Hemserekîya Konseya Rayberdişî ya KCKyî derheqê serkewtişê xoverdayîşê Wanî de eşkerayîyêke daye. Eşkerayîye wina ya:

''Îqtîdarê AKP-MHPyî yê faşîstî binkewtişê xo qebul nêkerd û xîret kerd ke îradeyê şarê Wanî xesp bikero. No xîret netîceya xoverdayîşê şarî de ame astengkerdene û pûçkerdene. Xoverdayîşê Wanî yê tarîxîyî netîceyêka pîle viste deste. Ma nê têkoşîn û xoverdayîşê şarê xo selam kenê. Serkewtişê Wanî serkewtişêko raşt o. 

Îqtîdarê AKP-MHPyî teyna zulmê kurdan nêkeno, zulmê şaranê Tirkîya keno. Îqtîdar çime, ked û erjanê Tirkîya îstîsmar keno û wazeno ke Tirkîya de rejîmê dîktatorîye awan bikero. Îqtîdar bi hawayêkê eşkerayî şarê kurdî rê gefan waneno, komelî parçe keno û keno ke her kes bibo dişmenê kurdan. Şarê kurdî vera înkar, nîjadperestîye û faşîzmî têkoşînê azadî û demokrasîyî keno. Kurdî çareserîya meseleyan demokratîkbîyayîşê Tirkîya de vîneno û seba ney têkoşîn keno. Demokratîkbîyayîş zî waştişê pêro şaran o. No bi xurtî Wan de ame dîyene. Wan de teyna îradeyê şarê Wanî ney îradeyê temamîya Tirkîya xelisîya. 

Weçînayîşanê 31ê adare de Tirkîya de rewşêka newîye vejîyaye werte. Teda û hîleyê AKP-MHPyî bin kewtî. Şar û hêzê demokrasîyî ser kewtî. Şaranê Tirkîya û Kurdîstanî vera komployanê AKP-MHPyî tewirêko zelal mojna. Xoverdayîş û têkoşînê Wanî bi serkewtişê xo pêro şarî bihêz kerdî. Eke îqtîdarî Wanî xesp bikerêne game bi game Tirkîya û Kurdîstan zî do xesp bikerdêne. La no hesabê faşîzmî ser nêkewt û xoverdayîşê şaran ser kewt.

Şarê Wanî derbêka pîle daye faşîzmî ro. Xoverdayîşê Wanî şorişêk o. Şarê Wanî bi metodêkê serewedaritişî yê neweyî hişmendî, îrade û dînamîkê sîyasîyî dayî vernî û têkoşînê azadîye de safhayêka newîye daye destpêkerdene. Ma nê xoverdayîşî û şorişî fîraz kenê. Ma cinî û ciwanan, şarê Wanî û pêro şaranê xoverdayoxan selam kenê.

Proseso nikayên ferz keno ke hêzê demokrasîyî yewîya xo zêdeyêr aver berê. Çunke serkewtişê Wanî netîceya têkoşînê hempar û paştdayîşî bi. Wan de rayîrê yewîya têkoşînî ame akerdene. Ganî na yewîye bêra pîlkerdene. Ma venga pêro şaran û hêzanê demokrasîyî danê ke yewîya xo xurtêr bikerê.''