Konseya Rayberdişî ya KCKyî bi wesîleya Roja Kobanê ya Dinya ya 1ê Teşrîna Peyêne û Roja Rojawanî ya Dinya ya 2yê Teşrîna Peyêne eşkerayîyêke daye. Eşkerayîye wina ya:

''Dima ke Kobanê ameye azadkerdene 1ê teşrîna peyêne sey Roja Kobanê ya Dinya û 2yê teşrîna peyêne zî sey Roja Rojawanî ya Dinya ameyî îlanekrdene. Bêguman Şorişê Rojawanî berhemê keda şaranê Rojhelatê Mîyanênî û dinya yo. Xoverdayîşê Kobanê zî bi keda şaran ame kerdene. Coka şarî bi xurtî wayîrê Kobanê û Şorişê Rojawanî vejîyenê. Bi na wesîle ma ancî Xoverdayîşê Kobanê û Şorişê Rojawanî fîraz kenê û pêro paştgîranê Kobanê û Rojawanî rê sipas kenê. Ma şexsê şehîdanê Kobanê de pêro şehîdanê şorişî bi minet û hûrmetî yad kenê.

Wexto ke DAÎŞî hêrişê Kobanê kerd Kurdîstan, Rojhelatê Mîyanênî û çar hetanê dinya ra şorişgêrî û şarî tewrê xoverdayîşî bîyî. Bi nê hawayî DAÎŞ ame binvistene û Kobanê ameye azadkerdene, Şorişê Rojawanî zî ame pawitene. Ameyêne waştene ke bi binvistişê Kobanê Şorişê Rojawanî bêro çinkerdene. La xoverdayîşê şaran ê hemparî verê nê armancî girewt. Rixmê destekê AKP-MHPyî yê bi DAÎŞî serkewtişê Kobanê û pawitişê Şorişê Rojawanî mojna ke xoverdayîşê şaran o hempar eşkeno heqê her çî ra bêro. Bêguman no îrade û waştişê şaran do bieşkê dinya destê serdestîya modernîteya kapîtalîste ra bixelisnê û cuye azad bikerê.

Hêzê peyê DAÎŞî îqtîdarê AKP-MHPyî bi. Îqtîdarê AKP-MHPyî pê DAÎŞî hêrişê kurdan kerd. Ewro zî no îqtîdar DAÎŞî îdare keno. Dima ke DAÎŞ Rojawan de ame binvistene îqtîdarê AKP-MHPyî bi xo dest pê hêrişê Rojawanî kerd. Nê hêrişî ewro zî dewam kenê.

5ê teşrîna verêne de vera Rojawanî hêrişê neweyî dîyayî destpêkerdene ke nê hêrişî bi armancê qirkerdişî yenê kerdene. Dewleta tirke dibistan, binawanî, tesîs, nêweşxane, îbadetxane û awbendan kena hedef.Erdoganî û Hakan Fîdanî no verê çimanê pêro dinya de kerd. La hêzê mîyanneteweyî û dewletî vera nê hêrişanê qirkerdişan bêveng ê. Na bêvengîye mojnena ke nê hêz û dewletî hemkarê dewleta tirke yê. Gazze de zî heman rewşe qewimîyena. Hêz û dewletî goreyê menfaetanê xo nêzdîyê Gazze benê. Erdogan û îqtîdarê ci îdîa kenê ke ê dûştê qirkerdişê Gazze yê la Rojawan de qirkerdiş kenê. Na dirîtîyêka pîl a.

Gefê vera Rojawanî nêqedîyayî. Şorişê Rojawanî binê gef û hêrişanê modernîteya kapîtalîste de yo. Dewleta tirke û îqtîdarê AKP-MHPyî wazenê Şorişê Rojawanî çin bikerê û qirkerdişê kurdan temam bikerê. Hêzê modernîteya kapîtalîste zî peyê nê hêrişan de yê. Çunke Şorişê Rojawanî warê şaran o azad o û hêz û dewletî warêkê winayênî nêwazenê. Dewleta tirke bi destekê Amerîka, NATO, Ewropa û dewletanê bînan û çekanê nînan hêrişê Rojawanî kena. Coka nê hêz û dewletî qirkerdiş û hêrişanê vera Rojawanî ra mesuldar ê.

Nê serebûtî îsbat kenê ke Şorişê Rojawanî ancax bi têkoşîn û xoverdayîşê şaran ê hemparî yeno pawitene. Mabênê hêzanê kapîtalîstan de Şerê Dinya yo 3. qewimîyeno. Dewleta tirke zî bi nê firsendî wazena Şorişê Rojawanî çin bikera û kurdan qir bikera. Ganî şarî û hêzê demokrasî vera ney tewirêkê xurtî bigêrê û têkoşînê hemparî bikerê. Ganî Roja Kobanê û Rojawanî bi na hişmendî bêra pêşwazîkerdene. Sere de şarê Rojawanî û Kurdîstanî pêro şarê Rojhelatê Mîyanênî û dinya, cinî, ciwan, çepgîr, hêzê demokrasî û êyê ke vera kolonyalîzmî yê ganî bi ruhê xoverdayîş û têkoşînî yê Kobanê wayîrê Şorişê Rojawanî vejîyê.''