Hemserekîya Konseya Rayberdişî ya KCKyî bi eşkerayîyêke Newroze fîraz kerde.

Eşkerayîye wina ya:

''Şarê Rojhelatê Mîyanênî û Kurdîstanî Newrozêka bîne ya tarîxî pêşwazî kenê. Sere de Mazlûm Dogan, Zekîye alkan, Rahşan Demîrel, Bêrîvane, Ronahî ma pêro şehîdanê ke ruhê Newroze ard nê rojan bi minet û hûrmetî yad kenê. Ma Newroza Rayber Apoyî fîraz kenê ke erjê kulturel, komelkî û neteweyî yê kurdan vetî werte. Ma Newroza gerîlayan, kurdan û şerwananê azadîye yê zîndanan fîraz kenê.  Ma pê bawer ê ke Newroza 2021î do hemleya 'Wext Wextê Azadîye yo' de biba yew, îqtîdarê AKP-MHPyî birijna û Rayber Apoyî azad bikera. Nê esasî ser o ma venga kurdan danê ke wa vejîyê meydananê Newroze.

Rojanê peyênan de derheqê rewşa weşîye ya Rayber Apoyî de agahîyê xirabî eşnawîyayî. Coka ganî Newroza 2021î wa bêra kerdene a Newroza ke tede tecrîd bêro şiknayene, Rayber Apo bêro azadkerdene û Hemleya 'Wext Wextê Azadîye yo' bêra kerdene bihêzêr. Na Newroze ganî biba a Newroza ke şarê ma asta berze de perwerîya xo ya seba Rayber Apoyî bimojneno ke verê destpanayîşê dişmenî yê vera Rayber Apoyî bigîro.

Ewro îqtîdarê AKP-MHPyî vera kurdan û pêro şaranê Rojhelatê Mîyanênî polîtîkaya zulmî ano ca. Polîtîkayê îqtîdarî zulmê Dehaqî yê vera şaran ra wetêr ê.  Ewro ma hewceyê ê şaran ê ke 2633 serrî verî rayberîya Kawayan de sere wedarit. Serra 2021î seke 2633 serrî verî vera Dehaqan qewimîyayo wa biba serra rijnayîşê îqtîdarê AKP-MHPyî. Şayîyê Newroze her ca de wa pê nê hedefî bêrê kerdene.

Newroze roja bihêzkerdiş û pawitişê erjanê kurdan û roja berzkerdişê têkoşînê vera zulmî ya. Ewro her wextî ra zêdêr ma hewceyê têkoşînê yewbîyayeyî yê şaran ê. Eke kurdî cîrananê xo reyde vera zulmkaran têkoşîn bikerê  hem estbîyayîşê xo yê neteweyî gênê binê garantî hem zî şarê Rojhelatê Mîyanênî do bibê azad. Çunke têkoşînê vera AKP-MHPyî têkoşîno neteweyî û têkoşînê azadkerdişê şaranê Rojhelatê Mîyanênî yo.

Kurdî 30 serran ra nata pê serewedaritişanê xo yê Newrozan  bîyî şaro rayber ê şaranê Rojhelatê Mîyanênî. Bi taybetî têkoşînê azadîy yê cinîyan ê kurdan erjê Newroze kerd zêdêr, şarê kurdî bi qible û tîja azadîye yê merdimîye.

8ê Adare de cinîyan ê kurdan mojna ke ê hêzê tewr aktîfî yê têkoşînê azadîye yê dinya yê. Bi nê hawayî Newroza 2021î de zî cinîyê kurdî na raştîye do bimojnê, bi ruhê azadîye zêdêr tewrê Newroze bibê û peynîya pêro zulmkar û îşxalkeran bîyarê. Cinî û ciwanê kurdî ganî coşê 8ê Adare bikirişê Newroze û meydanê Newroze bikerê cayê berzkerdişê têkoşînê demokrasî û azadî.

Tecrube, şehîd, serewedaritiş û şayîyanê Newrozan ê bi des serran kerd ke kurdî wextê Newroze de têkoşînê cuya demokratîke û azade biresnê asta tewr berze. Hêzê cuya azade û demokratîke ya ruhê Newroze do pêro zulman birijno. Coka zulmkar û hêzê îşxalkerî her Newroze de tersî ra mirenê. Newroza 2021î de zî pê nê ruhî ma vejîyê meydanan û bi hêzêrî tersê zulmkaran bikerê raştî.

Seke Kawayê asînkarî qesra Dehaqê zorbazî de kerd fedayîyanê kurdan zî adirê azadîye visna ta. Garê de Kawayanê modernan adirê azadîye vist ta. Wa no adir, gelî, şaristan, qeza, dew, taxan û her ca de bêro girkerdene û serra 2021î biba serra caardişê azadîye.

Hînî wextê ci ameyo ke ma Rayberîya Azade reyde welatê azadî de biciwîyê.''