Hemserekîya Konseya Rayberdişî ya KCKyî derheqê hêrişanê nîjadperestanê vera kurdan de eşkerayîye daye. Eşkerayîye wina ya:

''Wa rehmê Homayî wa Hakîm Dalî ser o bo ke hêrişanê peyênan de şehîd bi û ma birîndaran rê zî şîfa wazenê. Serranê 90an ra nata têkoşînê azadîye yê şarê kurdî ser kewt û Kurdîstan û Tirkîya de serewedaritişî zêdîyayî, şaristan û qezayanê Tirkîya de hêrişê vera kurdan ameyî kerdene. Bi seyan hêrişê winasênî estê ke bi hawayêkê lînçî ameyî kerdene. Hêrişê ke benê sebebê kişîyayîş û birîndarîya merdima wextê peyênî de zêdîyayî. Verî nê serebûtî nişka ra bîyêne nika bi hawayêkê serûberkerdeyî yenê kerdene. Hêrişo ke pê qetilkerdişê Denîze Poyraz dest pêkerd pê birîndarkerdiş û kişîyayîşê merdiman dewam kenê. Çend rojî verî Afyon de vera keyeyêkê kurdî hêriş ame kerdene û ame waştene ke cinî û camêrdê kurdî bêrê lînçkerdene. Nê hêrişî de merdiman rê îşkence ame kerdene û nînan ra tay zî birîndar bîyî. Roşanî ra verî merkezê Anqara de reyna hêrişê vera kurdan ame kerdene, xeylêk kurdî birîndar bîyî ke rewşa nînan ra tayênî giran a. Dewêka Konya de hêrişê vera Hakîm Dal ame kerdene û camêrd verê çimanê merdimanê xo de ame qetilkerdene. Wextêkî verî Konya de reyna vera keyeyêkê kurdî hêriş ame kerdene û nînan ra tay kesî bi giranî birîndar bîyî.

Mabênê nê hêrişan û polîtîkayanê îqtîdarê faşîstî yê AKP-MHPyî de eleqe esto. Kurdê ke kurdayetîye pawenê û azadîye wazenê sey dişmenî ameyî îlankerdene. HDPyo ke çareserîya demokratîke ya meseleya kurdan pawena sey dîşmenî ameye îlankerdene û tim beno hedef. Xeylêk reyî kurdan rê gef ame wendene ke wa raye nêdê HDPyî. Xora seke zanîyeno dişmenîya vera PKK û Rayberîye dişmenîya vera kurdan a. Rayber Apo semedo ke hîşmendîya azadîye daya kurdan mîyanê tecrîdî de yo.

Semedo ke kurdî azadîye de israr kenê nê hêrişî yenê kerdene. Rixmê nê teda û hêrişan zî şarê kurdî têkoşînê azadî û demokrasî de qerardar o. Semedo ke kurdî azadîye û demokrasî de israr kenê vera înan hêriş yeno kerdene. ŞExsê keyeyan û kesayetan de nê hêrişî vera pêro kurdan yenê kerdene. Pê rayîrê nê hêrişan ê xîret kenê ke îradeyê cuya demokratîje ya kurdan bişiknê. Wina kenê ke kurdî nêvajê 'ez kurd a', kurdkî qisey nêkerê! Çunke ê wazenê kurdan qir bikerê û înkar bikerê. Coka hêrişê vera kurdan plankerde û serûberkerde yê.

Îqtîdarê AKP-MHPyî vera kurdan gef waneno, vera HDP û hêzanê demokrasî gef waneno, kam wurzo payan ser hêrişê ci keno. Merkezêkê şerê taybetî esto ke planê qelskerdişê kurdan amade keno, rêxistin keno û ferman dano. MÎT û MHP ê hêz ê ke nê plansazîyanê şerê taybetî anê ca. Coka zêdê eleqeyê nê hêrişkeran bi MHPyî esto. Coka hêrişê vera kurdan bingeyê xo îtîfaqê AKP-MHPyî ra gênê. Erdoganî kurdan û muxalîfan rê vat 'Nê hema roja şima ya hol a' û fermanê hêrişî da. Xora pê vateyê 'Kurdî millî û herêmî nîyê' înan kurdî kerdî hedefê hêrişan.

Nê hêrişî armanc kenê ke kurdî û hêzê demokrasî wa nêrê yewca. Qirkeridşê Pirsûsî û Garê Anqara zî bi heman armancî ameyî kerdene. Îqtîdar yewîya demokratan sey peynîya xo vîneno coka nêverdeno ê bêrê yewca. Ganî şarê kurdî hol bizanê ke armancê nê hêrişan qirkerdiş o. Nê hêirşî plankerde yê û naye ra pey zî do bêrê kerdene. Pê polîtîkaya şerê taybetî Kurdîstan yeno vengkerdene, kurdî şinê ê cayan û maruzê hêrişan benê. Armancê hêrişê Konya no bi ke kurdê Anatoliaya Mîyaêne uca ra vejîyê. 

Eke kurdî wazenê estbê ganî sey pêro gandaran vera hêrişan xo bipawê. No pawitiş şexsê înan de pawitişê estbîyayîşê kurdan o. Çêrîya kurdan eşkena bi her hawayî hêrişan bişikna. Ma wazenê şarê Tirkîya her ca de bi way û biratîye biciwîyê. Ma dişmenîya qey yew şarî nêkenê. Wexto ke vera ma hêriş yeno kerdene ma cewabê ci danê. NAye ra ganî am her ca de xorêxistinkerdişê xo geş bikerê. Xorêxistinkerdişo tewr pîl ê pawitişî yo. Her qeza û şaristananê Tirkîya de pê xorêxistinkerdiş û xoverdayîşî verê hêrişan eşkeno bêro girewtene. Bêgûman kurdî ganî têkoşînê vera faşîstan ê şovenîstan hêzanê demokrasî reyde bîyarê ca.
 

Hêrişê seba qirkerdiş û qelskerdişê kurdan qetî do bêcewab nêmanê, êyê ke nê hêrişan serûber kenê û anê ca qetî do hesab bidê. Ma venga şarê kurdî danê ke rewşanê winasênan de wa paştdayîşê xo xurt bikerê, seba qedînayîşê nê hêrişan têkoşînê azadî û demokrasî her ca de geş bikerê.''