Hemserekîya Konseya Rayberdişî ya KCKyî derheqê qezayanê trafîkî yê Dîlok û Dêrikî de eşkerayîyêke nuşştekîye daye.

Eşkerayîye wina ya:

''Qezayanê trafîkî yê Dêrikê Mêrdînî û Dîlok de 53 merdimanê ma dinyaya xo bedilnaya û bi desan kesî zî birîndar bîyê. Nê serebûtî hem şarê ma hem zî ma zaf dejna. Ma sere de keyeyanê qurbananê qezayî rê, şarê Mêrdîn û Dîlokî û pêro şarê welatperwerî yê Kurdîstanî rê serweşîye wazenê

Nê qezayê trafîkî qirkerdişan ra cîya nîyê û mesuldarê nê qirkerdişî AKP-MHP yo. Nê qezayê ke goreyê îdîayan peygoşî û bêkontrolîye ra virazîyayê a raşte parçeyêkê şerê vera kurdan o. Peygoşîye û kontrolnêkerdiş zî  netîceyê qirkerdişê vera kurdan ê. Coka ganî ma nê qezayan sey qirkerdiş û qestî bivînê.

Îqtîdarê AKP-MHPyî dişmenê kurdan o, polîtîkaya xo mergê kurdan ser o naya ro, dişmenê bawerî, ziwan, kultur nasname û her çîyê kurdan o û seba çinkerdişê kurdan pêro metodan ano ca. Qirkerdişê ci yê vera kurdan têna Vakur de nê Başûr, Rojawan, Şingal, Mexmûr û her cayê kurdan de yenê kerdene. Faşîzmê AKP-MHPyî bêmabên her roje hêrişê nê cayan kena. Çend rojî verî Hesekê de 4 domanî ameyî qetilkerdene ke keyeyê înan zî hêrişanê dewleta tirke û DAÎŞî de merdbî. Reyna şaristanê Zaxoyî yê Başûrî de 9 hemwelatîyê erebî ameyî qetilkerdene. Îqtîdarê AKP-MHPyî her roje bi şayîye dano zanayene ke înan çend kurdî û gerîlayî kiştê. Zîndanan ra her roje cenazayî vejîyenê. Xûlasa nê pêro kerdişî karakterê dişmenîya AKP-MHPyî ya vera kurdan û xîretê ci yê qirkerdişê kurdan eşkera kenê.

AKP-MHP dişmenê xoza û cografyaya kurdan o zî û çinkerdişê cografyaya kurdan sey parçeyêkê şer û qirkerdişê vera kurdan vîneno. Talanê qirkerdişê daranê Şirnexî a raşte parçeyê qirkerdiş û şerê vera kurdan o. Bêguman no qirkerdişêkê xoza yo la netîceya qirkerdişê kurdan o. Sebebo esas dişmenîya înan a vera kurdan a. Qirkerdişê dîlok û Dêrikî zî netîceyê nê nezdîbîyayîşî yê. Îqtîdar mergê kurdan sey serkewtişêkî vîneno. Coka Kurdîstan de ne yew tedbîr gêno ne zî kontrolan keno. Xora Kurdîstan pêşkêşê telan û qirkerdişê şîrketanê îqtîdarê faşîstî ameyo kerdene. Kurdîstan pê destê nê şîrketan yeno talankerdene. Bêguman têgêrayîşê azadîye do nînan ra hesab biperso. 

Zaf girîng o ke sere de şarê Dîlok û Mêrdînî pêro şarê Kurdîstanî merdimanê qurbanan het de bibo. Wa şarê Kurdîstanî pê îmkananê xo wayîrê xo vejîyo, pê têkoşînê rêxistinkerdeyî verê faşîzmê AKP-MHPyî de vindero. Ancax bi nê hawayî no qirkerdiş do bêro roşnîkerdene û hesabê ci bêro persayene. No qirkerdiş zî tede mesuldarê pêro qirkerdişan AKP-MHP yo coka nêzdîbîyayîş û tewirê înan wa bêrê redkerdene. No îqtîdar şerê taybetî ano ca û şefê înan seba ke qirkerdişê xo binimnê do tewrê cenazayan bibê. Îqtîdarê AKP-MHPyî seba ke qirkerdişê kurdan binimno, yewîya kurdan asteng bikero şerê taybetî keno. Rayaumûmîya demokratîke ganî vera na rewşe hîsger biba û raştîya dişmenî veja werte. Ma sey têgêrayîşê azadîye reyna pêro qurbanan rê rehme wazenê, merdimanê înan rê serweşîye wazenê û birîndaran rê şîfaya xeyrîne wazenê. Ma na rewşa dejîne ra semed pêro şarê Kurdîstanî rê serweşîye wazenê û dejê înan pare kenê.''