî pêro beşê komelî xo rêxistin bikerê. Ganî pêro citkar, karker, dewij, bêkar û pêro kesî yew bibê û xoza bipawê. Seba ameyoxêkê azadî ganî ma têkoşînê ekolojîkî pîlêr bikerê! Rojêke ney ma her roje bikerê roja ekolojî, cuya ekolojîke awan bikerê!''