KCK: Têkoşînê vera tecrîdî têkoşînê azadîye yê cinîyan o

KCK’yî 8’Adare pîroz kerd û vat, “Têkoşînê vera tecrîdî têkoşînê azadîye yê cinîyan o û ganî wina bêro dîyayene. Nê bingeyî de ganî pîrozkerdişê 8’ê Adare û têkoşînê azadîye yê cinîyan emser biagêrê têkoşînê vera tecrîdî.”

Hemserekîya Konseya Rayberdiş ya KCK'yî, bi wesîleya  8'ê Adare Roja Cinîyan a Mîyanneteweyîye eşkerayîyêka nuştekîye weşaneye. KCK'yî  8'ê Adare Roja Cinîyan  pîroz kerde û va, “Ma şehîdanê ke têkoşînê azadîye yê cinîyan de cuya xo daye, hemeyan bi mînet û hurmet yad kenê. Rayber Apo rêzdarî silam kenê ke bingeyê îdeolojîya  azadîye ya cinîyan ser o têkoşînê cinîyan resna sewîyêka berze.”

TÊKOŞÎNÊ AZADÎYE YÊ CINÎYAN CEWHER Û BINGEYÊ ŞORIŞÊ DEMOKRATÎKÎ YO

Dewamê eşkerayîye de ca dîya nînan: “Îdeolojîya xelisnayîşî ya cinîyan a Rayber Apoyî, xeta azadîye ya cinîyan û têkoşînê Sara, Delale, Zîlane, Bêrîtane, Şîlane, Çîçeke, Viyane, Sorxwîne, Dogaye, Nalîne, Armance û bi hezaran hemrayanê cinîyan ê ke no oxir de canê xo dayo, mîyanê cinîyan Kurdan de verê averşîyayîşêkê girdî ê şorişî akerd. Na xete şexse Leyla Guven a ke rayberîya têkoşînê sîyasî-demokratîkî ya, şênber bîya.

Xeta azadîye ya cinîyan a Rayber Apoyî têkoşînê cinîyan ê Kurdan de şênber bîya, tesîrê xo teyna şorişê cinîyan ê Kurdan de ser nêkerdo. Na xeta azadîye ya cinîyan Tirkîya, Rojakewtena Mîyanêne û hemey dinya de, verê sîstemê serdestî yê camêrdî girewto. Şorişê Rojawanî yo ke şorişê cinîyan o, bîyo mijdanîya tespîtê Rayber Apoyî yo ke vato, ‘Seserra 21’î do biba seserra cinîyan.

ŞORIŞÊ CINÎYAN DO HEME MERDIMÎYE AZAD BIKERO

Şorişê cinîyan tena cinîyan eleqedar nêkeno. Sere de camêrd, do heme merdimîye azad bikero, kesanîye bi rûmet û azad  biafernayo. Sîstemê nikayî yo kedwerdo serdestperestê camêrdan o dewletperest tewr zêde camêrdan keno qilêrin. Binpaykerdişê cinîyan çiqas giran beno, cimat  zî hende bi kulturê serdestî yê camêrdan de qilêrin beno. No semed ra, cinîyî bi xurtkerdişê têkoşînê azadîye yê cinîyan şexsê xo de cimatî zî azad û demokratîk kenê. Seba ke, camêrdî xo qilêrîye ra, zulm, zext û kedwerîya sîstemê serdestî yê camêrdan ra bixelisnê, ganî  leyê têkoşînê cinîyan de ca bigêrê. Têkoşînê azadîye yê cinîyan, eynî wext de seba xo zî sey têkoşîna xelisîyayîşê bivînê.

CINÎYÎ GANÎ TÊKOŞÎNÊ VERA TECRÎDÎ GIRDÊR BIKERÊ

Hemsereka KCD'yî û parlamentera Colemêrgî Leyla Guvene  vera  tecrîdkerdişê Rayber Apoyî, û hêrişê serê şarê Kurdî seba tasfîyekerdişê şorişê demokratîk ê azadîperwerî yê cinîyan rê yeno kerdene û des bi grevê vêşanîye yê bêdem û bêagêrayîşî kerd. Wexto ke dest bi na çalakîye kerd, bale ante serê destkewteyan ê ke Rayber Apoyî bi şorişê azadîye yê cinîyan afernayî. Grevê vêşanîye yê bêdem û bêagêrayîşî zîndanan de zî vila bi. Şarê Kurdî û hêzê demokrasî zî dî ke no têkoşîn eynî wext de têkoşînê demokrasî û azadîye yê şaran o, coka wayîr vejîyayî û paştdayîş da. Îqtîdarê faşîstî ê AKP-MHP’yî cehd keno ke bi zulm û zextêkê giranî şarê Kurdî tecrîd bikero, verê têkoşînî bigêro û serdestîya xo bipawo.

Peşwazkerdişê 8'ê Adare reyde grevê vêşanîye yê bêdem û bêagêrayîşî û têkoşînê vera tecrîdî zî vila benê. Ganî heme cinîyî nê 8’ê Adare de têkoşînê vera tecrîdkerdişê Rayber Apoyî  girdêr bikerê ke Rayber Apo bi kedanê girdan têkoşînê azadîye yê cinîyan resnayo na sewîyeya bêhempaye. Têkoşînê vera tecrîdî  têkoşînê azadîye yê cinîyan o û  ganî wina bêro dîyayene. Bi nê rengî vera hêrişê faşîzmê AKP-MHP’yî û hezanê kanperestan ê ke wazenê şorişê azadîye yê cinîyan bifatisnê, bêro vindertne.

Şorişê Cinîyanê Kurdan o ke rayberîya Rayber Apoyî de xurt bîyo, azadkerdişê şarê Kurdî û demokratîkkerdişê Rojakewtena Mîyanêne de rolêko gird kay kerd û do rayberîye bikero ke seserra 21’î biba seserra cinîyan. Seke Rayber Apo vano, “Teşîsê Kurdan do biagêro û Rojakewtena Mîyanêne biresno medenîyeto demokratîk.”