Hemserekîya Konseya Rayberdişî ya KCKyî bi eşkerayîya nuştekîye xoverdayîşê tepişteyanê sîyasîyan selam kerd û semedê xurtkerdişê têkoşînî veng da.

Eşkerayîya KCKyî de nê ameyî vatene:

''Kurdîstan û Tirkîya de 27ê teşrîna peyêne ya 2023yî rana tepişteyê sîyasîyî vera tecrîd û qirkerdişan xover danê. Sere de merdimê tepişteyan kesê hîsgêrî zî teberî ra paştî danê xoverdayîşê zîndanan. Ma nê xoverdayîşê erjîyayeyî yê tepişteyanê sîyasîyan birêzdarî selam kenê û pîroz kenê. Bi na wesîle ma reyna Xoverdayîşê Zîndanî yê 14ê Temmuze û xoverdayoxanê ci zî birêzdarî û minetî yad kenê. Şexsê înan de heme şehîdanê xo yad kenê û sozê serkewtiş newe kenê.

Tepişteyê sîyasîyî bi xoverdayîşê xo mesajê muhîmî danê komelî. Rewşa yew komelî tewr rind zîndanî mojnenê. Tewir û çalakîyê tepişteyanê sîyasîyan waştişê azadîye yê komelî mojnenê. Tepişteyî bi îradeyê zixmî vera zulm û îşkenceyî ser kewtî, dêsê qirkerdişî rijnayî û îradeyê komelî xurtêr kerd. Tepişteyanê sîyasîyan vera teslîmîyetî bi tewirê azadîye vera dişmenî ser kewtî. Xoverdayîşê zîndanan Kurdîstan de dişmen bin fîna û berê serekwtişî akerd.

Xoverdayoxê zîndanan teslîmîyet qebul nêkenê vera sîstemê tecrîd û îşkenceyî xover danê. Xoverdayîşê şeş menganê peyênan ê zîndanan vera tecrîdê serê Rayber Apoyî yeno dayene. Xora xoverdayîşo tewr pîl zî Îmrali de yeno dayene. Halê winayênî de komel nêeşkeno bêveng bimano. Şar ganî paştî bido waştişê tepişteyanê sîyasîyan. Ganî şarê kurdî wayîrê xoverdayîşê zîndanan bivejîyo. Şar ganî nê xoverdayîşî sey dewaya xo bivîno û bi çalakîyanê xo têkoşînê tepişteyan xurtêr bikero. Îqtîdarê AKP-MHPyî çarçewaya qirkerdişê kurdan de bi des hezaran şorişgêr, welatperwer, demokratî eştî zîndanan ke verê têkoşînê şarê kurdî bîgêro. Bi tecrîdê Îmraliyî wazenê kurdan qir bikerê. Wa têna merdimanê tepişteyan rê meverdîyo, şar pêro pîya wayîrê xoverdayîşê tepişteyan bivejîyo.

Ganî hêzê şorişgêr demokratîkî vera tecrîdê serê Rayber Apoyî têbigêrê û wayîrê têkoşînê zîndanan bivejîyê. Ganî dormeyê têkoşînê tepişteyan de têkoşîno yewbîyaye dahîna bêro xurtkerdene.  Ganî her kes vera tecrîdî vengê xo vejo paştî bido xoverdayîşê tepişteyanê sîyasîyan. Sîstemê Îmraliyî û tecrîdê serê Rayber Apoyî têna polîtîkaya vera kurdan nîya,eynî wextî de polîtîkaya vera demokratîkbîyayîşê Tirkîya ya. Na polîtîka têna zirar kurdan nêdana , zirar dana komelê Tirkîya zî. Kam ke vera îqtîdarê AKP-MHPyî yo û azadîye û demokrasî wazeno ganî vera tecrîdê serê Rayber Apoyî vengê xo berz bikero. Na çarçewa de ma veng danê şarê kurdî, şaranê Tirkîya û hêzanê demokrasîyî ke wa vera sîstemê tecrîd-îşkenceyî tewir bêro girewtene û têkoşîno yewbîyaye bêro xurtkerdene.''