Hemserekîya Rayberişî ya Konseya Hemserekîya KCKyî derheqê hêrişanê îşxalî yê dewleta tirke yê ke tim û tim zêdîyenê eşkerayîye daye û nê pare kerdî:

''Hêrişê îşxalî yê dewleta tirke yê vera Rojawan û Başûrê Kurdîstanî de ewladê şarê ma yê tewr sînayeyî, gerîla, sîvîl, şerwan û rayberê polîtîkî ameyî qetilkerdene.  Endamê Îdareyê Komalgehê Demokratîkî û Azadî yê Rojhelatê Kurdîstanî (KODAR) û Partîya Cuya Azade ya Kurdîstanî (PJAK) Rêzan Cawîdî zî înan ra yew o. Ma şexsê Rêzan Cawîdî de heme şehîdan bi hurmet yad kenê û şarê Rojhelatî û heme merdimanê şehîdan rê serweşîye wazenê.

Hêrişê dewleta tirke yê vera kurdan her ca de bi zêdîyayîşî dewam kenê. Rojawan, Şingal, Mexmur verê çimanê Neteweyanê Yewbîyayeyan (NY) Amerîka, Rûsya û Yewîya Ewropa de her roje dîyenê bombayan ver. Zap, Avaşîn û Metîna şerê vera gerîlayan de sûcê şerî yeno kerdene. Nê waran de vera gerîlayan çekê taktîk nukleer, bombayê termobarîkî û gazê kîmyewîyî yenê şuxulnayene. No têna îdîa nîyo,  ê bi xo îtîraf kenê. 23ê adara 2022yî de yew programê TVyî de pîloto teqawut ê artêşa tirke Erdogan Karakuşî îtîraf kerd ke destê înan de çekê taktîk nukleerî estê û ê nînan vera gerîlayan şuxulnenê. Zanayîşê ke Erdogan Karakuşî derheqê nê bombayan dayî û zanayîşê ke gerîlayî danê sey yewbînan ê. Çimeyê gerîlayan û îdareyê KCKyî bi rojan o na babete anê rojdem la rixmê naye sere de NY û NATO dewletê eleqedarî bêveng ê. Xora nê çekî destê înan ra vejîyenê û ê roşenê Tirkîya coka vera şuxulnayîşê ci bêveng manenê. Bi na bêbengîye ê zî benê hemkarê sûcanê dewleta tirke.

22ê hezîrana 2022yî Madrîd de Tîtîkê NATOyî, 22ê temmuze deTahran de pêvînayîşê Putîn-Erdogan- Îbrahîm Reisî û 5ê tebaxe de Soçî de pêvînayîşê Putîn- Erdoganî ame kerdene. Banê nê pêvînayîşan hêrşê vera Rojawanî zêdîyayî. Hetê bînî ra Erdogan û wezîrê ci qala newe ra îşxalkerdişê Rojawnaî kenê. Eşkerayo ke Erdogan û Putînî derheqê îşxalê vera Rojawanî de qisey kerdo. Dewleta tirke demê peyênî de hêrişê vera Rojawanî de qet qeydeyêk nas nêkena. Vera hêzanê QSD, YPG, YPJ û Asayîşî hêrişê sûîkastî kena, vera şarê sîvîlî qirkerdişan kena. Seba ke şarî erdê ci ra vejo û tede çetayan ca bikero verê çimanê dinya de sûcê qirkeridşî kena. Kesê ke şine wesayîtan merde û birîndaran vejenê ê zî yenê pirodayene.

Bêvengîya hêzanê eleqedaran paştî danê dewleta tirke ya îşxalkere.Hêzê koalîsyonî hetêkî ra têkoşînê QSDyî yê vera DAÎŞî teqdîr kenê û înan sey şîrîkê xo vînenî hetê bîna vera hêrişan dewleta tirke bêveng mamenê. No çîyêko goreyê eheleqê sîyasîyî nîyo. Rojawan de fermandar û şerwanî yenê qetilkerdene gama ke serweşîye wazenê zî nasnameyê qetilkarî  nimenê. Yew qiymetê na serweşîye çîn o. Heqîqet noyo; Şervanê kurdan ê ke şerê vera DAÎŞî de mîyanê koalîsyonî de ca genê raştê hêrişê dewleta tirke yenê. Hêzê koalîsyonî zî hêrişanê dewleta tirke ya ke paştî dana DAÎŞî nêvînayîşî ra yenê. Na bêvengîye verê hêrişanê îşxalî yê neweyan yê vera Rojawanî akena. Vera nê hêrişanê îşxalî yê dewleta tirke û bêvengîya hêzanê mîyannetweyîyî hinda sebrê şarê kurdî nêmendo. Ma veng danê NY, Amerîka û Rûsya ke wa paştî medê sûcanê qirkerdişî yê dewleta tirke û berpirsîyarîya xo bîyarî ca.

Erdogano ke têkoşînê kurdan peynîya ci arde  wazeno pê dişmenîya vera kurdan payra bimano. Ganî sere de şarê ma yê Rojawanî vera hêrişanê îşxalî yê dewleta tirke ya qirkere bi hêz û dînamîkanê xo amadîya xo bikero. Ganî hewtî ra heta hewtayî her kes vera dewleta tirke û çeteyanê co semedê pawitişê welatê têkoşînî xurt bikerê. Dewleta tirke ya ke Zap, Metîna û Avaşîn de derbeyê pîlî werdî hinda nêeşkena payra bimano. Wextê ci yo,  wa şarê Rojawanî derba mergî bido dewleta tirke ro.''