Hemserekîya Konseya Rayberdişî ya KCKyî bi eşkerayîya nuştekîye hêrişê Moskova şermezar kerd. Eşkerayîye de nê ameyî parekerdene:

''Hêrişê paytextê Rûsya Moskova de  bi desan kesî merdî û bi desan kesî birîndar bîyî. Na serebute ma zaf dejnayî. Ma sere de keyeyan rê  ke merdimê înan merdî serweşîye wazenê û birîndaran rê şîfa wazenê.  Ma dejê şarê Rûsya pare kenê, heme şarê Rûsya rê serweşîye wazenê. Ma nê hêrişê DAÎŞî bişîdetî şermezar kenê. Nê hêrişî reyna wehşet û dişmenîya DAÎŞî ya vera şaran fîna çiman ver.

Dewleta tirke û îqtîdarê AKP-MHPyî DAÎŞî weye kenê  û vera her kesî şuxulnenê.  Dewleta tirke bi DAÎŞÎ her kesî tehdît kena. Vera Têgêrayîşê Azadîye yê Kurdan, şarê kurdî, Sûrîye, Iraq, Ewropa û vera her kesî şuxulnena ke polîtîkayanê xo yê qirkerdan bido qebulkerdene. Dewleta tirke DAÎŞî şuxulnena ke polîtîkayanê xo yê zîhnîyetê Osmanî yê newî bîyarê ca.  Na raştîye ganî hinî bêro vînayene û her kese vera ci tewir bîgêro.

Eşkera yo ke hêrişê Moskova na çarçewa de ame kerdene. Îqtîdarê AKP-MHPyî seba ke waştişê xo Rûsya rê bido qebulkerdene no hêriş kerd. Cuwa ver hêrişo winayên Îran de zî amebi kerdene. Nê wird hêrişî zî Tirkîya DAÎŞî rê dayî kerdene.

Ma reyna nê hêrişî wehşîyî şermezar kenê. Ma sey têgêrayîşê ke vera wehşet û faşîzmê DAÎŞî têkoşîno tewr zaf kerd û bedelê tewr pîlî dayî, reyna vanê ke ma tim cayê şaran de yê û reyna Rûsya rê serweşîye wazenê.''