Komîteya Têkilîyanê Teberî ya KCKyî derheqê hêrişanê dewleta tirke yê vera Meclîsê Şarî yê Sinûnî yê Şingalî de eşkerayîyêke daye. Eşkerayîye wina ya:

''15ê hezîrana 2022yî de Meclîsê Şarî yê Sinûnî yê Îdareyê Xoserî yê Şingalî hetê dewleta tirke ya îşxalkere ra pêser dîya bombayan ver. Nê hêrişê qirkerî de Saleh Xidir Nasoyo 12 serre şehîd bi, xebatkarê çapemenîye û domanî zî tede 7 êzidîyî birîndar bîyî. Ma saleh Xidir NAso bi rêzdarî yad kenê, keye û komelê êzidîyan rê serweşîye wazenê. Reyna ma birîndaranê nê hêrişî rê zî şîfaya xeyrîne wazenê.

Hêrişanê qirkeran û îşxalî yê dewleta tirke yê vera Rojhelatê Mîyanênî û Kurdîstanî rejîmê Erdoganî ard asta rijîyayîşî. Dewleta tirke seba hîrakerdişê serdestî û kolonyalîzmê xo her ca de hêrişanê xo rê dewam kena. Zanîyeno ke na çarçewa de Başûr zî tede heta Mûsil û Kerkûkî  yew planê îşxalî est o. Dewleta tirke bi taybetî pê hemkarîya PDKyî wazeba planê xo yê îşxalî bîyara ca. Gerîlayê PKKyî vera nê planî xoverdayîşêkê çêrî kenê. Artêşa îşxalkera ke pê nê xoverdayîşî nêeşkaya vera gerîlayan çeka kîmyewîye xebitnena. Rixmê hende metodan û hemkarîya PDKyî de dewlete nêeşkaye netîceyêke bigêra û hewesê îşxalî qirikê ci de mend.

Dewleta qirkere vera pêro waranê azadîye hêrişê qirkerî zêdînayî. Hem vera gerîlayan çeka kîmyewîye şuxilnena hem zî hûmara hêrişan zêdînaye. Hem Kampa Mexmûrî ya ke binê pawitişê NYyî û mesuldarîya Iraqî de ya, de sivîlan qetil kena, hem zî domanan û şarê êzidîyanê ke raştê qirkerdişî ameyê, qetil kena. Dewlete hem planê xo yê îşxalê Rojawanî pêro dinya ra bi zelalî eşkera kena hem zî merdimanê bêpawitişî keyeyanê ci de qetil kena. Erdogano faşîst bêvengîya hêzanê herême ra nê hêrişanê qirkeran keno. Naa bêvengîye tewr peyêne bîye sebebê qirkerdişê Sinûnî yê Şingalî.

Şingal binê mesuldarîya Iraqî de yo. Hukmatê Kazimîyî her firsend de bale anceno îstîkrar û asayîşê Şingalî la vera qirkerişanê dewleta tirke yê vera Şingalî bêveng o. Na bêvengîye têna yena manaya tesdîqî. Hukmatê Kazimîyî derheqê nê hêrişê giranî de eşkerayîyêke nêdaye û vera hêrişanê îşxalî yê serê Başûrî zî tewirêk nêmojna. Nê wird têgêrayîşî seyci yê. Na bêvengîye kena ke dewleta tirke bihêz biba. Ma sey têgêrayîşêkî kolonyalîzmê dewleta tirke zaf hol zanenê. Dewleta tirke ya îşxalkere bi xeyalanê Osmanîyan sîyasetê fethkerdişê erdê Iraqî kena. La seba ke hukmatê Kazimîyî vera nê îşxalê erdê Iraqî û qirkerdişê şarê Iraqî bêveng o, dewleta tirke tira cesaret gêna. Coka ma venga hêzanê komelkî û sîyasalan ê Iraqî danê ke vera nê hêrişan tewir bigêrê, mekanîzmayanê mîyanneteweyîyanê ke do Tirkîya vindarnê bidê têgêrayene û planê îşxalê Iraqî pûç bikerê.

Reyna seba ke êzidîyî verî zî raştê qirkerdişî ameyî dezgehê Neteweyê Yewbîyayeyî (NY) yê sey UNAMIyî wayîrê tay mesuldarîyan ê. Temsîlkarîya Iraqî ya NYyî û dezgehê ci rixmo ke teyît kerd ke dewleta tirke vera êzidîyan hêrişanê qirkerdişî kena bêveng manenê. Na bêvengîya înan zî yena manaya hemkarîya sûcî. Nê hêrişan de bêvengîya sîstematîke ya NYyî ra hêzê qirkerî cesaret gênê. Teyara û droneyê dewleta tirke warê hewayî yê Iraqî şuxilnenê ke no war binê mesuldarîya Amerîka de yo. Verî zî seba ke Amerîka warê hewayî Tirkîya ra akerd na babete amebî rojdem. Hêrişê vera Sinûnî de mesuldarîya nê hêzanê ke warê hewayî dewleta tirke rê akerd, est a. Coka înan verî ke nameyê dewleta tirke bidê têna Saleh Xidir Naso yad kerd. Qirkerdişê dewleta tirke yê vera şarê ma pê peygoşkerdişî nê ancax pê wedaritişê îmtîyaz û tawîzan yeno astengkerdene. Sere de Amerîka ma venga hêzanê mîyanneteweyîyan danê ke hêrişanê dewleta tirke rê hemkarîye mekerê, vera perçekerdişê Iraqî tedbîranê xo bigêrê.

Zanîyeno ke PDK hêrişanê vera Şingal û êzidîyan de wayîrê rolêkê taybetî yo. PDK seke sernêkewtişê Fermanê 73. ra hêrs bîyo û pê dewleta tirke qesasê ney êzidîyan ra gêno. Êzidîtîye û êzidîyî seke bîyê kabûsê PDKyî. PDK, dewleta tirke û DAÎŞî ra ber çew Îdareyê Xoser û xopawitişê êzidîyan ra nêterseno û ci rê dişmenîye nêkeno. PDK senî ke Başûr de vera gerîlayanê azadîye têgêreno wina vera êzidîyan têgêreno. Sere de şarê Başûrî ma venga pêro şarê Kurdîstanî danê ke vera PDKyî tewirêkî bigêrê. Eke ma heman wextî de vera hêrişanê serê Rojawan, Mexmûr, Şingal û Başûrî vengê xo vejê vergirewtişê nê hêrişan de rolêkê pîlî anê ca. 

Rejîmo faşîst ê Erdoganî yo ke noqtaya rijîyayîşî de yo seba ke emrê xo derg bikero reyna hêrişanê hîna barbaran ê vera şarê ma û şaranê herême rê dewam bikero.  Ma venga rayaumûmîya Kurdîstanî û hêzanê Iraqî danê ke vera nê hêrişanê qirkeran tewirî bigêrê û mesuldarîya xo bîyarê ca.''