Hemserekîya Konseya Raynerdişî ya KCK'yî derheqê Seyîtxan Ayaz (Demhat Agît) û Eser Irmakî (Cemîl Amed) ye ke Silêmanî de ameyî qetilkerdene eşkerayîyêk weşana.

Eşkerayîya KCK'yî wina ya:

"Dewleta Tirkî bi eşqîyatîyêka ke huqûqê mîyanneteweyî û erjê merdimîye binpay kena, Federasyonê Başûrê Kurdistanî de û cayêkê dewleta Iraqî de bi teyarayanê bêmerdimî yê çekdaran di şorişgêrî qetil kerdî ke endamê Konseya Rayberdişî ya KCK'yî bîyî. Bi dişmenîya xo ya Kurdan rê cînayetêko bînî yê verba merdimîye kerd. Ma embazê xo yê endamê Komîteya Têkilîya Teberî Demhat Agît (Seyîtxan Ayaz) û endamê Komîteya Weşîye Cemîl Amed (Eser Irmak) bi rêzdarîye yad kenî ke nê hêriş de ameyî qetilkerdene. Ma soz danê ke ma do Kurdistano Azad û Rojakewtena Mîyanêne ya Demokratîke saz bikê ke hesretê înan bîyo. Hêrişê dewleta Tirkîya yê verba Rojawanî û hêrişê Silêmanîye dişmenîya înan a verba Kurdan reyna arde verê çiman. Ganî şarê Kurdî û hêzê sîyasî na rewşe bivîne û verba dewleta Tirkîya tewir bimojne. Eke no hêriş têna sey hêrişanê verba PKK'yî bêro dîyene, xelatîya winasêne seba Kurdan biba xafletêko tarîxî.

Hêrişê Silêmanî eşkera kerd ke MÎT'î xo Başûrê Kurdistanî de zaf rêxistine kerd. Îdareyê Başûrê Kurdistanî zî zaneno ke MÎT'î bi hewayêkê xurtî xo mîyanê PDK û YNK'yî de rêxistine kerd. Bi rayîrê rêxistinbîyayîşê MÎT'î bi desan gerîlayî ameyî qetilkerdene. Şarê ma yê Başûrê Kurdistanî no xîyanet qebul nêkero. Ganî îdareyê Başûrê Kurdistanî, pêroyê hêzê sîyasî bi taybetî  PDK û YNK zî derhqê vilabîyayîşê xayînan û MÎT'î de cewab bidê nê tewirê şarê Kurdî.Şarê ma yê Başûrê Kurdistanî verba îşxalkarîya Rojawanî nêrazîbîyayîşêko girîng mojna. Mabênê şar û hêzanê sîyasî de ruhê yewîya neteweyî vejîyayo meydan. Boykotkerdişê malanê Tirkî tewirêko girîng ê verba dewleta Tirkî yo dişmenê Kurdan o.

Ganî şarê ma yê Başûrê Kurdistanî sey embazanê ma Demhat û Cemîlê ke 30 serran gerîlatî kerde û têkoşîn kerd, wayîrê tarîxê xo yê têkoşînî bê. Bi wayîrvejîyayîşê nê şorişgêran ê pîlan ganî cewabo tewr baş bide dewleta Tirkî ya dişmenê Kurdan.Ruhê yewîya neteweyîto ke verba îşxalkarîya Rojawan perayo, ganî bi hêrişê Silêmanîye pîlêr bibe û berpirsîyarîya ma ya ke ma Kongreya Neteweyî bivirazê ke şarê ma pabeyê ci yo. Naye ra ganî hêzê sîyasî yê Kurdî babeta yewîya neteweyî de erey nêmanê û bi înîsîyatîfî tê bigêrê û dest pê karê sazkerdişê komîte bikê. Ganî şarê Kurdî bizano ke PKK heman wextî de têgêrayîşê cezakerdişê xîyanet û dişmenî yo. Naye ra teqez kiştoxê Cemîl û Demhatî ra hesab do bêro persayene. Eke dewleta Tirkî her ca de dişmenîya şarê Kurdî rê keno, hêzê ma yê azadîye zî do her ca de kiştox û dişmenê Kurdan ceza bikê. Hesretê embazanê Cemîl û Demhatî do teqez bêro caardene."