Komîteya Tekîlîyanê Teberî yê KCKyî eşkerayîya nuştekîye daye û nê pare kerdî:

''15ê çeleyî de hetê Muhafizanê Şorişî yê Îranî ra Hewlêr de hêrişê fuze ame kerdene. Nê hêrişan de hemwelatîyan dinyaya xo bedilnaye. Ma nê hêrişî şermezar kenê û merdimanê ê kesan rê yê ke dinyaya xo bedilnaye, serweşîye wazenê.  Sîyasetê PDKyî Kurdîstan açarnayo warê şer û îşxalî. Netîceyê polîtîkayanê xelatan de warê roniştişî yê şarê kurdî yenê hedefgirewtene ke nê hêrişî meşrû  û raşt nîyî. Dewleta Îranî ganî kurdan reyde dîyalog rono, hêrişanê vera Kurdîstanî bivindarno û cehdkerdişê meşrûkerdişê hêrişê îşxalî yê dewleta tirke caverdo.

Pîya bi nê vera şarê ma û Kurdîstanî  serkêşîya dewleta tirke de hêrişê qirkerdişî dewam kenê. Vera nê hêrişan Gerîlayê Azadîye yê Kurdîstanî bi hewayêkê qehremankî têkoşînê xo her roje xurtêr kenê. Bi çalakîyanê serkewteyan faşîzmo ke hîşê xo vînî keno dahîna beno har. Şaro ke bi hêrişê îşxalî rî bi rî yo teberê têkoşînî de yewna rayîrê ci çîn o. Hêrişê gerîlayanê kurdan o ke moral û hêz dano kurdan tewr zaf dewleta tirke û PDKyî qehrneno. Artêşa tirke ya îşxalkera ke bi paştdayîşê PDKyî koyanê Kurdîstanî de ca dayo xo bi derbeyanê ke gerîlayan ra werdî, bîya toşe, nêzana se bikero.

Têgêrayîşê ma xeylêk wext o ke vano sîyasetê hemkarîye yê PDKyî semedê Kurdîstanî tehlukeyan afirneno. PDKyî çirey nê rexnêyî goştarî nêkerdî û kînê xo yê vera Têgêrayîşê Azadîye yê Kurdan zafêr kerd.  Seba ke xeta îxanetî ya hemkarîye binimno dahîna zaf artêşa tirke kirişt koyanê Kurdîstanî, mewzîyanê gerîlayan rê zafêr nêzdî kerd. Gerîlayê PKKyî resayê asta tewr berze ya tarîxê pawitiş û leşkerî yê kurdan. Gerîlayî derba merdî ganê îşxalkeran ro ke bi hemkarîya PDKyî hêrişê îşxalî kenê.

Dewleta tirke vera şarê ma û Kurdîstanî her qeyde çeke şuxulnena û sûcê şerî kena. Sere de Rojawan de warê roniştişî û hewcedarîyan ê şarî yenê hedefgirewtene.  Ne warê mîyanneteweyî ne zî îdareyê Hewlêrî vera hêrişan vengê nêvejeno. Xora PDK zî seba ke verê îşxalê dewleta tirke abikero dewan veng keno. Rojawan, Herêmê Pawitişî yê Medya, Başûrê Kurdîstanî, Şingal û Mexmûr bi hewayêkê sîstematîkî raştê hêrişanê qirkerdişî yenê. Nê hêrişan de çekê kîmyewî, termobarîk, taktîk nukleerî yenê şuxulnayene. Vera kurdan çekê qedexeyî yenê şuxulnayene û qirkerdişê kurdan yeno meşrûkerdene. Afirnayîşê nê meşrûkerdişî de rolo tewr gird ê PDKyî yo. No sîyasetê hemkarîye cesaret dano Hakan Fidanî yo ke kiştoxê ra resayo wezîrîya karanê teberî ke kurdan tehdît keno. Ma veng danê ke wa her kes vera hêrişanê qirkerdişî yê vera kurdan û polîtîkayanê hemkarîye tewir bîgêro, wayîrê destkewteyanê neteweyîyan bivejîyo û têkoşînî xurtêr bikero.''