Hemserekîya Rayberdişî ya KCKyî şayîyê Newroze de bi eşkerayîyêke ercnayî.

Eşkerayîye wina ya:

''Newroza 2021î çar parçeyanê Kurdîstanî de, metropolan de û teberê welatî de bi hawayêkê haşmetînî ameye fîrazkerdene û çimê dişmenan tersnayî, moral da şarê ma. Ma pêro beşdaran û keddaranê Newroze selam kenê û fîraz kenê. Nika ra pê na şayîyan serra 2021î bîye serra destvistişê azadîye.

Newroza 2021î bîye ferman û vengdatîyîşê berzkerdişê Hemleya Wextê Azadîye. Şarê ma bi nê hawayî serra 2021î de rixmê pêro hêriş û zehmetîyan têkoşîn do bîyaro ca. Pêro waranê Newroze de na qerardarî û îrade ameyî mojnayene.

Planê Çinkerdişî yo ke 5ê nîsana 2015î de pê tecrîdî vera Rayber Apoyî ame caardene, nika zî pê darbeya sîyasî û hêrişê vera şarî vurîya hêrişêkê topyekûnî. Ê hedef kenê ke şarê ma bin bikerê û têgêrayîşê ma zî tasfîye bikerê. La şarê ma meydanan de Rayber Apoyî zî Îmrali de vera nê planî xoverdayîşêko pîl kerd û dişmenî qet yew hêrişê xo ra netîce nêgirewte. Newroza 2021î zî mojna ke no plan do ser nêkewo û çin bibo.

Newroza 2021î mojna ke şarê ma hînî seke Rayber Apoyî vatbi bîyo şarê serewedaritişî û şarê Newroze. Kurdî seba estbîyayîş û azadîya xo şer kenê û mojnenê ke rixmê pêro tedayan ê do têkoşînê azadîye ra fel vera nêdê. Kurdan pê tewirê xo mojna ke sey 2633 serrî verî ê reyna pê yewîya şaran pê ruhê Newroze cuya azade û neteweya demokratîke de qerardar ê. Şarê ma pê wayîrvejîyayîşê HDPyî na Newroze de na raştîye îsbat kerde.

Şarê ma Newroza 2021î de pê slogananê 'Biciwîyo Serek Apo' û Rayber Apoyî rê Azadîye' bi hawayêkê xurtî wayîrê Rayberîye vejîya. No wayîrvejîyayîş îdîayanê serê weşîya Rayber Apoyî rê bîyo cewabêkê xurtî. Şarê ma wazeno ke cade derheqê weşî û asayîşê Rayber Apoyî de agahîyan bigêrê. Şarê ma wazeno cade tecrîd wa wedarîyo û Rayber Apo azad bibo.

Rewşa weşî û asayîşî ya Rayber Apoyî hema nêbîye zelale. Ganî qetî avûkatî Rayber Apoyî reyde rî bi rî pêvînayîşan bikerê.Heta ke no pêvînayîş nêro caardene wa şarê ma tewiro ke Newroze de mojna bi çalakîyanê zengînan mende bikero. Sere de cinî û ciwanî ganî pêro şarê ma û dostê ma heta ke babeta asayîş û weşîya Rayber Apoyî de agahîyêkê zelalî bigêrê payan ser o bibê.

Şarê ma zî, dostê ma zî û ma zî derheqê weşî û asayîşê Rayber Apoyî de pabeyê zanayîşêkê zelalî yê. Heta ke rewşa Rayberîya ma zelal nêba ma do seba tewirêkê neweyî eşkerayîyêke nêdê. Şarê ma, dostê ma û hêzê demokrasî eke xeberêke nêrê wa seba metodanê neweyan ê têkoşînî amade bê. Ma mesuldarê ci yê ke no têkoşîn bikirişmê safhayêka newîye. Wayîrvejîyayîşê Rayberîya ke emrê xo da ma, wayîrvejîyayîşê estbîyayîş û azadî yê ma yo.

Newroza 2021î mojna ke şarê ma û dostê ma wayîrê Rayber Apoyî vejîyenê û seba Rayber Apoyî pêro têkoşînan rê amade yê.  Ganî no wayîrvejîyayîş bibo mende. Ma reyna cinî, ciwanan û şarê xo yê ke no tewir Newroze de mojna selam kenê.''