Hemserekîya Konseya Rayberdişî ya KCKyî bi eşkerayîyêke şehîdê menga gulane yad kerdî.

Eşkerayîye wina ya:

''Menga gulane mengêk a ke tede kadroyê serkêşî yê Şorişê Kurdîstanî, Têgêrayîşê Sosyalîstî yê Tirkîya û şarê erebî şehîd bîyê. Nê hetî ra menga gulane têkoşînê hemparî û enternasyonalîzmê şehîdan îfade kena. Ma bi nê hîsan şexsê Hakî Karer, Ferhat Kutay û Îbrahîm Kaypakkayayî de şehîdanê menga gulane û pêro şehîdanê şoriş û demokrasî yad kenê. Ma soz danê ke fişmenê faşîstî çin bikerê û bingeyê neteweya demokratîke de cuya hempare û têdûşte ya şaranê Rojhelatê Mîyanênî awan bikerê.

Gulana 1977î de hetê PDKyî ra bi desan embazê ma bi hawayêkê barbarî ameyî qirkerdene. Ma şexsê Ozan û Hêlîne de şehîdanê Hewlêrî bi rêz, heskerdiş û minetî yad kenê.PDK ewro zî rolê xo yê hemkar û xayînî ano ca. Bi seyan embazê ma pê îstîxbaratê PDKyî şehîd bîyî. Ma venga pêro şarê xo û dostanê xo danê ke bi wesîleya gulane şehîdan bi xorinî fam bikerê, wayîrê înan vejîyê, vera dewleta tirke ya qirkere û hemkaranê ci têkoşînî berz bikerê.

Xoverdayîşê Zap û Avaşînî bi perwerîya şehîdanê menga gulane vera dişmen û hemkarê ci cewabêkê tewr manadarî yê tarîxî dano. Xoverdayîşê vera hêrişanê îşxalî yê dişmenî ho keweno menga yewîne. Dewleta tirke armanc kerdêne ke cade Zap û Avaşînî bivisnê destî. La netîceya xoverdayîşê gerîlayan de dewlete derbê giranî werdî û nêeşkaye planê xo bîyara ca. Goreyê bîlançoya MPŞyî binkewtişê artêşa îşxalkere û kişteyê ci werte de yê. Gerîlayan vera îşxalî bi ruhê Apogîrî şer kerd û Kurdîstanî pawit. Ma pêro gerîla û fermandaranê HPG û YJA-Starî zerrî ra selam kenê û fîraz kenê. Ma şexsê embazanê ma Mizgîne û Rohatî de pêro şehîdanê Zap û Avaşînî bi rêzdarî yad kenê û soz danê ke têkoşînê înan ser bivisnê.

Vera gerîlayan yew şansê artêşa îşxalkere çin o. Prosesê nê şerê mengêke ney eşkera keno. Na yew menge de gerîlayan hem derbî dayî dişmenî ro hem zî adirê zerrîya ciwanan we kerd û eleqeyêko pîl dî. Ciwanê welatperwerî her ca de seba ke tewrê gerîlayan bibê têgêrenê. Gerîlayan bi nê hawayî ciwanî antî xo hetî û pawitişê Kurdîstanî rê dewam kerd. Bêguman naye ra pey zî gerîlayî vernîya têkoşînî de şer bikerê û serkêşîya têkoşînê azadîya şarê xo rê dewam bikerê.

Gerîlayê YJA-Starî bi mesuldarîya perwerîya Rayber Apoyî û serkêşîya rayîrê azadîye têgêrayî û înan cephe de tewr vernî de derbê pîlî dayî dişmenî ro. Gerîlayanê YJA-Starî serkêşîya Mizgînan de vernîya têkoşînî de ca girewt, çalakîyê serkewteyî yê cîyayî kerdî, derbê pîlî dayî dişmenî ro, şikl da şerî û asta xoverdayîşî berze kerde.

Faşîzmê AKP-MHPyî armanc keno ke destkewteyanê şarê kudî werte ra wedarno, qirkerdişê kurdan bikero û bireso sînoranê Mîsak-i Mîllî. No îqtîdar seba ke têgêrayîşê ma verê xo de sey astengî vîneno vera gerîlayan û têgêrayîşê ma hêrişanê îmha keno. Îqtîdar bi hemkarîya PDKyî wazeno nê şerî bi netîce bikero. Şarê kurdî tewirê PDKyî vîneno û her ca de vera ci reaksîyon dano. Ma venga pêro roşnvîr, nuştox, hunermend, dostanê kurdan, şarê kurdî û rêxistinanê kurdan danê ke vera îşxalê dewleta tirke û hemkarîya PDKyî wayîrê şehîdanê Qirkerdişê Hewlêrî vejîyê û bi nê hawayî têkoşînî berz bikerê.

Dewleta kolonyalîste û artêşa ci ya îşxalkere seba ke pê gerîlayan nêeşkenê çeka kîmyewîye şuxilnenê. Waro mîyanneteweyî vera ney qetî tewir nêgêno û îtîraz nêkeno. No bi zelalî dirîtî û sûcê merdimîye yo. Êyê ke cayê bînî de vera çeka kîmyewîye, vera şerê Rûsya yê serê Ukrayna vejîyenê vera dewleta tirke, hêrişanê ci yê îşxal û kîmyewîyan vengê xo nêkenê. Şarê kurdî, dostê înan û rayaumûmîya demokratîke ganî vera ney bi xurtî tewirê xo bimojnê û nê sucî rê vajê bes o.

Xoverdayîşê gerîlayan û şarî yo ke xeta şehîdanê gulane de berz beno, do qetî ser bikewo; Kurdîstanî azad, Tirkîya û Rojhelatê Mîyanênî zî demokratîk bikero.''